2. Mose 17 - O Debleskro Lab 2024 (Sinte-Manouche)

O baro Devel dell len pani te piyell

¹ Oun i tsele Israelitarya djan vin dran o moulo tato them, hoy kharella Sin, oun djan doureder hako kopo har o baro Devel les lenge penas. Oun yon van ap i platsa, hoy kharella Refidim. Kote his kek pani te piyell.

² Oun yon čingran ap o Moseste oun penan: “De men pani te piyell!” Oun o Mose penas: “Hoske čingrenn t'mer ap mande? Hoske patsenn gar, te hi o baro Devel pash mende oun dell men kova, hoy men hounte vals?”

³ Oun lengri troush vas yaake baro, te penan le i rholyatar ap leste: “Hoske lal tou men dran o them Egiptia vin? Kameh, te meras mer kate i troushatar, mer oun mare čave oun mare firhe?”

⁴ Kote das o Mose ap o baro Debleste gole: “Hoy krap me kal menshentsa? An i tikno tsiro vitsrenn le man i barrentsa moules.”

⁵ Oun o baro Devel penas ap leste: “Le morshen kol phourendar touha oun dja lentsa glan i Israelitarya! Le ninna ko kasht an tiro vast, hoy dal ap o pani Nil!

⁶ Oun me čivau man glan toute tardo ap o baro bar pash i berga Horeb. Oun palle dess tou ap o baro bar, oun dran leste nashella pani, yaake te vell len te piyell.” Oun o Mose kras kova yaake glan i yaka kol phourendar.

⁷ Koy platsa, kay i menshe čingran ap leste oun kay yon gar patsan, te hi o baro Devel pash lende oun dell len kova, hoy len hounte vell, koy platsa das o Mose i laba Massa oun Meriba.

I Israelitarya hi zorleder har i Amalekarya

⁸ Har i Israelitarya an Refidim his, peran i Amalekarya pral lende.

⁹ Oun o Mose penas ap o Yosua: “Rode menge morsha vin oun dja lentsa an o kourepen oun denn i Amalekarya! Taysar kamau me man ap koy berga tardo te čivell, o Debleskro kasht an miro vast.”

¹⁰ Oun o Yosua kras, hoy o Mose leske penas, oun anas i Israelitarya an o kourepen. Oun yon kouran pen kol menshentsa Amalek. Oun o Mose djas pre ap i berga. Khetne leha djan o Aron oun o Hour.

¹¹ Oun yaake djas, te hidjrell o Mose peskre moussya pre, palle his o Israel zorleder har o Amalek. Te moukell lo i moussya tele, palle his o Amalek zorleder.

¹² Har o Moseskre moussya leske phares van, lan kol douy vavar i bar, te beshell lo pes. Oun yek čivas pes čačes oun yek serves pash leste tardo, oun yon rikran leskre moussya pre. Yaake kran le bis te o kham tele djas.

¹³ Oun o Yosua das i Amalekarya temerl.

¹⁴ Palle penas o baro Devel ap o Moseste: “Čin kava pre, te bistrenn le kova gar! Oun rake les o Yosua an o dji, te bistrell lo kava kourepen gar. Oun pen leske ninna, te kamau me te marap i tsele Amalekarya yaake, te venn le hakenestar bistedo ap kay phoub.”

¹⁵ Oun o Mose kras i rhačepaskri o Debleske, te venn kote firhe rhačedo o Debleske, oun das koy rhačepaskri o lab O baro Devel krell man zoreles an o kourepen.

¹⁶ Oun o Mose penas: “Kova vas, har hadom mire vasta pre ap o baro Debleste. An ko tsiro, hoy vella, dell o baro Devel i Amalekarya pale te pale.”