2. Mose 29 - O Debleskro Lab 2024 (Sinte-Manouche)

O baro Devel penell o Moseske, hoy te krenn le, te vell o Aron oun leskre čave rashaya

¹ Oun kova kre, te vell o Aron oun leskre čave rashaya mange. Le i terno gouroum oun douy morsh bakre, hoy sasto hi.

² Le ninna lačo yarro, čip kek shoutlo yarro dren, oun kre pesse oun sane mare, ninna merklia. An i merklia čip djet dren, oun ap i sane mare mak djet pre.

³ Čip len an i korba oun an len o Debleske! Ko terno gouroum oun kol douy bakre an leske ninna!

⁴ An o Arones oun leskre čaven pash o voudar glan o Debleskro plarhteno kheer, oun le pani oun thob len!

⁵ Palle le i koola oun rib o Arones an: o gad oun i baya, o rashayeskri damdira oun i bečeskri possita ninna. Pande ko pereskro pandepen, hoy ap i damdira hi, troul leste!

⁶ Palle čip o shereskro pandepen troul leskro shero! Oun čip o tikno sonakaskro kotar glan ap koleste!

⁷ Le o makepaskro djet oun čore les pral leskro shero, mak les o Debleske!

⁸ Mouk ninna leskre čave pash toute te vell! Kolenge rib ninna i gada an!

⁹ Palle čip lenge o pereskro pandepen trouyel oun čip i rashayengre stadja ap lengre shere, te venn le mange rashaya hako tsireske. Oun yaake aneh tou len an lengri boudi:

¹⁰ An ko terno gouroum glan o Debleskro plarhteno kheer. Oun o Aron oun leskre čave čivenn pengre vasta ap leskro shero.

¹¹ Oun tou mareh les pash o baro Debleskri rhačepaskri glan o Debleskro plarhteno kheer glan o voudar.

¹² Čip tiro goushto an o rat oun mak les ap i shinga, hoy pral ap o Debleskri sasterni rhačepaskri hi. Oun o tselo vavar rat čore tella glan o Debleskri rhačepaskri vin!

¹³ Le o tselo thulepen, hoy ap i bouke hi oun ko thoullo kotar, hoy pral i lebra hi, oun kol douy nire oun lengro thulepen, hoy ap lende hi! Kova lauter rhačress tou ap o Debleskri sasterni rhačepaskri, te djal lauter an i yagakro dourho pre.

¹⁴ O mass, i hauta oun ko rhapen, hoy an i bouke hi, rhačress tou vin glan koy platsa, kay t'mer djivenna. Kova lauter vell yaake kerdo, te vell i rashayengri doosh krik lino.

¹⁵ Palle le ko yek bakro! Oun o Aron oun leskre čave čivenn pengre vasta ap leskro shero.

¹⁶ Palle mare les, le leskro rat oun čore les troul o Debleskri rhačepaskri vin.

¹⁷ Čin o mass an kotya! Thob leskre bouke oun leskre herya, oun čip o shero oun kol vavar kotya ap o Debleskri rhačepaskri!

¹⁸ Oun rhače o tselo bakro ap i rhačepaskri, yaake te djal lauter pre an i yagakro dourho. Ko bakro hi mange, o baro Debleske, oun vell tseles rhačedo. Oun o lačo soungepen, hoy vell vin, soungell mange mishto.

¹⁹ Le o douyto bakro! Oun o Aron oun leskre čave čivenn pengre vasta ap leskro shero.

²⁰ Palle mare les, le leskro ratestar oun čip les tella ap o Aroneskro čačo kand, ninna ap i čače kanda leskre čavenge! Ninna ap o pesso goushto ap lengro čačo vast, oun ap o baro tsebo ap lengro čačo piro čivess tou o rat. O tselo vavar rat čoress tou troul o Debleskri rhačepaskri vin.

²¹ Le ko ratestar, hoy ap o Debleskri rhačepaskri hi, oun čip les an o makepaskro djet oun vitse les ap o Aron oun leskre koola oun ap leskre čavende oun lengre koola, te vell yob oun leskre koola o Debleske, ninna leskre čave oun lengre koola, te venn le o Debleske.

²² Kava douyto bakro vell doleske maredo, te nay vell o Aron peskre čaventsa an pengri boudi dren čiddo. Le o thulepen kay maredo bakrestar: i thoulli pori, ninna o thulepen, hoy ap i bouke hi oun ko kotar, hoy pral i lebra hi oun kol douy nire oun lengro thulepen, hoy ap lende hi! Le ninna o pralstouno kotar i čači heryatar.

²³ Palle le yek pesso maro, ninna yek sano maro oun yek djeteskri merkli dran koy korba, kay o maro dren hi, kay kek shoutlo yarro dren hi, oun hoy pash o voudar glan o baro Debleskro kheer tardo hi.

²⁴ Čip kova lauter an o Aroneskre vasta oun an i vasta leskre čavendar. Oun yon hadenn kova pre glan mande, o baro Debleste, te sikrenn le, kay kova mange hi.

²⁵ Palle le les dran lengre vasta oun rhače les pre ap o Debleskri rhačepaskri pral ko vavar bakro, hoy tou tseles rhačral, yaake te djal kava lauter ninna pre an i yagakro dourho. Oun o lačo soungepen, hoy vell vin, soungell mange, o baro Debleske, mishto.

²⁶ Le o beč kava douyto bakrestar, oun hade les pre glan o baro Debleste, te sikress, kay kova leske hi. Palle nay rhah tou les.

²⁷ Hako kopo, kay vell i morsh mange i rashay, vell o beč kava bakrestar oun o pralstouno kotar i heryatar glan o baro Debleste pre hadedo, te sikrenn le, kay kova o Debleske hi.

²⁸ Kol douy kotya mass venn pre hadedo glan mande, o baro Debleste. Palle nay rhal len o Aron peskre čaventsa. Oun yaake vell kova kerdo hako kopo, kay marenn i Israelitarya i bakres mange, hoy rhan le palle khetne glan mande.

²⁹ Oun i rashayengre koola, hoy o Aron rivas, lenn pal leste leskre čave ap ko dives, kay venn le rashaya.

³⁰ Koon leskre čavendar rashay vella, kova rivell o Aroneskre koola an ap ko dives, kay vell lo rashay. Yob hidjrell len an kol efta divessa, kay djal lo an o Debleskro plarhteno kheer, te boudrell lo o Debleske.

³¹ Ko mass ko douyto bakrestar keress tou an pani ap i Debleskri platsa.

³² Palle rhan o Aron oun leskre čave o mass o bakrestar khetne o maro dran i korba pash o voudar glan o Debleskro plarhteno kheer.

³³ Yon kokres rhan kol kotya mass ko firhestar, hoy maredo vas, te vell lengri doosh krik lino, te nay venn le o Debleskre rashaya. Kek vavar nay rhal ko mass, – kova hi o Debleskro rhapen.

³⁴ Te ačell mass oun maro pral i rati pral, hounte vell kova rhačedo. Kek nay rhal les. Kova hi o Debleskro rhapen.

³⁵ Yaake kress tou o Aroneha oun leskre čaventsa lauter, hoy me touke penom. Efta divessa kress tou yaake, te venn le rashaya.

³⁶ An kol efta divessa maress tou hako dives i terno gouroum o Debleske, te vell i doosh krik lino. Leskro rateha vell i doosh krik lino, hoy ap o Debleskri rhačepaskri vas. Palle mak djet ap o Debleskri rhačepaskri! Yaake vell diklo, te hi kay rhačepaskri o Debleske.

³⁷ Efta divessa kress tou kava hako dives, te vell i doosh ap o Debleskri rhačepaskri krik lino. Ninna makess tou koy rhačepaskri o djeteha dren, te vell li o Debleske kokres oun kek vavareske. Oun hakeno, koon taprell lat an, kova hi o Debleskro.

Hako dives venn douy bakre o Debleske maredo

³⁸ Oun kava hi, hoy tou hako dives ap o Debleskri rhačepaskri rhačress: douy terne bakre, hoy yek bersh phouro hi,

³⁹ ko yek bakro taysarlakro oun ko vavar bakro ap i rat.

⁴⁰ Le ninna i khoro lačo yarro oun yek litari olivtikro djet, oun čore o djet an o yarro, oun kre les khetne, oun čip kova pash ko bakro pashel! Oun le yek litari mool oun čore les vin glan o Debleste!

⁴¹ Kova kre taysarlakro oun rati ninna! Yaake aneh tou rhapen oun pipen o Debleske. Oun o lačo soungepen, hoy vell vin, te vell kova lauter rhačedo an i yag, soungella mishto o baro Debleske.

⁴² An o tsiro, hoy vella, krenn yaake, t'mer oun t'mare čave, hoy pal t'mende venna! Oun denn man hako dives taysarlakro oun rati i bakro! Kova rhačrenn glan mande pash o voudar glan o Debleskro plarhteno kheer! Oun kote vau pash t'mende oun rakrau touha.

⁴³ Kote vau pash i Israelitarya. Oun miro raylepen vell mantsa an ko kheer. Oun yaake vell o kheer miro kheer.

⁴⁴ Yaake lau miro plarhteno kheer oun i sasterni rhačepaskri mange, ninna o Arones oun leskre čaven, te venn le mange rashaya.

⁴⁵ Oun me djivau mashkral i Israelitarya oun hom lengro Devel.

⁴⁶ Oun yon dikenna, te hom me o baro Devel, oun lom len vin dran o them Egiptia, te djivap mashkral lende, me, lengro baro Devel.