2. Mose 15 - O Debleskro Lab 2024 (Sinte-Manouche)

O Moseskri gili

¹ An kova tsiro givas o Mose oun i Israelitarya kaya gili, oun yon penan: Me kamau te givap i gili o baro Debleske. Baro oun zorelo hi lo! Graya oun morsha vitsras lo an o baro pani.

² Peskri zoryah vas o baro Devel ap miri rig. Miri gilyah sharau les dran o dji. Yob las man vin. Miro Devel hi lo, oun me kamau les te sharell. Miro dadeskro Devel hi lo, oun me kamau les pre te hadell.

³ I kourepaskro hi lo. Leskro lab hi čačo: Baro Devel kharell lo.

⁴ I vourdya oun i lourden, hoy o Farao bičras, an o baro pani – mo Devel len vitsras. I zorele kourepangre, hoy ap i vourdya djan, an o Baro Lolo Pani yon lauter sik tassan.

⁵ I panya van oun len čakran; har barra djan le tele, har barra djan le tele.

⁶ Tou, mo baro Devel, har zorelo hi tiro čačo vast! Tou, baro Devel, tiro čačo vasteha dal tou kolen an kotya, kay kouran pen touha.

⁷ Raylo oun baro hal, oun khetne stakral, koon pes pral toute hadas. Tiri rholi vas har i yag pral lende. Har i yag o phouss rhačrell, yaake lendar či ačell.

⁸ Tou phourdal tiro dourho, oun o pani hadas pes bares pre, oun ačas tardo har i kheer, oun nashas gar bouder.

⁹ I Egiptarya penan: Las len palla, las len dren! Las menge, hoy lengro hi! Hakenes hi doha koy! Las mare rhare, das len temerl!

¹⁰ Tou phourdal tiro dourho, – oun o baro pani čakras len. Yon tassan oun djan tele har saster an o baro pani.

¹¹ Kek hi yaake har tou, o baro Devel. Kek hi yaake har tou mank lauterende, kay kharenn pen Devel! Tou hal o čačo Devel, oun kek vavar hi yaake zorelo har tou! Tou kral dareno koova, hoy kek vavar nay krella.

¹² Tou hadal tiri čači moussi, oun i phoub rhas kolen pre, kay hadan pen pral toute.

¹³ Tire menshenge kamlo hal, kolenge, kay tou i zoryah vin lal oun ap i lačo drom anal, hoy pash tiro Debleskro kheer djal.

¹⁴ An i vavar themma i menshe shounan, hoy tou tire menshenge kral. I daar tapras len oun yon trissan, ninna kol menshen, kay an o them Filistia djivan.

¹⁵ I bare raya an o them Edom trashan, oun kol zorele raya an o them Moab trissan. I tsele menshe an o them Kanaan daran, ava, lauteren tapras i daar.

¹⁶ I trashatar his le har bango. Tiri zoryatar van le har barra, har tou moukal tire menshen glan lende vin te djal, tire menshen, kay tou touke vin rodal, baro Devel.

¹⁷ Tou aneh len ap i berga, hoy tou touke vin rodal, kote, kay tou khere hal, te djivenn le pash toute. Koya berga hi tiro kheer, baro Devel, hoy tou touke tire vastentsa kral, te vess kote sharedo.

¹⁸ O baro Devel hi o baro ray kanna oun hako tsireske.

I Miryam givell i gili o Debleske

¹⁹ Ap ko tsiro har o Farao oun leskre graya oun vourdya oun kourepangre mashkral an o baro pani djan, moukas o baro Devel o pani pral lende pale te vell. I tsele Israelitarya djan ap i drom, hoy gar sapenes his, mashkral o baro pani ap i vavar rig.

²⁰ Oun i Miryam, o Aroneskri pheen, his i Debleskri rakepaskretsa. Oun yoy las peskri bashepaskri, hoy kharella pauka, an o vast, oun i tsele djouvya lan ninna pengre bashepangre, oun djan lake palla, oun bashran oun khelan.

²¹ Oun i Miryam givas lenge glan: Me kamau te givap i gili o baro Debleske. Baro oun zorelo hi lo! Graya oun morsha vitsras lo an o baro pani.

Shoutlo pani

²² Oun i Israelitarya moukan o Baro Lolo Pani pal pende. Oun o Mose anas len an o moulo tato them, hoy kharella Shour. Oun yon djan triin divessa trouyel an o moulo them, oun hatsan kek pani.

²³ Palle van le pash i pani. Ko pani his shoutlo, oun yon nay piyan les gar. Doleske kharan le les Mara.

²⁴ Oun i menshe van rhoyedo ap o Moseste oun penan: “Hoy piyas mer?”

²⁵ Koy das lo gole ap o baro Debleste. Oun o baro Devel sikras les i kotar kasht. Kova vitsras lo an o pani, oun o pani vas lačo. Kote das o baro Devel len laba, hoy sikrenna, hoy lo lendar kamell, oun har te djivenn le an leskro čačepen. Oun kote kamas lo ninna te dikell, te shounenn le ap leste.

²⁶ Oun yob penas: “Te shouneh tou ap mande, tiro baro Debleste, oun kreh, hoy me penau, lauter, hoy an mire yaka čačo hi, oun rikreh tout ap mire laba oun kreh, hoy me toutar kamau, palle čivau me kek nasslepen ap toute, hoy čivom ap i Egiptarya. Me hom o baro Devel, kay tout sasto krell.”

²⁷ Pal kova van le ap koy platsa, hoy kharella Elim. Oun kote his deesh-te-douy panyengre oun efta-deesh palmtikre rouka. Kote pash o pani ačan le.