2. Mose 21 - O Debleskro Lab 2024 (Sinte-Manouche)

Ginle boudepangre hounte ačenn gar pandlo

¹ Kolla hi i laba, hoy lenge peness. Ap kolende hounte rikrenn le pen.

² Te gineh tou touke i hebretikro boudepaskro, palle boudrell lo touke shob bersha. Oun an o eftato bersh mouk les te djal! Yob hounte playsrell touke či.

³ Te vas lo kokres pash toute, djal lo ninna kokres. Te his lo romedino, lell lo ninna peskri romyat pale peha.

⁴ Te das les peskro ray i romyat, oun les hi ninna čave lah, ačell i romni oun i čave pash leskro rayeste. Yob hounte djal peske kokres.

⁵ Te penell o boudepaskro: “Me kamau miro rayes oun miri romyat oun mire čaven. Me kamau te ačap pandlo ap miro rayeste oun kamau gar te djal.”

⁶ Palle lell les leskro ray oun anell les glan o Debleste, oun čivell les glan o voudar tardo, oun dell i kashteni soub an leskro kand čourye. Kova sikrell, te ačell lo peskro tselo djipen leskro boudepaskro.

⁷ Te bikrell i morsh peskri čat, te vell li i pandli boudepaskretsa, palle hounte ačell li pandli. Oun yoy nay djal peske gar, har i pandlo boudepaskro morsh nay djal peske.

⁸ Te ginas lakro ray lat, te vell li peskri romni, oun palle kamell lo lat bouder gar, hi les gar o čačepen, te bikrell lo lat ap i vi-themari. Kova vals i ladj. Yob hounte moukell lat lakre menshenge, te ginenn yon lat pale.

⁹ Te ginas o ray lat peskro čaveske, palle hounte vell li leske har yek leskre čendar.

¹⁰ Te lell i rom peske i douyti romyat, palle hounte dell lo i glanstunate lauter yaake har glan ko tsiro: rhapen, ripya, oun yob hounte sovell lah har glan ko tsiro.

¹¹ Te rikrell lo pes gar ap kal triin koova, palle nay djal li peske oun hounte playsrell či. Oun kek hounte playsrell lake.

I phagi kolenge, kay maran yekes

¹² Kova, kay dell i menshes yaake phares, te merell lo, kova hounte merell.

¹³ Te kamas lo les gar temerl te dell, oun o Devel moukas, te vas kova yaake, palle nay nashell lo an i foro, hoy o baro Devel vi-rodas save menshenge.

¹⁴ Te das lo les čorrhanes oun an o čilačepen temerl, dell kek platsa, kay ačell lo nay djido, vitar gar, te nashell lo an o Debleskro kheer pash o Debleskri sasterni rhačepaskri. Lenn les kotar krik oun denn les temerl!

¹⁵ Kova, hoy dell peskro dades oun peskri dat, kova hounte merell.

¹⁶ Kova, kay čoras i menshes, hounte merell. Te bikras lo les, oder te hatsenn le les pash leste, kova hi yek. Yob hounte merell.

¹⁷ Ma rake bibarht vin pral tiro dadeste, vitar gar pral tiri date! Koon kova krell, hounte merell.

I phagi kolenge, kay doukran yekes

¹⁸ Te čingrenn pen morsha, oun yek dell ko vavares i barreha, oder i kashteha, yaake te hounte vell kova an o čiben čiddo, oun yob merell gar,

¹⁹ oun nay stell pale pre, oun nay djal ap i kasht vin trouyel, palle lell kova, kay das les, kek phagi. Yob hounte playsrell o tsiro, kay hounte ačas ko vavar khere oun nay djas gar ap peskri boudi. Ninna hounte playsrell lo lauter, te vell kova pale sasto.

²⁰ Te dell yek peskro boudepaskres i kashteha, yaake te merell lo, palle lell lo i phagi. Kova vell ninna yaake kerdo pash i boudepaskretsa.

²¹ Te ačell ko boudepaskro yek te douy divessa djides čiddo oun merell palle, lell leskro ray kek phagi. Kova hi leskri phagi, te nashras lo peskro boudepaskres, koleske yob love playsras.

²² Te čingrenn pen douy morsha, oun i romni, hoy an vavar koova hi, lell i dap, yaake te nashrell li peskro ternepen, oun yoy vell pale sasto, palle hounte playsrell kova, hoy das lat koy dap, love. Glan i čačepangre hounte playsrell lo yaake boud love, har lakro rom mangella.

²³ Te vas koy romni yaake doukedo, te ačell li nasselo, palle djal kova yaake: I djipen yek djipaske,

²⁴ i yak i yakeske, i dand i dandeske, i vast i vasteske, i heri i heryake,

²⁵ i rhačepaskro doukepen i rhačepaskro doukepaske, i činepen i činepaske, i dap i dapeske.

^26-27 Koon dell peskro boudepaskro i yak vin, kova hounte moukell les te djal o yakeske, hoy das lo les vin. Ninna kova, kay das peskro boudepaskro i dand vin, hounte moukell les te djal o dandeske, hoy das lo les vin. Kova vell ninna yaake kerdo pash i boudepaskretsa.

²⁸ Te dell i groumni i morshes i dap, yaake te merell lo, palle vitsrenn i groumyat i barrentsa moules! Kova vell ninna yaake kerdo, te dell i groumni i djouvyat i dap, te merell li. Kek rhal o mass koy groumyatar! Oun koleske koy groumni hi, kova lell kek phagi.

²⁹ Djinas yob, te dell koy groumni pale oun pale peskre shingentsa, oun yob pandas lat gar dren, oun yoy das pale yekes, yaake te meras lo, palle vell koy groumni i barrentsa moules vitsedo. Oun koleske i groumni hi, kova hounte merell ninna.

³⁰ Te kamenn le les gar te marell, oun čivenn le i playsepen ap leste, palle hounte playsrell lo lauter, hoy yon mangenna, koleske te nay ačell lo djido.

³¹ Ninna te das i groumni i čaves i dap, rikrenn t'men ap kal laba, ninna pash i čate!

³² Te das i groumni i boudepaskres i dap, yaake te merell lo, palle hounte dell kova, koleske koy groumni hi, 30 (triyanda) kotya roup koleste, kay nashras peskro boudepaskres. Kova vell ninna yaake kerdo pash i boudepaskretsa. Koy groumni hounte vell i barrentsa moulo vitsedo.

I phagi kolenge, kay doukran i vavareskro firhes

^33-34 Te moukas yek peskri brounna pre, oun i firho perell dren – nay vell i groumni, nay vell i bourika, – oun ko firho merella, palle hounte playsrell lo love koleske, koles ko firho his. Ko moulo firho nay rikrell lo peske. Kova hi ninna yaake, te krell lo peske i brounna an i phoub oun čakrell lat gar tele.

³⁵ Te das i groumni i vavareskri groumyat i dap, yaake te meras li, palle bikrenn le i djidi groumyat, oun hakeno lell i paash love, oun yek paash mouli groumni.

³⁶ Djinas lo, te dell leskri groumni peskre shingentsa oun pandas lat gar dren, palle dell lo i djidi groumni kolake, hoy meras. Koy mouli nay rikrell lo peske.

I phagi kolenge, kay čoran o vavareskro koova

³⁷ Te čoras yek i groumyat, oun marell lat, hounte dell lo koy yek groumyake panč vavar groumyen. Te čorell lo i bakro, oun marell les, hounte dell lo ko yek bakreske star vavar bakren pale. Kova hounte krell lo ninna yaake, te bikras lo kol čorede firhen.