2. Mose 28 - O Debleskro Lab 2024 (Sinte-Manouche)

I rashayengre ripya

¹ Mouk tiro phrales, o Arones, oun leskre morsh čaven glan toute te anell. Kolen rodom vin dran i vavar Israelitarya, te venn le mange rashaya: o Nadab, o Abihu, o Elazar oun o Itamar.

² Mouk tiro phraleske, o Aroneske, shoukar rayle koola te sivell, yaake har i rashayeske moldo hi.

³ Rake kolentsa, kolen me lače vasta oun o gosvepen dom, te hayvenn le mishto te sivell. Pen lenge, te krenn le ripya o Aroneske, te vell yob mange i rashay.

⁴ Kolla hi i koola, hoy te krenn le: i bečeskri possita, i rashayeskri damdira, i baya oun i gad, i shereskro pandepen, oun i layntikro pandepen, hoy yob troul peskro per pandell. Kol rashayengre koola krenn le o Aroneske oun leskre čavenge, te venn yon mange rashaya.

⁵ I sibangre hounte lenn sonakay, lačo layntikro than, ninna kouč bakrengro bal, hoy blaueto, lolo oun lolo har yag hi. Dran kova krenn le kol koola.

O rashayeskri damdira

⁶ O rashayeskri damdira krenn le an shoukar vastengri boudi dran lačo zorelo layntikro than, kay sonakay dren sido vell, ninna kouč bakrengro bal, hoy blaueto, lolo oun lolo har yag kerdo vas.

⁷ Douy kotya than venn ap i damdira sido kote, kay i phika hi. Oun i pandepen pandell i damdira troul o per khetne.

⁸ Ko pereskro pandepen vell yaake kerdo har koy damdira: dran lačo zorelo layntikro than, kay sonakay dren sido vell, ninna kouč bakrengro bal, hoy blaueto, lolo oun lolo har yag kerdo vas. I damdira oun lakro pandepen hi dran yek kotar than.

⁹ Le douy kouč barra, hoy kharenna Onyx! Oun an kolende mouk i laba o Israeleskre čavendar dren te činell:

¹⁰ Shob laba ap ko yek bar oun shob ap ko vavar bar pal lengro phourepen.

¹¹ Mouk koy boudi yekestar te krell, hoy hayvell mishto laba an bar te činell. Oun kol barra venn čiddo an sonakangre goustria.

¹² Palle kre kol douy barra ap i damdira pre, kote kay i phika hi. Yaake hidjrell o Aron i laba o Israeleskre čavendar ap peskre phika, te djal lo an o Debleskro kheer. Oun yon venn mange, o baro Debleske, an o shero, te vap lenge lačo.

¹³ Kre ninna douy vavar tikne sonakangre goustria,

¹⁴ oun pande douy dorya dran lačo sonakay ap lende, hoy hi khetne lino har i lengste balla i djouvyatar.

O bečeskri possita

¹⁵ Mouk i bečeskri possita yaake te krell, har kran le o rashayeskri damdira: dran i lačo zorelo layntikro kotar than, kay sonakay dren sido vell, ninna kouč bakrengro bal, hoy blaueto, lolo oun lolo har yag kerdo vas. An koy possita hi kol douy tikne koola dren, hoy lell o rashay, te hatsell lo vin, hoy o Devel peskre menshendar kamella.

¹⁶ I possita hi biish-te-panč centimetarya baro oun ninna yaake bourhlo. Ko layntikro kotar than vell douy kope khetne lino.

¹⁷ Kre deesh-te-douy kouč barra ap late pre, hako kopo triin barra tel i vavar: pralstounes kol barra, hoy kharenna Rubin, Topas oun Smaragdo.

¹⁸ Tel kolende kol barra, hoy kharenna Karfunkel, Safiro, oun Diamanto.

¹⁹ Tel kolende kol barra, hoy kharenna Hiazint, Agat, oun Ametist.

²⁰ Telstounes kol barra, hoy kharenna: Krisolit, Onyx oun Yaspis. Čip kol barra an sonakangre goustria.

²¹ Oun čin an lende i laba o Israeleskre čavendar, kolendar i deesh-te-douy bare familye venn. Čin an hako bar yek lab.

²² Ap i bečeskri possita kre tikne dorya dran lačo sonakay, hoy khetne lino hi har i lengste balla i djouvyatar.

²³ Kre ninna douy sonakangre goustria oun sib len serves oun čačes ap i pralstouni rig ap i possita.

²⁴ Oun čip kol douy sonakangre dorya yek rigyah an kol douy sonakangre goustria, hoy hi serves oun čačes ap i possita.

²⁵ Koy vavar rig čip an kol sonakangre goustria, hoy ap kol kotya hi, hoy glanstounes ap i damdira sido hi, kote, kay i phika hi.

²⁶ Palle kre douy sonakangre goustria oun sib len dren an i possita ap i telstouni rig, kote, kay i possita ap i damdira sido hi.

²⁷ Oun palle čip douy vavar sonakangre goustria ap kol douy kotya, hoy kote ap i damdira sido hi, kay i phika hi. Sib len ap i glanstouni rig kote, kay kol kotya khetne lino hi, pral o pereskro pandepen, hoy rikrell i damdira khetne.

²⁸ Palle čip i dori dran blaueto kouč bakrengro bal an kol douy goustria, hoy ap o bečeskri possita hi, oun pande lat yaake ap i goustria ap i damdira, te hi li zoreles rikedo pral o pereskro pandepen.

²⁹ Yaake hidjrell o Aron i laba kol deesh-te-douy Israeleskre čavendar ap peskro dji hako kopo, kay djal lo an o Debleskro kheer. Oun me bistrau len gar, te vap lenge lačo hako tsiro.

³⁰ An ko bečeskri possita čip kol douy tikne koola, hoy kharenna momeli oun čačepen, te venn le ap o dji o Aronestar, te djal o Aron dren pash mande. Kol douy tikne koola, kolentsa t'mer vin hatsenn, hoy me, o baro Devel, i Israelendar kamau, kolen hidjrell lo ap peskro dji, te vell lo glan mande.

O rashayeskri baya

³¹ Tel i damdira rivell o rashay i baya. Oun koy tseli baya kress tou dran blaueto kouč bakrengro bal.

³² Pral moukess tou lat pre, te nay vell kote o shero vin. Ko kotar troul i meen sivess tou yaake zoreles har pash i ledertikri baya, te nay djal li gar paash.

³³ Ap o telstouno kotar i bayatar kress tou tikne phabya dran kouč bakrengro bal, hoy blaueto, lolo oun lolo har yag kerdo vas. Kal phabya djan troul i tseli baya. Mank lende venn tikne sonakangre bashepangre yaake troul o tselo ripen,

³⁴ te vell yek phabi, palle yek bashepaskri, palle yek phabi, oun yaake doureder troul i tseli baya.

³⁵ Koy baya rivell o Aron an, te shounell yek les, te djal lo glan o baro Debleste an leskro kheer dren, ninna te vell lo pale vin. Kava krell lo, te merell lo gar.

Vavar rashayeskre koola

^36-37 An i tikno kotar lačo sonakay čin kol laba: “Kova hi o baro Debleske”, oun pande ko kotar sonakay ap i dori dran blaueto kouč bakrengro bal glan ap o shereskro pandepen.

³⁸ Ko tikno kotar sonakay hidjrell o Aron glan ap peskro shero, te vell lo glan mande. Kova sikrella, te lell o Aron i doosh ap peste, hoy ap ko koova hi, hoy i Israelitarya man dan. Oun me dikau lačes ap lende.

³⁹ Kre o gad dran i lačo layntikro kotar than an shoukar vastengri boudi. Kre ninna o shereskro pandepen dran lačo layntikro than, oun i pereskro pandepen an shoukar vastengri boudi.

⁴⁰ Ninna o Aroneskre čavenge kre gada, pereskre pandepangre oun rashayengre stadja, hoy raylo oun shoukar hi.

⁴¹ Palle rib o Aroneske oun leskre čavenge kol koola an. Le djet oun mak len o Debleske oun de len an lengri boudi, te venn le mange rashaya.

⁴² Mouk lenge ninna layntikre telstoune rholopya te krell. Kolla rivenn le tel i vavar koola, te venn le kote gar nanges.

⁴³ Hako kopo kay djan le an o Debleskro plarhteno kheer, ninna te rhačrenn le i firho ap o Debleskri sasterni rhačepaskri, hounte rivell o Aron oun leskre čave kol telstoune rholopya. Yaake čivenn le penge kek doosh ap pende oun hounte merenn gar. Oun kova vell yaake o Aroneske oun leskre čavenge, hoy pal leste venna, lauterenge, kay venna rashaya, o tselo tsireske.