2. Mose 1 - O Debleskro Lab 2024 (Sinte-Manouche)

I Egiptarya djan zoreles ap i Israelitarya

¹ Kolla hi kol laba kol morsh čavendar, kay van o Yakobeha an o them Egiptia. Hakeno vas peskri familyah:

^2-4 o Ruben, o Simeon, o Levi, o Youda, o Issakar, o Zabulon, o Benyamin, o Dan, o Naftali, o Gad, o Asser

⁵ Khetne pengre čaventsa oun čavengre čaventsa his le 70 (efta-deesh). O Yosef his glan lende an o them Egiptia.

⁶ Pale meras o Yosef oun peskre phrala oun leskre tsele menshe, kay an ko tsiro djivan.

⁷ Lengre čave lan yaake boud čave, kay vas o them pherdo lendar.

⁸ Pal boud bersha vas i nevo baro ray an o them Egiptia. Kava djinas o Yosefestar či,

⁹ oun rakras peskre menshentsa oun penas: “Kol menshe, i Israelitarya, hi boudeder oun zorleder har mer.

¹⁰ Mer hounte hatsas i drom, te venn yon gar gomme boudeder. Te phagals i baro kourepen vin, nay dans pen yon ap i vavar rig, oun mer hounte kourams men lentsa, oun yon djans dran ko them vin.”

¹¹ I Egiptarya čivan pralstoune pral i Israelitarya. Kolla dan garda te boudran i Israelitarya phares, oun yaake rikran le len tele. Oun yon kran i forya Pitom oun Ramses, te vell kote o rhapen čiddo o baro rayeske, o Farao.

¹² Ninna te djan le zoreles ap lende, van yon boudeder oun zorleder. Oun i Egiptarya daran lendar,

¹³ oun kran, te boudrenn i Israelitarya gomme phareder.

¹⁴ Len his kek dji lenge oun kran lengro djipen phares. Oun i Israelitarya hounte rhačan barra dran čik. Ninna hounte boudran le phares ap i harhetikri phoub.

¹⁵ O baro ray pral o them Egiptia das kol douy rhačede rhalya, i Shifra oun i Poua, gole. Kolla his hebretikre djouvya. Oun yob penas ap lende:

¹⁶ “Te lenn kol hebretikre djouvya čaven, pale krenn i morsh čaven moules, kol čen moukenn te djivell!”

¹⁷ Kol douy rhačede rhalya daran o Deblestar oun shounan gar ap o baro rayeste, hoy yob penas. Yon moukan ninna kol morsh čaven te djivell.

¹⁸ Palle moukas o baro ray kol rhačede rhalya te vell oun penas: “Hoske shounan t'mer gar ap mande oun moukan kol morsh čaven te djivell?”

¹⁹ Kol rhačede rhalya penan ap o Farao: “Kol hebretikre djouvya hi gar yaake har kol egiptikre djouvya, yon hi zorleder djouvya. Glan kova, kay mer vah, hi i čave boldo.”

^20-21 I rhačede rhalya daran o Deblestar. Doleske moukas o Devel lenge mishto te djal oun das len bari barht. I Israelitarya van boud oun boudeder oun zorelo oun zorleder.

²² Kanna penas o Farao ap i Egiptarya an peskro tselo them: “Kol tsele morsh čave, hoy neves boldo van, vitsrenn an o pani Nil! Oun i čen moukenn te djivell!”