2. Mose 26 - O Debleskro Lab 2024 (Sinte-Manouche)

I pesse plarhte ap o Debleskro kheer

¹ Ko kheer kress tou dran deesh pesse plarhte. Oun kolla venn sido dran lačo zorelo layntikro than, kay ninna kouč bakrengro bal dren hi. Kova hi blaueto, lolo oun lolo har yag. An kol plarhte venna bolepangre dren sido an shoukar vastengri boudi.

² Kre haki plarhta 14 (deesh-te-star) metarya baro oun douy metarya bourhlo.

³ Panč save plarhte venn khetne sido, oun kol vavar panč ninna.

⁴ Ap kol rigya, kay kol douy bare kotya khetne pandlo venn, kre doryengre goustria dran blaueto kouč bakrengro bal:

⁵ 50 (panč-deesh) ap hako baro kotar, yaake te vell yek doryengri goustri vergel ko vavar.

⁶ Kre panč-deesh sonakangre rikepangre! Kolla čip yaake an i doryengre goustria, te pandess kol douy bare kotya khetne.

⁷ Kre 11 (deesh-te-yek) pesse plarhte dran bouzyengre balla, te venn le pral o kheer čiddo.

⁸ Yek plarhta vell 15 (deesh-te-panč) metarya lengsto oun douy metarya bourhlo. Haki plarhta vell yaake baro har koy vavar.

⁹ Sib panč plarhte penge khetne! Oun i vavar shob sib ninna penge khetne! Oun čip koy shobti plarhta yaake ap i pančti plarhta, te venn glan ap o kheer douy plarhte yek ap o vavar.

¹⁰ Kre 50 (paash-sheel) doryengre goustria oun pande len ap kol douy bare kotya kote, kay i kotya khetne pandlo venna.

¹¹ Palle kre panč-deesh rikepangre dran lolo saster, oun čip len yaake an i doryengre goustria, te venn kol douy bare kotya khetne pandlo.

¹² Ko kotar plarhta dran bouzyengre balla hi yek metari bareder har o kheer. Doleske mouk yek metari ap i palstouni rig pral tele bladell!

¹³ Oun serves oun čačes mouk yek paash metari pral tele bladell, te vell o kheer ap kol douy rigya čakedo.

¹⁴ Palle kre i vavar kotar dran bakrengri ledertikre plarhte, hoy tou loles kral. Kova vell čiddo pral o Debleskro plarhteno kheer. Oun pral koleste vell i vavar kotar dran lače ledertikre plarhte čiddo.

O kasht o Debleskro khereske

¹⁵ Dran ko rouk, hoy kharella Akatsia, kre činle kashta, te venn le pre tardo.

¹⁶ Yek činlo kasht vell panč metarya baro oun 75 (efta-deesh-te-panč) centimetarya bourhlo.

¹⁷ Hako kashtes vell douy tikne goushte, kolentsa venn i činle kashta khetne rikedo.

¹⁸ Biish činle kashta venn pre tardo ap koy rig, kay o kham pralstounes hi.

¹⁹ Tel ko biish činle kashta čivess tou star-deesh roupene herya, kay i goushte dren čiddo venna: tel hako činlo kasht douy herya, kay douy goushte dren čiddo venna.

²⁰ Ninna ap i vavar rig, kay o kham gar vella, venn biish činle kashta pre tardo.

²¹ Tel kolende kress tou ninna star-deesh roupene herya: douy herya tel hako činlo kasht.

²² Ap i palstouni rig, koy rig, kay o kham tele djal, venn shob činle kashta pre tardo,

²³ ninna douy vavar kashta, hoy krenn serves oun čačes i ekka ap i palstouni rig.

²⁴ Kol douy kashta venn tele oun pral khetne rikedo kol činle kashtentsa ap i servi rig oun ap i čači rig, yaake te krenn le serves oun čačes i ekka.

²⁵ Yaake venn orhta činle kashta ap i palstouni rig oun deesh-te-shob roupene herya: tel hako činlo kasht douy herya.

²⁶ Kre pandepangre kashta dran o kasht ko roukestar, hoy kharella Akatsia, oun čip panč lendar ap kol činle kashta ap koy yek lengsti rig o kherestar,

²⁷ pale panč ap i činle kashta ap i vavar lengsti rig, oun pale panč ap i palstouni rig o kherestar kote, kay o kham tele djala.

²⁸ Kre ninna i pandepaskro kasht, hoy djal mashkral ap i činle kashta foun yek rig ap i vavar.

²⁹ Čip sonakay troul kol činle kashta, ninna troul i pandepangre kashta! Oun kre sonakangre goustria! An kolende venn i pandepangre kashta dren čiddo.

³⁰ Dran kol tsele kotya čivess tou ko kheer yaake pre, har sikrom touke ap i berga.

O kouč layntikro kotar, hoy hi mank kol douy iseme

³¹ Mouk ninna i kotar lačo zorelo layntikro than te krell, kay ninna kouč bakrengro bal dren hi. Kova hi blaueto, lolo oun lolo har yag. An ko kotar than venn bolepangre dren sido an shoukar vastengri boudi.

^32-33 Čin star pesse kashta dran akatstikro kasht, čip sonakay troul lende oun čip len ap star roupene herya. Čip sonakangre rikepangre pral ap lende oun pande ko kouč kotar than koy pre. Kava kouč than vell o voudar mank o Debleskri glanstouni isemaoun o Debleskri palstouni isema, hoy leskri koučeder isema hi. Palle an ko morhton, kay o Debleskre deesh laba dren hi, oun čip les pal ko voudar dran o kouč kotar than an o Debleskri palstouni isema!

³⁴ Oun ap o morhton, kay o Debleskre deesh laba dren hi, čip ko pralstouno kotar, hoy sikrella, kay o Devel peskre menshenge lačes hi.

³⁵ O Debleskri rhapaskri čip glan o voudar dran o kouč kotar than ap i servi rig! Oun i momelengri čip ap i čači rig!

³⁶ Kre ninna i plarhta, hoy vell an ko voudar, kay veh dren an o kheer. Kre lat an shoukar vastengri boudi dran lačo zorelo layntikro than, kay ninna kouč bakrengro bal dren hi, hoy blaueto, lolo oun lolo har yag kerdo vas.

³⁷ Čin panč pesse kashta dran akatstikro kasht. Čip sonakay troul lende! Oun kre lenge panč herya dran lolo saster, ninna sonakangre rikepangre! Ap lende vell koy plarhta pandlo.