2. Mose 35 - O Debleskro Lab 2024 (Sinte-Manouche)

Rikrenn o Debleskro dives!

¹ O Mose das i tsele Israelitarya khetne gole oun penas ap lende: “O baro Devel penas t'menge:

² Shob divessa krenn t'mari boudi! O eftato dives hi o Debleskro dives. Ap ko dives krenn či! Ko dives hi o baro Debleske. Koon ap kava dives boudrella, hounte merella.

³ Ap ko dives krenn kek yag an t'mare tsele khera!”

Anenn kouč koova o Debleskro khereske!

⁴ O Mose penas ap i tsele Israelitarya: O baro Devel penell t'menge:

⁵ Hakeno, hoy les an o dji rhačella, te dell lo man pestar čomone, kova nay dell man: Sonakay, roup oun lolo saster,

⁶ bakrengro bal, hoy blaueto, lolo oun lolo har yag kerdo vas, lačo layntikro than oun bouzyengre balla.

⁷ Bakreskri ledertikre plarhte, hoy lolo kerdo van, vavar lače ledertikre plarhte oun kasht ko roukestar, hoy kharella Akatsia,

⁸ momelengro djet, kouč soungepaskro koova, hoy čivenn le an o makepaskro djet, oun ninna kouč soungepaskro koova, hoy vell rhačedo ap o sonakaskro bob,

⁹ ninna save barra, hoy kharenna Onyx oun vavar kouč barra, te venn le ap o rashayeskri damdira oun ap o bečeskri possita kerdo.

¹⁰ Koon mank t'mende hayvell shoukar koova te krell, kova te vell oun boudrell mentsa, te nay kras mer, hoy o baro Devel penas menge:

¹¹ ko Debleskro plarhteno kheer peskre plarhtentsa, peskre rikepangre, činle kashta, pandepangre kashta oun pesse kashta ap herya;

¹² ko sonakaskro morhton i kashtentsa hidjepaske, o pralstouno kotar koy pre, oun ko kouč kotar than, hoy mank i douy iseme pandlo vell;

¹³ koy rhapaskri i kashtentsa hidjepaske oun lauter, hoy pashel hi, ninna i Debleskre mare;

¹⁴ koy momelengri oun lauter, hoy pashel hi, lakre momlia oun lakro djet;

¹⁵ ko bob, kay ko soungepaskro koova rhačedo vella oun leskre hidjepaskre kashta; ko makepaskro djet; ko kouč soungepaskro koova; koy plarhta an o khereskro voudar;

¹⁶ koy sasterni rhačepaskri, kay firhe rhačedo venna o Debleske, ninna koy netsa dran lolo saster, kol hidjepaskre kashta oun lauter, hoy koy pashel hi; ko thopaskro čaro oun leskre herya;

¹⁷ kolla layntikre kotya oun i pesse kashta ap herya, hoy troul i glanstouni platsa hi; koy plarhta an o voudar glan i glanstouni platsa;

¹⁸ kol tikne sasterne kotya, hoy denn le an i phoub, te rikrenn le i plarhte zoreles, kolla plarhte hoy hi ap o kheer, ninna kolla, hoy hi troul i glanstouni platsa, oun kol shelle, hoy hi kote an-pandlo;

¹⁹ o rashayengre kouč ripya, hoy o Aron oun leskre čave an-rivenn, te boudrenn le an o Debleskro kheer.

I Israelitarya denn kouč koova o Debleske

²⁰ Pal kova djan i tsele Israelitarya penge.

²¹ Halauter, kolengre djia rhačan, oun kay kaman pendar čomone te dell, van oun anan čomone o baro Debleske, te vell leske i plarhteno kheer kerdo, kay i rashaya nay boudrenn leske, oun te nay krenn le ripya kolenge.

²² Morsha oun djouvya anan pendar sonakaskro koova: sonakangre soubya, kanengre, goustria, verklia oun vavar sonakangre koola o baro Debleske.

²³ Kones kouč bakrengro bal his, hoy blaueto, lolo oun lolo har yag kerdo vas, kova anas les pash o Moseste, ninna lačo layntikro than, bouzyengre balla, bakrengri ledertikre plarhte, hoy lolo kerdo van, oun vavar lače ledertikre plarhte.

²⁴ Kones roup, lolo saster, akatstikro kasht his, anas les o baro Debleske o boudepaske ap o Debleskro kheer.

²⁵ I tsele djouvya, kay hayvan mishto thaba dran kouč bakrengro bal te krell, kran kova oun anan yaake thaba, hoy blaueto, lolo, oun lolo har yag kerdo vas, ninna lačo layntikro than.

²⁶ Vavar djouvya, kay hayvan oun kaman thaba te krell dran bouzyengro bal, kran kova ninna.

²⁷ Kol deesh-te-douy pralstoune morsha, kay his i pralstoune pral kol deesh-te-douy bare familye, kay van o Israeleskre čavendar, kolla anan kouč barra, hoy kharenna Onyx, oun vavar kouč barra, te venn le ap o rashayeskri damdira oun ap o bečeskri possita kerdo.

²⁸ Ninna anan le momelengro djet oun ko koova, hoy mishto soungella, te vell lo rhačedo, ninna kouč soungepaskro koova, hoy vell an o makepaskro djet čiddo.

²⁹ Yaake anan i Israelitarya, morsha oun djouvya, kolengre djia rhačan, boud koova pendar, te vell koy tseli boudi kerdo, hoy o baro Devel o Moseske penas.

I boudepangre, kay hayvenn mishto shoukar koova te krell, lenn pengri boudi

³⁰ O Mose penas ap o Israelitarya: “Shounenn, o baro Devel rodas o Bezalel vin. Leskro dad hi o Ouri, oun leskro papo hi o Hour, dran o kheer Youda.

³¹ O baro Devel čivas peskro dourho an o Bezalel, oun das les gosvepen oun vasta, hoy hayvenn mishto te boudrell,

³² te nay krell lo shoukar koova dran sonakay, roup oun lolo saster.

³³ Ninna hayvell lo kouč barra te činell oun an goustria te čivell. Ninna nay dell lo shoukar koova vin čourye dran kasht, yaake te nay krell lo hako shoukar koova.

³⁴ O Devel das les ninna o gosvepen an o dji, te sikrell lo i vavaren, har te krenn le kay boudi. Ko gosvepen das o baro Devel ninna o Oholiab. Koleskro dad hi o Ahisamak, dran o kheer Dan.

³⁵ O baro Devel das kol douyen, o Bezalel oun o Oholiab, o gosvepen, te hayvenn le mishto sonakaskro koova te krell, ninna shoukar plarhte dran lačo layntikro than oun dran kouč bakrengro bal, hoy blaueto, lolo oun lolo har yag kerdo vas. Ninna nay sivenn le shoukar koova an kol kotya than. Yaake nay krenn le haki boudi, oun hayvenn, an pengro shero glan-vi te dikell, har te krenn le lat.