2. Mose 33 - O Debleskro Lab 2024 (Sinte-Manouche)

Ko čilačo koova, hoy i Israelitarya kran, khaytell len

¹ O baro Devel penas ap o Moseste: “Djan doureder, tou oun kol menshe, kolen tou dran o them Egiptia vin anal. Djan an ko them, kay me man sovel dom glan o Abraham, o Isaak oun o Yakob oun lenge penom: T'mare čaven dau me kava them.

² Oun me bičrau i bolepaskro. Kova djal glan t'mende. Oun me tradau i vavar menshen an kava them vin: i Kanaanitarya, i Amorarya, i Hetarya, i Perisarya, i Hivarya oun i Yebousarya.

³ Yaake anau t'men an ko them, kay hi boud thoud oun gvin. Me vau gar t'mentsa. T'mer djivenn pal t'maro shero oun kamenn gar te shounell. Oun me doms nay t'men moulo ap o drom, te djoms t'mentsa.”

⁴ Har i Israelitarya kol phare laba shounan, rovan lengre djia, oun kek lendar čivas bouder peskro sonakay oun roup ap peste.

⁵ Yaake kran le, hoy o baro Devel o Moseske penas. Leske penas lo: “Pen ap i Israelitarya: T'mer djivenn pal t'maro shero oun kamenn gar te shounell. Te voms me t'mentsa i tikno tsiro ap o drom, doms me t'men moulo. Čivenn kanna t'maro sonakay oun roup tele! Pal kova kamau me dikell, hoy t'mentsa krau.”

⁶ Yaake čivan i Israelitarya pengro sonakay oun roup tele, har his le pash i berga Horeb.

O Debleskro plarhteno kheer

⁷ Hako kopo, kay djan i Israelitarya ap i vavar platsa, čivas o Mose o plarhteno kheer pre vin glan koy platsa, kay i menshe hi. Yob penas: “Kova hi ko kheer, kay o baro Devel t'mentsa khetne vell.” Hako Israelitari, kay kamas o baro Deblestar čomone te poučell, hounte djas kote.

⁸ Hako kopo har djas o Mose vin pash o Debleskro plarhteno kheer, stan i tsele Israelitarya pre oun djan an i voudya glan lengre plarhtene khera, oun ačan koy tardo. Yon dikan o Moseske palla, har yob pash o Debleskro plarhteno kheer djas.

⁹ Vas lo koy, vas i bari folka tele oun ačas pral ko voudar tardo. Oun o baro Devel rakras o Moseha.

¹⁰ Har dikan i Israelitarya koy folka pash ko voudar, vitsran pen le tele hakeno glan peskro khereskro voudar, te mangenn le o Debles an.

¹¹ O baro Devel rakras o Moseha, har mala rakran khetne, kay dikenn pen an i yaka. Palle djas o Mose pale ap i platsa, kay i menshe hi. Leskro terno boudepaskro, o Yosua, – koleskro dad hi o Noun, – ačas an o Debleskro plarhteno kheer.

O Mose kamell o Debleskro raylepen te dikell

¹² O Mose penas ap o baro Debleste: “Tou penal mange, te anap me kal menshen an o them Kanaan. Tou sikral man gar, kones tou mantsa bičreh. Tou penal, te prindjreh man oun djineh miro lab, oun te dikeh lačes ap mande.

¹³ Te dikeh lačes ap mande, mouk man tiro drom te djinell. Me kamau tout feteder te hayvell, te krap, hoy mishto hi glan tire yaka. Biste kova gar: Kol menshe hi tire menshe.”

¹⁴ O Devel penas: “Me djau glan toute oun anau tout an i them, kay tou khere hal.”

¹⁵ O Mose penas ap leste: “Te djah tou gar mentsa, palle biče men gar katar krik!

¹⁶ Tou te djah mentsa, palle hayvell hakeno, te dikeh lačes ap mande oun ap kal menshende. Yaake sikreh i tsele vavar menshende ap kay phoub, te ham kouč touke.”

¹⁷ O baro Devel penas ap o Moseste: “Ninna kava, hoy tou mandar mangal, kamau me te krell. Tou hal lačes glan mire yaka, me prindjrau tout oun djinau tiro lab.”

¹⁸ O Mose mangas: “Mouk man tiro raylepen te dikell!”

¹⁹ “Mishto”, penas o baro Devel: “Me kamau glan toute te djal, te dikess tou miro tselo lačepen. Oun miro lab Baro Devel rakrau me glan toute vin. Me hom lačo koneske, kones me kamau. Oun krau miro dji pre koneske me kamau.

²⁰ Mire yaka oun miro mouy dikess tou gar. Kek mensho, kay dikas man, ačell djido.

²¹ Tou nay ačeh pash mande kate ap i baro bar tardo.

²² Te djau me an miro raylepen glan toute, čivau me tout mank i bare barra, oun rikrau miro vast pral toute, bis te djom doureder.

²³ Palle lau miro vast pale, oun tou nay dikeh mange palla. Mire yaka oun miro mouy nay dikell kek.”