2. Mose 18 - O Debleskro Lab 2024 (Sinte-Manouche)

O Yetro vell pash o Mose

¹ O rashay an o them Midian, – leskro lab his Yetro, his o Moseskri romyakro dad. Yob shounas kava lauter, hoy o baro Devel ap i tsele Israelitarya oun ap o Moseste kras, te las lo len dran o them Egiptia vin.

² Pash leste djivas o Moseskri romni, i Sefora. Kolat bičras o Mose pale pash lakro dadeste, har djas lo pash o Farao. Kanna kras pes o Yetro ap o drom, las peskri čat Sefora peha,

³ lakre douy morsh čaventsa. Ko yek kharas Gershon. Har kova boldo vas, penas o Mose: “Me vom i vi-themari an o vi-them.” Doleske kharas lo les Gershon.

⁴ Ko vavar kharas Eliyeser. Har kava boldo vas, penas o Mose: “O Devel miro dadestar vas ap miri rig. Yob las man vin dran o vast o Faraestar, kay kamas man moulo te dell.”

⁵ Kanna vas o Yetro o Moseskre čaventsa oun leskri romni an o moulo tato them pash i Debleskri berga, kay i Israelitarya beshdo hi.

⁶ Oun yob moukas o Moseske te penell: “Me, o Yetro, tiri romyakro dad, vau pash toute. Oun tiri romni oun tire čave hi pash mande.”

⁷ Kote djas o Mose vin pash leste, djas ap i čanga glan leste oun čoumras les. Oun yon poučan yek o vavarestar, har lenge djala.

⁸ Oun o Mose penas peskri romyakro dad lauter, hoy o baro Devel ap o Faraeste oun ap i tsele Egiptarya kras, har las lo i Israelitarya vin. Ninna penas lo leske, har phares his ap o drom oun har o baro Devel pale te pale ap lengri rig vas.

⁹ Kote vas o Yetro barhtelo pral ko tselo lačepen, hoy o baro Devel ap i Israelitarya kras, te las lo len dran o vast i Egiptarendar vin.

¹⁰ Oun o Yetro penas: “Me sharau o baro Debles, kay las t'men vin dran o vast i Egiptarendar oun dran o vast o Faraestar.

¹¹ Kanna hayvom, te hi o baro Devel bareder har hako vavar devel. Yob las i Israelitarya vin dran o vast i Egiptarendar, kay kran pen bares pral lende.”

¹² Oun o Yetro las i firho, hoy yob o Debleske maras oun tseles rhačras, oun ninna vavar firhe, hoy yob maras, te rhan le len khetne glan o Debleste. Oun o Aron oun i tsele phoureder dran Israel van oun rhan khetne o Moseskri romyakro dadeha kote, kay yon o Debles an-mangan.

O Mose čivell čačepangre morshen pral i Israelitarya

¹³ O vavar dives beshas pes o Mose tele, te rakrell lo o čačepen pral i Israelitarya vin. Oun o tselo dives his i menshe kote troul leste tardo.

¹⁴ Har o Moseskri romyakro dad kova dikas, hoy o Mose i tsele menshenge kras, penas yob: “Hoy hi kava, hoy tou kate kreh? Hoske hal tou kokres o čačepaskro ray kol boud menshenge? Oun i tsele menshe hounte venn pash toute tardo o tselo dives!”

¹⁵ Oun o Mose penas ap leste: “I menshe venn pash mande, te nay poučenn le o Deblestar, hoy yob lendar kamella.

¹⁶ Te hi len čingepen mashkral pende pral i koova, palle venn yon pash mande. Oun me penau lenge, hoy te krenn le, yaake har o Devel lendar kamella oun lenge penell.”

¹⁷ Kote penas leskri romyakro dad: “Kava, hoy tou kate kreh, hi gar mishto.

¹⁸ Tou mareh tout tele oun kol tsele menshen, kay troul toute hi. Kay boudi hi yaake baro, te nay krell lat kek kokres.

¹⁹ Shoun ap mande: Me kamau touke te penell, hoy te kress. Oun tiro Devel vell ninna touha. Ab tou lenge glan o Debleste oun mang lestar, hoy len hounte vell.

²⁰ Oun sike tou len, hoy o Devel kamella oun lenge penella, te djan le ap leskro drom oun krenn, hoy yob lendar kamella.

²¹ Tou, rode touke dran i tsele menshende čače morshen vin, hoy ap o Debleste shounenna, save morsha, hoy pengro lab rikrenna, oun kekes i lovenge rhorhenna! Oun kolen čip pral i Israelitarya! Kre pralstunen lendar pral i zerya, vavaren pral i sheel, oun pale pral i paash-sheel oun pral deesh.

²² Kolla venn i čačepangre morsha, kay rakrenn hako tsiro o čačepen pral i menshende vin. Pral hako tikno čingepen rakrenn yon kokres o čačepen vin. Oun o baro koova anenn le glan toute. Yaake vell touke gar yaake phares, oun yon hidjrenna touha khetne.

²³ Te kreh tou kova yaake, palle hi touke koy boudi gar yaake pharo, hoy o Devel tout das. Oun i tsele Israelitarya nay djan khere i čalo djiyeha.”

²⁴ Oun o Mose shounas ap peskri romyakro dad oun kras lauter, hoy yob leske penas.

²⁵ Yaake rodas o Mose peske čače morshen vin oun kras lendar pralstoune pral i Israelitarya: Pralstoune pral i zerya oun pralstoune pral i sheel, ninna pral i paash-sheel oun pral deesh.

²⁶ Kolla rakran pral i menshende o čačepen vin. Pral i tikno čingepen rakran yon kokres o čačepen vin. Oun o bareder koova anan le glan o Mose.

²⁷ Palle moukas o Mose peskri romyakro dad pale te djal. Oun kova djas pale pale an peskro them.