2. Korintarja 9 - O Debleskro Lab 2024 (Sinte-Manouche)

Love i patslenge

¹ Pral ko lačepen, hoy mer hounte kras i patslenge, hounte činap t'menge gar.

² Me djinau, t'mer kamenn o tselo djiyestar kol patslenge an o foro Yerusalem love khetne te čivell. Dran kova sharom t'men pash kolende an o them Macedonia oun penom: “Glan yek bersh lan kol phrala an o them Akaya love khetne.” Har yon kova shounan, kaman boud lendar yaake te krell, har t'mer kran.

³ Kanna bičrau mare phralen pash t'mende, te vell čačo, hoy t'mendar sharom an kava koova, oun te vell lauter yaake kerdo, har t'mendar penom.

⁴ Palle, ap ko dives, kay venn kolla dran o them Macedonia mantsa khetne pash t'mende, hatsenn le lauter yaake har penom. Te hatsans le kova gar yaake, havi ladj vals kova mange oun t'menge ninna!

⁵ Doleske mangom kol phralen, te djan yon glan mende, oun lenn kol love, hoy t'mer khetne čivan. Yaake hounte čivenn t'mer gar kol love sik khetne ap ko dives, kay mer vah. Oun kol love, hoy t'mer denn, vell o djiyestar, oun gar dran o boklepen.

O Devel dell men lačo koova, te das mer kova doureder

⁶ Kova hi yaake har pash i harho: Koon čivell gar boud djob an i phoub, kova lell vitar gar boud dran i phoub vin. Oun koon čivell boud an i phoub, kova lell boud dran i phoub vin.

⁷ Hakeno hounte dell yaake boud love, har leskro dji leske penella. Les hounte khaytell kova gar, hoy yob das! Yob dell kova pestar oun gar, har te kaman le les lestar. O Devel kamell kol menshen, kay denn o djiyestar.

⁸ O Devel nay dell t'men yaake boud, kay hi t'men hako tsiro doha halauterestar, yaake te nay denn t'mer i vavaren čomone.

⁹ Palle rakrenn le t'mendar, har an o Debleskro lab tardo hi: Yob das boud i čorvelende. Ko lačepen, hoy yob kras, ačella hako tsiro.

¹⁰ O Devel, kay dell o harhes i djob, ninna o maro rhapaske, kova dell t'men ninna, oun krell boudeder dran kova, hoy t'men hi, yaake te vell boud lačepen dran kova, hoy t'mer krenna.

¹¹ Yob dell t'men yaake boud, te nay denn ninna kolen, kay len či hi. Te lenn yon kova, hoy mer anah lenge, palle parkrenn pen boud menshe pash o Debleste.

¹² Kova, hoy kran t'mer i čorvele patslenge, hi lenge mishto. Oun kova hi gar lauter. Yon parkrenn pen pash o Debleste. Te parkrenn pen boud menshe pash o Debleste, hi kova ninna boud moldo.

¹³ Koleske, hoy t'mer lenge lačes kran, sharenn le o Debles. Yon dikenn, kay shounenn t'mer ap o lačo lab o Yezous Kristestar, oun kay hi yon, ninna i tsele vavar patsle, t'menge phrala oun phenya.

¹⁴ Te dikenn le, har baro o Debleskro lačepen mank t'mende hi, mangenn le o Debles t'menge oun kamenn t'mentsa khetne te vell.

¹⁵ Parkras men pash o Debleste! Yob das men peskro baro kamlepen, kay hi yaake baro, te nay rakrah les gar vin.