2. Mose 2 - O Debleskro Lab 2024 (Sinte-Manouche)

O Mose vell boldo

¹ Koy his i morsh kol menshendar, kay venna pal o Levi. Kova las peske i romni, kay his ninna i Leviteskre menshendar.

² Yoy vas an vavar koova oun las i čavo. Har dikas yoy, kay hi o čavo sasto oun shoukar, khatras yoy les triin čon.

³ Har khatras li les nay bouder gar, kras yoy i tikni korba, makas i korba mit čomone dren, kay djal kek pani dren, oun čivas lakro ternepen koy dren, las koy korba, čivas les mank ko baro panyeskro khass pash o pani Nil.

⁴ O tikno čaveskri pheen khatras pes gar dour, te dikell yoy, hoy leha djala.

⁵ Koy vas o baro rayeskri čay oun kamas pes an ko pani Nil te thovell. Oun kol djouvya, kay lake boudran, nashan pash o pani. Ap yek kopo dikas yoy koy korba mank ko baro panyeskro khass, oun bičras lakri boudepaskretsa koy, te anell li koy korba.

⁶ Har yoy koy korba pre kras, dikas yoy i tikno čaves, hoy rovas. Kova khaytas lat oun yoy penas: “Kova hi i hebretikro čavo.”

⁷ O tikno čaveskri pheen poučas o rayeskri čatar: “Dap me i hebretikri djouvel gole, hoy dell kol ternepen o beč te piyell?”

⁸ “Ava, kre kova!” penas yoy. Koy las koy čay o ternepaskri dat.

⁹ Oun o rayeskri čay penas ap late: “Le ko ternepen oun de leste te piyell! Me playsrau tout mishto.” Yaake las i day peskro ternepen pale oun das les te piyell.

¹⁰ Har his o čavo bares doha, anas yoy les pale o rayeskri čake. Koya las ko čaves har te vals lo lakro čavo. Yoy penas: “Me tserdom les dran o pani vin.” Doleske das yoy les o lab Mose.

O Mose nashell peske

¹¹ Har his o Mose baro, vas i dives, kay djas lo pash peskre menshende. Koy dikas yob har yon phares hounte boudrenn, oun har das yek Egiptari i Hebreares.

¹² Koy dikas o Mose pes trouyel, te nay dikell les kek. Palle das yob o Egiptari moulo, oun čivas les tel i phoub.

¹³ O vavar dives djas yob pale vin. Yob dikas har čingran pen douy Hebretikre morsha. Oun yob penas ap koleste, hoy gar an o čačepen his: “Hoske deh tou i romes, kay hi tire menshendar?”

¹⁴ Kava penas: “Koon penas, te vess tou ray pral mende? Kameh tou man ninna moules te dell har ko Egiptares?” Kote las o Mose traash oun penas peske: “Har vas kova vin?”

¹⁵ Har o Farao kova shounas, kamas yob o Moses te marell. O Mose nashas an ko them Midian. Kote beshas yob pes pash i brounna.

¹⁶ O rashay an ko them Midian his efta ča. Kolla van pash i brounna, te denn le pengro dadeskre bakre oun bouzya pani te piyell.

¹⁷ Palle van bakrengre oun tradan len ap i rig. O Mose stas pre oun vas ap lengri rig, oun das lengre bakre oun bouzya pani te piyell.

¹⁸ Har van i ča khere pash pengro dadeste, o Regouel, poučas lo len: “Hoske van t'mer yaake sik pale?”

¹⁹ Koy penan yon: “Yek Egiptari vas ap mari rig, oun das mare bakre oun bouzya te piyell.”

²⁰ “Kay hi lo? Hoske moukan les vin?” poučas o Regouel peskre ča. “Anenn les, te rhal lo mentsa!”

²¹ O Regouel poučas o Mosestar, te ačell yob pash leste, oun o Mose penas: “Ava! Mishto!” O rashay das peskri čay, i Sefora, leste, te romedinerell yob lat.

²² Har yoy i morsh čavo ap i phoub anas, penas o Mose: “Me nashom an i them, hoy hi gar miro them. Doleske dau les ko lab Gershon.”

²³ Pal i rah tsiro meras o baro ray pral o them Egiptia. Fothe phares hounte boudran i Israelitarya tel dava oun dan gole, te shounas len o Devel.

²⁴ Oun yob shounas lengri gole, oun bistras gar ko lab, hoy das yob o Abraham, o Isaak, oun o Yakob, te vell lo lengro Devel oun yon peskre menshe.

²⁵ Oun o Devel dikas lačes ap i Israelitarya oun vas ap lengri rig.