2. Mose 27 - O Debleskro Lab 2024 (Sinte-Manouche)

O Debleskri rhačepaskri

^1-2 O Debleskri rhačepaskri kress tou dran o kasht ko roukestar, hoy kharella Akatsia. Pral i tseli rhačepaskri vell lolo saster. I rhačepaskri vell 2,50 (douy-te-paash) metari lengsto oun ninna yaake bourhlo, oun vell 1,50 (yek-te-paash) metari pral. Ap haki pralstouni ekka vell i shing vin. Kol shinga venn kerdo dran yek kotar kasht har i rhačepaskri.

³ Kre ninna kol tsele koola dran saster, kolentsa boudrenn le ap o Debleskri rhačepaskri: pirya, an kolende i yagakri čik dren vella, bare roya, čare, kay o rat dren vella, massengre forshette, yagakre čare.

⁴ Kre ninna i sasterni netsa, kay i yagakri čik tele perella. Oun čip star sasterne goustria ap lakre star rigya, kote kay i rigya khetne venna.

⁵ Čip kay sasterni netsa yaake tele an i sasterni rhačepaskri, te vell li paash pre har i rhačepaskri oun djal bis kote, kay o tikno kasht troul i rhačepaskri hi.

^6-7 Kre douy lengste kashta dran akatstikro kasht, oun de lolo saster troul lende. Kol kashta venn an i goustria ap o Debleskri rhačepaskri čiddo, yaake te nay hidjrenn le lat.

⁸ Dran činle kashta vell o Debleskri rhačepaskri kerdo – dren vell či, yaake har les toute ap i berga sikedo vas.

I glanstouni platsa

^9-10 Glan o Debleskro kheer kress tou i platsa. Troul koy platsa pandess tou layntikre kotya dran lačo zorelo than mank pesse kashta, hoy tardo hi ap lole sasterne herya. I rikepangre oun kol shelle, hoy rikrenn i layntikre kotya, kress tou dran roup. I platsa vell ap koy rig, kay o kham pralstounes hi, 50 (paash-sheel) metarya lengsto. Kote venn kol layntikre kotya ap biish pesse kashta rikedo, hoy ap biish sasterne herya tardo hi.

¹¹ Ninna koy rig, kay o kham gar vella, vell 50 (paash-sheel) metarya baro. Ninna kate rikrenn biish pesse kashta kol layntikre kotya. Yaake har ap i vavar rig venn kal pesse kashta tardo ap biish sasterne herya. Oun lengre rikepangre oun kol shelle, hoy rikrenn kol kotya, kress tou dran roup.

¹² Ap i rig, kay o kham tele djal, vell koy platsa 25 (biish-te-panč) metarya bourhlo. Kote venn i layntikre kotya ap deesh pesse kashta rikedo, hoy ap deesh sasterne herya tardo hi.

¹³ Ninna glan o kheer, ap i rig, kay o kham pre djala, vell i platsa 25 (biish-te-panč) metarya bourhlo.

^14-15 Činess pesse kashta, hoy venn serves oun čačes pash o voudar tardo: ap haki rig triin kashta ap triin herya. Mank kol kashta venn i layntikre kotya pandlo. Kolla venn ap haki rig efta-te-paash metarya lengsto.

¹⁶ Kote, kay veh ap i platsa, čip star pesse kashta ap star herya, te kress i baro voudar. An o voudar vell i bari plarhta pandlo. Koya kress an shoukar vastengri boudi dran lačo zorelo layntikro than, kay ninna kouč bakrengro bal dren hi, hoy blaueto, lolo oun lolo har yag kerdo vas. Kay plarhta vell deesh metarya bourhlo.

¹⁷ I tsele pesse kashta, hoy troul i platsa tardo hi, kolen hi herya dran lolo saster oun roupene rikepangre oun roupene shelle, hoy rikrenn kol layntikre kotya.

¹⁸ I platsa hi paash-sheel metarya lengsto oun biish-te-panč metarya bourhlo. I pesse kashta ap pengre sasterne herya hi douy-te-paash metarya baro. I layntikre kotya hi kerdo dran lačo zorelo layntikro than.

¹⁹ O tselo koova, koleha boudrenn le an o Debleskro kheer, vell kerdo dran lolo saster, ninna kol tikne kotya, hoy denn le an i phoub, te vell o plarhteno kheer oun i plarhte troul i platsa zoreles rikedo.

I momelengro djet

^20-21 Pen ap i Israelitarya, te anenn le touke o lačeder olivtikro djet, te nay rhačenn le haki rat i tikne momlia ap i momelengri an o Debleskro plarhteno kheer. Kay momelengri vell tardo vin glan ko kouč kotar than, hoy glan ko morhton pandlo hi, kay o Debleskre deesh laba dren hi. Kote dell o Aron oun leskre čave yak, te rhačell i momelengri i tseli rat an o Debleskro kheer. Kava te vell yaake kerdo hako tsireske pash i Israelitarya oun lengre čavende, kay pal lende venna.