2. Korintarja 6 - O Debleskro Lab 2024 (Sinte-Manouche)

O Paulo rikrell vin, ninna te vell boud pharo koova ap leste

¹ Mer ham o Debleskre boudepangre. Doleske penah t'menge: Ma vitsrenn gar o Debleskro lačepen an i čik!

² O Devel penell an peskro lab: “Ap o čačo tsiro shounau tout, ap ko dives lau tout dran o čilačepen vin oun dau tout o nevo djipen.” Shounenn, kanna hi o čačo tsiro kay! Kanna lell lo t'men dran o čilačepen vin!

³ Kova hi ap miro dji, te djivas yaake, te hatsell kek i doosh ap mende, te rakrell nay kek djoungeles pral mari boudi.

⁴ Mer kamah, te dikenn le hako tsiro ap mende, kay ham o Debleskre boudepangre. Doleske dah gar pre, ninna te vell boud pharo koova ap mende. Ninna te hi men gar doha djipaske, te vell i daar ap mende, rikrah vin.

⁵ Ninna te denn le men dava, te vitsrenn le men an o stilepen, te lenn le men palla, dah mer gar pre. Mer marah men tele, oun della divessa, kay sovah gar oun rhah gar.

⁶ Maro djipen sikrella, te ham o Debleskre boudepangre. Mer djivah i djoudjo djipen oun djinah, hoy o Devel kamella. Mer vah gar khino an mare djia, ham kamlo, oun krah, hoy o Debleskro Dourho menge penella. Oun an maro kamlepen hi kek rhorhepen.

⁷ Mer penah i menshenge o Debleskro čačepen oun rakrah dran leskri zoor. Kova, hoy krah oun rakrah, hi čačo. Yaake hi maro djipen oun maro rakepen har i rharo, koleha i kourepaskro kourell pes peskro rayeske.

⁸ Hi menshe koy, kay sharenn men, oun vavar, kay praasenn men. Hi menshe, kay rakrenn djoungeles pral mende, oun vavar, kay rakrenn kamles pral mende. Ko yek penell: “Rhorhene!” ap mende, kol vavar djinenn, mer penah o čačepen.

⁹ Pash yekeste ham prindjedo, pash i vavarende ham gar prindjedo. Ninna te hi o merepen glan mare yaka, ham gomme djido. Mer lam dava oun meram gar.

¹⁰ Menge hi ropaske, oun mer nay sanah. Mer ham čorvelo, oun krah i vavaren bravelo. Men hi či ap kay phoub, oun lauter hi menge.

¹¹ Mire phrala an o foro Korint, mer penam t'menge lauter yaake, har kova hi. Mer kram mare djia dour pre t'menge.

¹² Maro kamlepen t'menge hi gar tikno. T'maro kamlepen menge vas tikno.

¹³ Me rakrau t'mentsa har i dad peskre čaventsa. Krenn t'mer ninna t'mare djia menge pre!

I patsle hi o Debleskro kheer

¹⁴ Ma čivenn t'men khetne kolentsa, kay patsenn gar ap o Yezous Kristeste. Kolla, kay djivenn an o čačepen oun kolla, kay djivenn gar an o čačepen, nay djivenn gar khetne. O dives oun i rati nay venn gar khetne. Yaake nay vell o lačepen oun o čilačepen vitar gar khetne.

¹⁵ Hoy hi o Yezous Kristes i bengeha khetne? Či! Nay venn i patslen yek dji oun yek djipen kolentsa, kay patsenn gar? Na-a!

¹⁶ An o Debleskro baro kheer vell o djido Devel kokres sharedo oun kek vavar koova. Mer halauter ham o djido Debleskro baro kheer. O Devel penas: Me kamau te djivap pash lende oun mashkral lende. Me kamau lengro Devel te vell, oun yon hi mire menshe.

¹⁷ Doleske penell o Devel: Djan kolendar krik, kay sharenn vavar koova! Ma avenn lentsa khetne! Lenn či an t'mare vasta, hoy hi pale-čiddo glan mire yaka! Palle lau t'men kamles pash mande pre.

¹⁸ Oun me kamau t'maro dad te vell, oun t'mer han mire čave oun mire ča. Kova penell o baro Devel, kay hi o ray pral o bolepen oun i phoub.