2. Mose 14 - O Debleskro Lab 2024 (Sinte-Manouche)

I Egiptarya lenn i Israelitaryen palla

¹ Oun o baro Devel rakras ap o Moseste oun penas:

² “Pen, te rissrenn pen i Israelitarya, oun te djan le pash ko foro Pi-Hahirot mashkral Migdol oun o baro pani. Glan Baal-Zefon ap i vavar rig pash o baro pani ačenn!

³ O Farao patsella palle: Yon nashran pen an o moulo them oun hatsenn kek drom vin.

⁴ Palle pandau me leskro dji, te lell lo len palla. Oun me sikrau miro barepen oun miri zoor ap leste oun ap leskre tsele lourdende. Oun i Egiptarya hayvenn: Me hom o baro Devel.” Oun i Israelitarya kran yaake har o Mose lenge penas.

⁵ Har o rayeske pral o them Egiptia penlo vas, te nashan i Israelitarya penge, khaytas les oun leskre pralstunen, te moukan le len te djal. Oun yon penan: “Hoske kram mer kova, te moukam i Israelitarya te djal? Mer nashram mare boudepangren!”

⁶ Yaake moukas o Farao peskro kourepaskro vourdin te anell, oun las peskre lourden peha.

⁷ Ninna las lo peskre shob-sheel feteder vourdya peha, oun i tsele vavar vourdya, hoy an o them Egiptia hi. Ap hako vourdin his kourepangre tardo.

⁸ Oun o baro Devel pandas o Faraeskro dji, yaake te las yob i Israelitarya palla, har yon i hadede vastentsa barhteles vin djan.

⁹ Oun i Egiptarya lan len palla pengre grayentsa, vourdyentsa oun morshentsa. I tsele rayeskre lourde lan len palla, oun dikan len, har his le beshdo pash o baro pani pash ko foro Pi-Hahirot glan o foro Baal-Zefon.

¹⁰ Har i Israelitarya pre dikan, oun dikan, te lell len o Farao peskre lourdentsa palla, vas i bari traash pral lende. Oun yon dan ap o baro Debleste gole.

¹¹ Oun yon penan ap o Moseste: “Lal tou men doleske kay an o moulo tato them, te meras kate? His an o them Egiptia kek phoub, te vas mer paskedo? Hoske kral tou kova, oun lal men dran o them Egiptia vin?

¹² Penam touke gar, har hams an o them Egiptia: Mouk tele mendar! Mer kamah i Egiptarenge te boudrell. Feteder i Egiptarenge te boudrell, har kate an o moulo them te merell.”

¹³ O Mose penas ap i tsele menshende: “Ma darenn! Ačenn zoreles! Dikenn har o baro Devel t'men kava dives vin lell dran i vasta kol Egiptarendar! Kal Egiptaryen, kay t'mer kava dives dikenna, kolen dikenn t'mer bouder gar, vitar gar an ko tsiro, hoy vella.

¹⁴ O baro Devel kourell pes t'menge. T'mer hounte krenn či.”

¹⁵ Oun o baro Devel penas ap o Moseste: “Hoske deh tou ap mande gole? Pen ap i Israelitarya, te djan le doureder!

¹⁶ Tou, hade tiro kasht pre oun tiro vast pral o baro pani, te krell lo pes pre oun djal ap douy rigya. Yaake te nay djan i Israelitarya mashkral o baro pani ap i drom, hoy gar sapenes hi.

¹⁷ Me krau, te pandenn i Egiptarya pengre djia yaake, te lenn le t'menge palla. Oun me sikrau miro barepen oun miri zoor ap o Farao, ap leskre vourdya oun ap leskre kourepangre.

¹⁸ Palle dikenn i Egiptarya, te hom me o baro Devel, te sikrom me miro barepen oun miri zoor ap o Farao, ap leskre vourdya oun leskre kourepangre.”

¹⁹ Oun o Debleskro bolepaskro, kay djal glan i Israelitarya, stas pre oun djas pal lende. Oun koy bari folka glan lende hadas pes, oun čivas pes pal lende yaake,

²⁰ te vas li mashkral i Egiptarya oun i Israelitarya. Oun yoy his kali glan i Egiptarya. Pash i Israelitarya his li i momeli an i rat. Oun i tseli rat nay van i Egiptarya gar pash lende.

²¹ Oun o Mose hadas peskro vast pral o baro pani. Oun o baro Devel moukas i baro zorelo dourho pral o pani te phourdell, hoy vas kotar, kay o kham pre djal. Ko dourho phourdas i tseli rat. Oun o baro pani djas pale. Kote, kay pani his, hi kanna phoub, hoy gar sapenes hi. Oun o baro pani kras pes pre, te vas i drom.

²² Koy djan i tsele Israelitarya mashkral o baro pani ap i drom, hoy gar sapenes hi. Oun o pani his tardo ap i čači rig, ninna ap i servi rig lendar, har bare barra troul i foro tardo hi.

²³ I Egiptarya lan len palla. Oun kol tsele rayeskre graya oun kourepangre vourdya, ninna i lourde djan pal lende ap o drom mank o baro pani.

²⁴ Sik taysarlakro, har o kham gomme gar pre djas, dikas o baro Devel dran koy yagakri folka tele ap i tsele Egiptikre lourdende oun čivas i daar ap lende.

²⁵ Lengre vourdya ačan an i čik yaake te van le phares glan. Oun i Egiptarya penan: “O baro Devel kourell pes lenge oun hi ap lengri rig. Djas menge katar!”

²⁶ O baro Devel penas ap o Moseste: “Hade tiro vast pral o baro pani, te vell o pani pale oun perell ap i Egiptarya, lengre vourdya oun kourepangre.”

²⁷ Kote hadas o Mose peskro vast pral o baro pani. Oun har o kham pre djas, vas o pani pale oun peras ap kol Egiptarya, kay ap o naashepen his. Yaake tradas len o baro Devel mashkral an o baro pani.

²⁸ Oun o baro pani vas pale pale oun čakras i tsele vourdya oun kolen, kay klissan, oun i tsele rayeskre lourden, kay djan lenge mashkral o pani palla. Kolendar his kek, kay pral ačas.

²⁹ Yaake djan i Israelitarya mashkral o baro pani ap i vavar rig. Yon djan ap i drom, hoy gar sapenes hi. Oun o pani his tardo ap i čači rig, ninna ap i servi rig lendar, har bare barra, hoy troul i foro tardo hi.

³⁰ Yaake las o baro Devel i Israelitaryen ap kava dives vin dran o vast i Egiptarendar. Oun i Israelitarya dikan i moule Egiptaryen pash o baro pani čiddo.

³¹ Yaake dikan le, havi bari zoryah o baro Devel i Egiptaryen das. Oun i Israelitarya daran o baro Deblestar, oun patsan, hoy penas yob oun o Mose, koles leskro čačo vast his.