2. Mose 24 - O Debleskro Lab 2024 (Sinte-Manouche)I Israelitarya venn o baro Debleskre menshe 1 Oun o baro Devel penas ap o Moseste: “Ab kate pre pash mande, tou oun o Aron, o Nadab, o Abihu oun 70 (efta-desha) i phourendar dran Israel. Kal morsha ačenn doureder krik tardo oun mangenn man kote an! 2 Tou, o Mose, ab kokres pash mande! Kolla vavar venn gar pash mande! Oun i tsele vavar Israelitarya ačenn tele glan i berga!” 3 Oun o Mose vas pash i menshende oun penas lenge hako lab, hoy o baro Devel penas, kol tsele laba, hoy penenn, hoy yob lendar kamella. Oun i tsele Israelitarya penan har dran yek mouy: “Lauter, hoy o baro Devel penas, kamah mer te krell.” 4 Koy činas o Mose hako lab, hoy o baro Devel penas, an i liil. Oun sik taysarlakro stas yob pre oun kras i rhačepaskri tele glan i berga, kote pre firhe rhačedo venna o baro Debleske. Ninna čivas lo deesh-te-douy barra pre kol deesh-te-douy bare familyenge, kay van o Israeleskre čavendar: yek bar haki familyake. 5 Oun yob bičras terne morshen vin, te marenn le firhen oun rhačrenn len o baro Debleske. Koy pashel his ninna terne gourma. Kolen maran le, te nay rhan i Israelitarya ko mass khetne glan o baro Debleste. 6 Oun o Mose las o rat oun čoras yek paash an čare. Oun o vavar paash čoras lo ap i rhačepaskri, kay i firhe rhačedo van o Debleske. 7 Oun yob las o liil, kay yob dren činas, hoy o baro Devel peskre menshendar kamella, oun draveras kava liil i menshenge glan. Oun i tsele menshe penan: “Lauter, hoy o baro Devel penas, kamah mer te krell, oun ap leste shounell.” 8 Koy las o Mose o rat oun vitsras les ap i Israelitarya oun penas: “Dikenn, kava hi o rat, hoy sikrella, te vas o baro Devel t'maro Devel, oun t'mer van leskre menshe, kay rikrenn kal tsele laba, hoy yob t'menge penas.” 9 Palle djas o Mose, o Aron, o Nadab, o Abihu oun 70 (efta-deesh) i phourendar dran Israel ap i berga pre. 10 Oun yon dikan o Israeleskro Debles. Oun tel leskre herya his čomone, hoy vi-dikas har kol kouč barra, hoy kharenna Safire. Oun kova his yaake djoudjo oun blaueto har o bolepen. 11 Ninna te dikan kol pralstoune Israelitarya o Debles, hadas lo gar peskro vast pral lende, te marell lo len. Oun pal kova rhan le oun piyan le. O baro Devel dell o Moses pash peste gole ap i berga 12 Oun o baro Devel penas ap o Moseste: “Ab pash mande ap i berga pre oun ač kote, te dap tout kol barra, kay činom mire laba dren, te sikrap mire menshende, har te djivenn le, te djinenn yon, hoy te krenn oun hoy te krenn gar.” 13 Koy djas o Mose pre ap o Debleskri berga. Leskro boudepaskro Yosua djas leha. 14 Ap i phourende penas o Mose: “Kate ačenn, bis te vau me pale! O Aron oun o Hour ačenn pash t'mende. Te hi yekes i čingepen i vavareha, nay djan le pash lende! Yon penenn palle, hoy kerdo te vell.” 15 Har o Mose ap i berga djas, čakras koy folka i tseli berga. 16 Oun o raylepen o baro Deblestar moukas pes tele ap i berga Sinay. Oun i folka čakras i berga shob divessa. Oun ap o eftato dives das o baro Devel dran koy folka ap o Moseste gole. 17 O raylepen o baro Deblestar his glan i Israelengre yaka har i bari yag, hoy pral ap koy berga rhačella. 18 O Mose djas mashkral dren an koy folka, oun djas doureder pre ap i berga, oun ačas star-deesh divessa oun star-deesh ratsya pral ap koy berga. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.