2. Mose 25 - O Debleskro Lab 2024 (Sinte-Manouche)

O Debleskro plarhteno kheer

¹ Oun o baro Devel rakras o Moseha oun penas:

² Pen ap i Israelitarya: Hakeno, hoy les an o dji rhačella, te dell lo man pestar čomone, kova anell les pash t'mende.

³ Kava hi ko koova, hoy yon t'menge anenna: Sonakay, roup, oun lolo saster,

⁴ ninna kouč bakrengro bal, hoy blaueto, lolo oun lolo har yag kerdo vas, lačo layntikro than oun bouzyengre balla.

⁵ Bakreskri ledertikre plarhte, hoy lolo kerdo van, vavar lače ledertikre plarhte oun kasht i roukestar, hoy kharella Akatsia,

⁶ momelengro djet, kouč soungepaskro koova, hoy vell rhačedo, ninna kouč soungepaskro koova, hoy vell an o makepaskro djet čiddo, te nay makenn le yekes dren.

⁷ Lenn lendar ninna kol kouč barra, hoy kharenna Onyx oun vavar kouč barra, te venn le ap o rashayeskri damdira oun ap o bečeskri possita sido.

⁸ Kamau lendar, te krenn le mange i kheer, te djivap nay mashkral lende.

⁹ Yaake har me les tout kanna sikrau, yaake krenn t'mer o kheer, ninna ko tselo koova, koleha boudrenn le an miro kheer. Krenn lauter yaake, har me les tout sikrau.

O sonakaskro morhton

¹⁰ Kre i morhton dran o kasht ko roukestar, hoy kharella Akatsia, 125 (sheel-te-biish-te-panč) centimetarya lengsto, 75 (efta-deesh-te-panč) centimetarya bourhlo oun 75 (efta-deesh-te-panč) centimetarya pral.

¹¹ Pral o kasht, dren oun vin, čip lačo sonakay! Oun pral troul o tselo morhton čip i sonakaskro pandepen!

¹² Kre ninna star sonakangre goustria! Oun kre len ap o morhton, ap leskre star herya, douy ap kay yek rig oun douy ap i vavar rig!

¹³ Palle čin lengste kashta dran akatstikro kasht oun čip sonakay troul lende!

¹⁴ Kol kashta čip an kol goustria, hoy ap o morhton hi, yaake te nay hidjrenn le ko morhton trouyel.

¹⁵ Kol kashta hounte ačenn an kol goustria oun kek lell len vin.

¹⁶ An ko morhton čip kol douy barra kol deesh labentsa, hoy me tout dau.

¹⁷ Kre i pralstouno kotar dran lačo sonakay, hoy čiveh ap o morhton. Ko pralstouno kotar vell 125 (sheel-biish-te-panč) centimetarya lengsto oun 75 (efta-deesh-te-panč) centimetarya bourhlo.

^18-19 Kre ninna douy bolepangre, hakeno dran yek kotar sonakay. Oun čip ko yek glan ap o pralstouno kotar oun ko vavar palla ap o pralstouno kotar!

²⁰ Yon hadenn pengre moussya pre, yaake te čakrenn le o pralstouno kotar. Oun lengre shere dikenn pen an. Oun lengre yaka dikenn tele ap o pralstouno kotar.

²¹ Čip o pralstouno kotar pral ap o morhton. Oun an o morhton čip i douy barra kol deesh labentsa, hoy me tout dau.

²² Kote kamau pash toute te vell. Mashkral kol douy bolepangre, hoy ap o morhton hi, kay i deesh laba dren hi, kotar rakrau touha oun penau touke lauter, hoy i Israelitarya hounte krenn.

O Debleskri rhapaskri

²³ Kre ninna i rhapaskri dran o kasht ko roukestar, hoy kharella Akatsia, yek metari lengsto, yek paash metari bourhlo, oun 75 (efta-deesh-te-panč) centimetarya pral.

²⁴ Čip troul i tseli rhapaskri lačo sonakay! Oun pral troul i tseli rhapaskri čip i sonakaskro pandepen!

²⁵ Čip ninna i tikno kasht troul i rhapaskri, hoy yek vast bourhlo hi. Oun troul kava kasht vell ninna i sonakaskro pandepen.

^26-27 Kre star sonakangre goustria! Oun čip yek goustri ap haki heri tel ko kasht, hoy troul i rhapaskri djal, yaake te nay čivenn le lengste kashta dren, kolentsa nay hidjrenn le koy rhapaskri.

²⁸ Kol hidjepaskre kashta kress tou dran o kasht ko roukestar, hoy kharella Akatsia. Oun makess sonakay troul lende!

²⁹ Dran lačo sonakay kress tou ninna kol čare oun khore, an kolende i mool o Debleske čoredo vell.

³⁰ Ap i rhapaskri venn hako tsiro i Debleskre mare čiddo, te dikap len.

I momelengri

³¹ Oun tou kress i momelengri dran yek kotar lačo sonakay. Lakre tsele kotya, o piro oun o mashkralstouno kotar, ninna i čare oun i bloume, hoy koy pre hi, lauter vell kerdo dran yek kotar sonakay. Hi save bloume koy pre, hoy hi pandlo oun vavar, hoy hi pre.

³² Shob moussya djan latar vin: Triin djan ap yek rig vin, oun triin djan ap i vavar rig vin.

³³ Ap haki moussi hi triin čare, hoy dikenna vin har i bloume ko roukestar, hoy kharella mandeltikro rouk. Hi save bloume koy pre, hoy hi pandlo oun save, hoy hi pre. Yaake vell kova ap haki moussi kol shob moussyendar.

³⁴ Dran o mashkralstouno kotar venn star čare vin, hoy vin dikenna har mandeltikre bloume. Ap kolende hi bloume, hoy hi pandlo oun ninna save, hoy hi pre.

³⁵ Triin bloume, hoy pandlo hi, hi kote, kay i moussya vin venna, hako kopo yek blouma tel douy moussya.

³⁶ Koy tseli momelengri peskre moussyentsa oun bloume vell kerdo dran yek kotar lačo sonakay.

³⁷ Kre ninna efta momlia oun čip len pral ap i momelengri yaake, te dikenn le glan.

³⁸ Kre ninna čare, kay i momelengri čik dren vella, oun činepangre, kolentsa i dorya an i momlia tele činlo venna. Kolla lauter venn dran o lačo sonakay kerdo.

³⁹ Tout hounte vell 35 (triyanda-te-panč) kilogramme lačo sonakay, te kress kay momelengri peskre tsele koola.

⁴⁰ Oun tou kress lat yaake, har kova touke ap i berga sikedo vas.