2. Korintarja 8 - O Debleskro Lab 2024 (Sinte-Manouche)

I patslengro bravlepen

¹ Mire phrala, mer kamah t'menge te penell, havo lačepen o Devel kote kras, kay i patsle an o them Macedonia khetne venna.

² Ninna te vas boud pharo koova ap lende, his le barhtelo an pengre djia. Lengri barht his yaake baro, te dan le boud love i vavar patslenge, ninna te djivan le an baro čorvlepen.

³ Kova hi čačo, hoy penau: Yon dan yaake boud har djala, ninna boudeder. Kova kran yon pendar o tselo djiyestar.

⁴ Yon mangan men o tselo djiyeha, te moukas mer len lačo koova te krell i patslenge an o foro Yerusalem.

⁵ Kova, hoy yon kran, his boudeder har mer patsam. Yon čivan pen an o vast o Yezousestar, maro rayestar, oun pal kova an mare vasta, yaake har o Devel kova kamas.

⁶ Har kova dikam, mangam mer maro phrales, o Tites, te djal lo pale pash t'mende, te lell lo kol love, hoy t'mer khetne čivan, yaake har yob kova ninna glan i tsiro kras. Yaake vell kay lači boudi kanna lauter kerdo.

⁷ T'mer han bravelo an hako koova: t'maro patsepen hi baro; t'mer hayvenn har te penenn o Debleskro lab oun djinenn boud pral o Debleste; t'mer krenn i bari boudi o Debleske. Oun o kamlepen, hoy ap mende dikan, vas ninna bares an t'mende. Doleske kamah, te sikrenn t'maro baro dji ninna an kava koova oun čivenn yaake boud love khetne har djala i vavar patslenge.

⁸ Kova mangau t'men. Me penau gar, te hounte krenn les. Te dikau, havo lačo koova i vavar patsle an o them Macedonia kran, yaake kamau te dikap, te vell t'maro kamlepen dran o dji.

⁹ T'mer djinenn, har lačo maro ray, o Yezous Kristo, ap t'mende his. Yob his bravelo, oun vas t'menge čorvelo. Kova vas lo, te venn t'mer bravelo.

¹⁰ Me patsau, kova hi mishto t'menge, te čivenn t'mer love pale khetne, yaake har kran kova glan yek bersh.

¹¹ Kanna krenn pale, hoy t'menge an o shero his, oun denn yaake boud love har nay denna.

¹² Te dell yek o djiyestar yaake boud har nay dell lo, dikell o Devel lačes ap leste. Yob kamell gar, te dell lo boudeder, har les hi.

¹³ T'mer hounte denn gar yaake boud, te djivenn i vavar i shoukar djipen oun t'mer bokenna. Na-a, lauteren te vell doha djipaske!

¹⁴ Kava dives hi t'men boud, oun t'mer nay denna kol vavaren čomone. I vavar kopo, kay hi kolen boudeder, nay denn yon t'men čomone. Yaake hi lauteren doha.

¹⁵ Kova hi yaake har an o Debleskro lab činlo hi: Koon boud ap i rig čivas, koles his gar boudeder, har les hounte vas rhapaske. Oun koon gar boud ap i rig čivas, koles his doha rhapaske.

Djan t'mare loventsa mishto trouyel!

¹⁶ Me parkrau man pash o Debleste, te das yob maro phrales, o Tites, i baro dji t'menge.

¹⁷ Har mangam o Titestar te djal lo pash t'mende, kamas lo kova o tselo djiyestar te krell, oun vas pestar pash t'mende.

¹⁸ Khetne leha bičram i vavar phrales. Kova hayvell mishto o lačo lab o Yezous Kristestar te penell. Dran kova hi lo an-diklo an hake gaba oun forya, kay i patsle khetne venna.

¹⁹ Oun kova hi gar lauter! I patsle rodan les vin, te djal lo mentsa khetne ap maro drom pash kol patslende, kolen mer kol love anah. Kova krah, te vell o Devel sharedo, oun te dikenn kol patsle kote maro kamlepen, hoy men lenge hi.

²⁰ Te djal ko phraal mentsa, nay rakrell kek djoungeles pral mende, har nay vals kova, te anams kol boud love kokres.

²¹ Mer dikas, te vell lauter čačes kerdo, gar kokres glan o Debleste, ninna glan i menshende.

²² Khetne kol douyentsa bičram i vavar phrales pash t'mende. Kova sikras boud kope, har mishto yob o Debleskri boudi kras. Kanna kamas lo o tselo djiyestar pash t'mende te djal. Yaake boud rikrell yob t'mendar.

²³ O Tito hi miro maal oun boudrell mantsa t'menge. Kol vavar phrala van kol patslendar bičedo, kay an vavar gaba oun forya khetne venna. Kal douy phrala hi morsha, kay krenn o Debleske kek ladj, na-a, yon boudrenn yaake, te vell o Yezous Kristo sharedo.

²⁴ Lenn len pre an o tselo kamlepen, te dikenn i tsele patsle, kay khetne venna, kay mer sharam t'men gar čičeske glan lende.