2. Mose 31 - O Debleskro Lab 2024 (Sinte-Manouche)

O baro Devel rodell i boudepangren vin, kay krenn peskro plarhteno kheer

¹ Oun o baro Devel rakras o Moseha oun penas:

² Shoun, me rodom yekes vin, te krell lo kay boudi mange. Kova hi o Bezalel. Leskro dad hi o Ouri. Koleskro dad his o Hour dran o kheer Youda.

³ Me čivom miro dourho an leste, oun dom les gosvepen oun vasta, hoy hayvenn mishto te boudrell,

⁴ te nay krell lo shoukar koova dran sonakay, roup oun lolo saster.

⁵ Ninna hayvell lo kouč barra te činell oun an goustria te čivell. Ninna nay dell lo shoukar koova vin čourye dran kasht, yaake te nay krell lo haki boudi.

⁶ Shoun, me rodom ninna i vavares vin, te djal lo leske pash o vast. Kova hi o Oholiab. Leskro dad hi o Ahisamak, dran o kheer Dan. Lentsa boudrenn hake vavar, kay hayvenn mishto lengre vastentsa te boudrell. Lenge dom me o gosvepen an o dji, te krenn le lauter yaake, har me touke penom:

⁷ O Debleskro plarhteno kheer, o morhton, kay o Debleskre deesh laba dren hi, o pralstouno kotar koy pre, hoy sikrella, kay o Devel lačo ap peskre menshende hi, ninna o tselo vavar koova, hoy an o kheer vell:

⁸ i rhapaskri oun lauter, hoy pre hi, i sonakaskri momelengri oun lauter, hoy pashel hi, o Debleskro sonakaskro bob, kay kouč soungepaskro koova pre rhačedo vella,

⁹ koy sasterni rhačepaskri, kay i firhe o Debleske rhačedo venna, oun ko tselo koova, hoy pashel hi, oun o thopaskro čaro oun koleskre herya;

¹⁰ ninna kol rashayeskre koola, hoy o Aron oun leskre čave rivenna pash pengri boudi an o Debleskro kheer;

¹¹ ninna ko makepaskro djet, hoy ap kova maklo vell, hoy o Debleske hi; oun ko kouč soungepaskro koova, hoy rhačedo vella an o Debleskro kheer. Kova lauter krenn le yaake, har me les touke penom.

Rikrenn o Debleskro dives!

¹² Oun o baro Devel rakras o Moseha oun penas:

¹³ Pen ap i tsele Israelitarya: Rikrenn o Debleskro dives t'menge! Kova sikrell t'men, kay me t'maro Devel hom, oun t'mer mire menshe han an hako tsiro. Kova hi t'menge oun t'mare čavenge oun lauterenge, kay pal t'mende venna, te dikenn t'mer, te rodom me, o baro Devel, t'men vin, te venn mire menshe.

¹⁴ Rikrenn o Debleskro dives t'menge! Koon les gar rikrella, vell temerl dino. Ava, hakeno, hoy ap o Debleskro dives boudrella, hounte djivell bouder gar mank peskre menshende.

¹⁵ Shob divessa boudress tou. O eftato dives kress tou či. Ko dives hi o baro Debleske. Kova, kay boudrella, vell moulo dino.

¹⁶ Doleske hounte rikrenn i Israelitarya o Debleskro dives hako tsiro, yon oun lengre čave oun lauter, kay pal lende venna, yaake har krom me kova lentsa vin.

¹⁷ O Debleskro dives hi i sikepen mange oun mire menshenge, i Israelitarya, hoy hako tsiro ačella. An shob divessa kras o baro Devel o bolepen oun i phoub. Oun o eftato dives kras yob či oun las nevi zoor.

¹⁸ Oun har o baro Devel kova lauter ap o Mose rakras ap i berga Sinay, das yob les i douy barra, kay o Debleskre deesh laba dren činlo hi. O Devel činas len peskro goushteha dren.