2. Korintarja 7 - O Debleskro Lab 2024 (Sinte-Manouche)

¹ Mire phrala, kol lače labentsa penas o Devel, hoy kamell lo menge te krell. Doleske moukas mer kol tselo djoungelo koova, oun kras mare djia djoudjo, te djivas lačes oun čačes glan o Debleste, yaake har yob mendar kamella.

O Paulo hi barhtelo pral i patslende

² Krenn t'mare djia menge pre! Mer kram kekes i čilačo koova oun doukram kekes, oun rhorhram kek menshes.

³ Me penau kova gar, te anap i doosh ap t'mende. Na-a, me penom t'menge, men hi i baro dji t'menge. Mer ham t'mentsa khetne an o djipen oun an o merepen.

⁴ Me patsau ap t'mende. Oun me sharau man t'mentsa. Ninna te vell boud pharo koova ap mende, hi miro dji zorelo oun man hi i bari barht an mande pral t'mende.

I patsle an o foro Korint van pale ap o čačo drom

⁵ Har vam an o them Macedonia, vas haki rigyatar pharo koova ap mende. His menshe koy, kay čingran pen mentsa. Oun men his i bari daar. Yaake lam kek nevi zoor.

⁶ Kolen bouder kek zoor hi, kolen dell o Devel nevi zoor. Oun yob das men nevi zoor an o dji, har vas o Tito pash mende.

⁷ Gar kokres, kay yob vas, kras men zorelo. Na-a, mer lam boudeder zoor, har shounam, have lače laba t'mer leske penan. Yob penas menge, te kamenn t'mer man o tselo djiyestar pale te dikell. Yob penas ninna, har t'mer rovan oun lauter krenn, te venn mange ap i rig. Har shounom kova lauter, vom gomme barhtleder.

⁸ T'menge his ropaske pral ko liil, hoy t'menge činom. Kova khaytas man. Kanna khaytell man gar, te činom o liil, ninna te his t'menge i tikno tsiro ropaske pral ko liil.

⁹ Kanna hom barhtelo, gar pral kova, kay his t'menge ropaske. Na-a, hom barhtelo, te anas t'men koy douk pral o čilačo koova pale ap o čačo drom. Har his t'menge ropaske pral t'mari doosh, dikas o Devel lačes ap t'mende. Doleske his ko liil, hoy činom, t'menge mishto.

¹⁰ Te hi yekes ropaske pral peskri doosh, oun o Devel dikell lačes ap leste, anell les kova ap o Debleskro drom, oun o Devel dell les o djipen. Oun kova khaytell kekes. Te hi yekes ropaske pral i phoubyakro koova anell les kova an o merepen.

¹¹ T'menge his ropaske pral ko koova, hoy mank t'mende djas, oun o Devel dikas lačes ap t'mende. Kanna dikenn, havo lačo koova dran kova vas: T'mer kamenn lauter mishto te krell, oun kamenn te sikrell, te hi t'men kek doosh. T'mer van rhoyedo pral koleste, kay ko koova kras. Oun t'men his daar miri rholyatar. O tselo djiyestar kaman t'mer kova te krell, hoy mishto hi an mire yaka. Doleske dan t'mer koles i phagi, kay doosh ap leste his. Yaake sikran, kay his t'men kek doosh pral ko koova.

¹² Čačepah, har činom t'menge ko liil, krom kova gar koleske, kay kras ko čilačo koova. Vitar gar činom ko liil koleske, ap koleste ko vavar o čilačo koova kras. Na-a, me činom ko liil, te sikrenn t'mer o Debleste, kay kamenn t'mer lauter te krell, hoy me t'menge penom.

¹³ Oun kova kran t'mer. Oun doleske vas nevi zoor an mare djia. Ava, mare djia van pale zoreles oun mari barht vas gomme bareder, har dikam, har barhtelo o Tito his, har vas lo t'mendar pale. T'mer lauter kran leskro dji zoreles.

¹⁴ O Tito dikas ko lačo koova, hoy leske t'mendar penom, kova his kek rhorhepen. Yaake har lauter čačo hi, hoy t'mentsa rakram, yaake hi ninna ko tselo lačepen čačo, hoy leske penom t'mendar.

¹⁵ Kanna hi leskro kamlepen gomme bareder t'menge. Yob dikas t'mari traash har t'mer les pre lan, ninna dikas lo, kay kran t'mer lauter, hoy me t'menge penom.

¹⁶ Me hom barhtelo, te krenn t'mer lauter, hoy me t'menge penom.