2. Mose 30 - O Debleskro Lab 2024 (Sinte-Manouche)

O sonakaskro bob

¹ Kre i bob dran o kasht ko roukestar, hoy kharella Akatsia. Koy pre vell savo koova rhačedo, hoy o Debleske shoukar soungella.

² Kre kava bob i paash metari lengsto oun ninna yaake bourhlo. Les hi star rigya, oun kote, kay yon khetne venna, vell i kotar vin oun djal pre har i shing. O tselo bob hi yek metari baro.

³ Troul o tselo bob čip lačo sonakay: pral pre oun ninna ap i star rigya oun ap i shinga. Oun čip i sonakaskro pandepen troul o bob.

⁴ Mouk star sonakangre goustria te krell. Kolla venn ap kol douy rigya o bobestar kerdo: ap haki rig douy sonakangre goustria tel ko sonakaskro pandepen, hoy djal troul o bob. An kol goustria venn lengste kashta čiddo. Kolentsa hidjrenn le o sonakaskro bob.

⁵ Kre kol kashta dran akatstikro kasht oun de sonakay trouyel.

⁶ Čip o sonakaskro bob glan o voudar dran o kouč kotar than. Pal ko voudar hi o morhton, kay o Debleskre deesh laba dren hi, oun kay o pralstouno kotar pre hi, hoy sikrella, kay o Devel peskre menshenge lačo hi.

⁷ Ap ko sonakaskro bob rhačrell o Aron ko kouč koova, hoy o Debleske shoukar soungella. Kova krell lo hako dives taysarlakro, te čorell lo o djet an i momlia,

⁸ ninna haki rat, te rhačell lo i momlia an. Oun kova vell hako dives mange kerdo. Ninna pash t'mare čavende oun lauterende, kay pal lende venna, vell kova yaake kerdo.

⁹ T'mer rhačrenn či ap kava bob, hoy o Devel t'menge gar penas, vitar kek firho oun kek rhapen dran yarro. Oun kek mool vell ap leste vin čoredo.

¹⁰ Yek kopo an o bersh lell o Aron o rat o bakrestar, hoy maredo vas, te lell lo i doosh krik, oun djal pash o Debleskro sonakaskro bob oun makell ko rat ap i shinga, hoy pral ap o bob hi. Kova krell lo, te vell i doosh krik lino, hoy ap o bob hi. Ninna pash t'mare čavende oun kolende, kay pal lende venna, vell kova hako bersh yek kopo yaake kerdo. O sonakaskro bob hi o baro Debleske kokres.

I love o Debleskro khereske

¹¹ Oun o baro Devel penas ap o Mose:

¹² Dik, har boud morsha hi mank i Israelitarya! Oun pen lenge, te hounte denn le man love, te ačenn le djido, te vell kek bibarht ap lende an kol divessa, kay venn lengre laba pre činlo.

^13-14 Hako morsh, kay hi biish bersh oun phoureder, kova dell man i paash kotar roup. Ko paash roupeno kotar hounte vell yaake pharo har kolla an o Debleskro kheer: shob gramme pharo.

¹⁵ O bravelo dell gar i bareder kotar, oun o čorvelo gar i tikneder kotar. Hako morsh dell i paash kotar roup o baro Debleske, te ačell lo djido.

O thopaskro čaro

¹⁶ Oun tou less kol love, hoy i Israelitarya tout denna, oun dess len kolende, kay ap o Debleskro plarhteno kheer boudrenna. Yaake bistrau i Israelitarya gar oun dikau lačes ap lende, te ačenn le djido.

¹⁷ Oun o baro Devel rakras ap o Moseste oun penas:

¹⁸ Kre i thopaskro čaro dran lolo saster, oun čip les ap herya, hoy ninna dran lolo saster hi. Oun čip les mashkral o Debleskro plarhteno kheer oun o Debleskri sasterni rhačepaskri. Oun čore pani dren,

¹⁹ yaake te nay thovell o Aron oun leskre čave pengre vasta oun herya,

²⁰ glan kova kay djan le an o Debleskro plarhteno kheer oun pash o Debleskri sasterni rhačepaskri, te rhačrenn le i firhes o baro Debleske.

²¹ Te thovenn le pen gar, hounte merenn le. Ko lab hi o Aroneske oun leskre čavenge oun kolenge, kay pal lende venna, hako tsireske.

O kouč makepaskro djet

²² Oun o baro Devel rakras o Moseha oun penas:

^23-24 Tou less i khoro olivtikro djet oun čivess kouč soungepaskro koova dren: shob kilo myrrhe, triin kilo cinnamome, triin kilo goudlo soungepaskro khass oun shob kilo soungepaskro kasht, hoy kharella Kassia. Yek kilo hi yaake boud har yek kilo an o Debleskro kheer hi.

²⁵ Kre kolestar i kouč djet, hoy maklo vell ap o tselo koova, hoy o Debleske hi. Mouk les yekestar khetne te krell, kay kova mishto hayvell.

²⁶ Tou makess ko djet ap o Debleskro plarhteno kheer, ap ko morhton, kay o Debleskre deesh laba dren hi,

²⁷ ninna ap i rhapaskri oun ap o tselo koova, hoy koy pre hi, ninna ap i momelengri oun lauter, hoy koy pashel hi. Ninna ap o Debleskro sonakaskro bob, kay kouč soungepaskro koova pre rhačedo vella, vell ko djet maklo,

²⁸ ninna ap o Debleskri sasterni rhačepaskri, kay i firhe o Debleske rhačedo venna, oun ap kol tsele koola, kolentsa boudrenn le. Mak ninna o thopaskro čaro, oun leskre herya, hoy les hidjrenna.

²⁹ Te makeh len yaake, sikreh tou, kay hi le o Debleske, oun leske kokres. Oun hakeno, koon taprell len an, hi o Debleskro.

³⁰ Yaake kress kova ninna o Aroneha oun leskre čaventsa. Mak len o djeteha, te venn le rashaya mange.

^31-32 Ap i Israelitarya pen: Ko djet hi o Debleskro djet. Lenn les kokres te makenn i rashaya mange. Ma makenn les ap i vavar mensheste. Oun ma krenn t'menge i djet, hoy ninna kova lauter dren hi har an kava djet. O Debleskro djet ačell lo. Rikrenn t'men ap kova hako tsiro, t'mer oun t'mare čave, hoy pal t'mende venna.

³³ Koon peske savo djet krella, nay ačell gar djido mank peskre menshende. Temerl dino vell ninna kova, kay makell yekeste, kay hi kek rashay.

Kouč soungepaskro koova

³⁴ Oun o baro Devel penas ap o Mose: Le touke ko kouč koova, hoy mishto soungella: roukengro djet, Onyx, bourrengro djet, ninna djoudjo soungepaskro koova, hoy kharella encens. Hakenestar le yaake boud har ko vavarestar!

³⁵ Oun čip kova yaake khetne, har kolla krenna, kay kova mishto hayvenna, te vell lestar i soungepaskro koova, hoy rhačedo vell o Debleske. Čip ninna loon koy pashel, te vell ko koova djoudjo. O Debleske hi lo.

³⁶ Palle kre les tiknes, yaake tiknes har djala, oun čip ninna lestar glan ko morhton, kay o Debleskre deesh laba dren hi, an o Debleskro plarhteno kheer, kote, kay vau me pash toute. Denn yak! Kava soungepaskro koova, hoy t'mer o Debleske kran, hi leske kokres!

³⁷ Ma krenn savo koova t'menge. Shounenn, mange kokres hi kova!

³⁸ Koon savo koova peske krella, te nay soungell lo o shoukar soungepen, kava nay ačell gar djido mank peskre menshende.