2. Mose 19 - O Debleskro Lab 2024 (Sinte-Manouche)

I Israelitarya venn pash i berga Sinay

^1-2 Oun i Israelitarya djan penge dran Refidim oun van an o moulo tato them Sinay. Ap kova dives his triin čonna, har nashan le dran o them Egiptia. Oun yon ačan glan i berga.

³ Oun o Mose djas pre ap i berga pash o Debleste. Kote das o baro Devel ap leste gole: “Kava peness tou ap i Israelitarya, kol menshende, kay venna pal o Yakob:

⁴ T'mer dikan, hoy krom me halauter ap kol Egiptarya, oun har anom t'men pash mande yaake har i baro čirklo hidjrell peskre čaven ap peskro doumo.

⁵ Kanna shounenn: Te rikrenn t'mer lauter, hoy me t'menge penau, oun shounenn ap mire tsele laba, palle han t'mer mange koučeder har i tsele vavar menshe ap kay phoub. Ninna te hi i tseli phoub miro, han t'mer kokres mire menshe,

⁶ oun han vi-rodedo, te venn bare raya oun rashaya, kay hi mange koy. Kal laba peness tou ap i tsele Israelitarya.”

⁷ Koy djas o Mose pale oun das i tsele phoureden gole oun penas lenge kal laba, hoy o baro Devel leske penas.

⁸ Oun i tsele menshe penan har dran yek mouy: “Lauter kova, hoy o baro Devel penas, kova kamah te krell.” Oun o Mose penas o baro Debleske, hoy i tsele Israelitarya penan.

⁹ Kote penas o baro Devel ap o Mose: “Shoun, an i pessi folka khatemen vau me pash toute. Yaake te nay shounenn i tsele Israelitarya, hoy me touke penau, yaake te patsenn le tout hako tsireske.” Oun o Mose penas o baro Debleske, hoy i Israelitarya penan.

¹⁰ Oun o baro Devel penas ap o Mose: “Dja pash lende oun pen lenge, te krenn le pen djoudjo mange kava dives oun taysar, te thovenn le pengre koola.

¹¹ Yaake te venn le djoudjes mange koy tardo o triinto dives. Ap o triinto dives vau me, o baro Devel, glan i tsele menshende tele ap i berga Sinay.

¹² Pen lenge, har dour nay djan le, te denn le yak, te djal kek lendar ap koy berga. Kek čivell peskri heri ap i berga! Hakeno, koon kova krella, hounte merell.

¹³ Koles hounte taprell kek an. Vitsrenn les moulo i barrentsa! T'mer nay denn les ninna tele karye. Krenn kova ninna i firheske, hoy čivas peskre herya ap koy berga. Kova ačell gar djido. Te vell ko tsiro, kay shounenn, har phourdell yek ap i phourdepaskri, palle venn pre ap i berga!”

¹⁴ Koy djas o Mose i berga tele oun penas i menshenge, te krenn le pen djoudjo o Debleske. Oun hakeno thovas peskre koola.

¹⁵ Oun yob penas: “Rikrenn t'men djoudjo o triinto diveske! Oun kek morsh taprell an kava tsiro peskri romyat an!”

O baro Devel vell ap i berga tele

¹⁶ Ap o triinto dives taysarlake das o bolepen bari gole, oun yag das tele karye, oun i pessi folka his pral i tseli berga, oun i phourdepaskri das bari gole. Oun i tsele Israelitarya lan i bari traash, te trissan lengre kokale.

¹⁷ O Mose anas len pash i berga, kay o Devel hi. Oun yon ačan tardo tele glan i berga.

¹⁸ Oun troul koy tseli berga Sinay his yagakro dourho, har vas o baro Devel an i yag tele ap i berga. Oun i yagakro dourho djas pre dran i berga yaake har dran i baro bob. Oun koy tseli berga trissas zoreles.

¹⁹ Oun koy phourdepaskri das zorleder oun zorleder gole. Oun o Mose rakras o Debleha. Oun o Devel rakras pale ap leste yaake zoreles, har o bolepen gole della.

²⁰ Oun o baro Devel vas tele ap i berga Sinay, oun das o Mose pre gole. Oun kova djas pre ap i berga.

²¹ O baro Devel penas ap o Mose: “Dja tele oun pen lenge, te venn le gar doureder pre, te dikenn le man. Te venn le pre, hounte merenn boud lendar.

²² Ninna i rashaya, hoy venn glan mande, hounte krenn pen djoudjo mange, te merenn le gar!”

²³ O Mose penas ap o baro Debleste: “I menshe nay venn gar pre ap i berga. Tou penal menge, te hi kay berga touke, oun penal mange, te sikrom len, har dour nay djan le.”

²⁴ O baro Devel penas: “Dja tele! Oun ab pale kay pre! Oun an o Arones touha! Kek rashay oun kek vavar Israelitari hounte vell doureder har vas lenge penlo, te merenn le gar.”

²⁵ Yaake djas o Mose pale tele oun penas i menshenge, hoy o baro Devel penas.