2. Korintarja 5 - O Debleskro Lab 2024 (Sinte-Manouche)

Mer ham khere pash o Debleste

¹ Mer djinah, maro djipen ap kay phoub ačell gar. Pal maro merepen lah i nevo troupo. Ko nevo troupo hi har i kheer, hoy kras o Devel oun kek mensho. Ko kheer ačell hako tsiro an o bolepen.

² Kate ap kay phoub hi menge ropaske, oun mer kamah o tselo djiyestar, te las ko nevo bolepaskro troupo ap mende.

³ Kova hi yaake, har te vals i ripen ap mende. Te lah ko nevo troupo gar ap mende, palle vams mer nango koy tardo.

⁴ Yaake rah, har djivah ap kay phoub, hi menge ropaske oun men hi douka. Mer kamah ko phouro troupo gar tele te čivell, kamah boudeder ko nevo troupo an-rivell, hoy bouder gar merella.

⁵ O Devel das men gole, te las ko nevo djipen an o bolepen, oun yob das men peskro Dourho, te djinas, kova vell yaake.

⁶ Doleske ačell maro dji zorelo. Mer djinah: Yaake rah, har djivah ap i phoub, ham gar khere pash maro rayeste, o Yezouseste.

⁷ Mer djivah dran o patsepen, oun djivah gomme gar an ko tsiro, kay dikah les.

⁸ Čačepah, maro dji hi zorelo, oun mer kamams, te moukas i phoub, te vas khere pash o Debleste.

⁹ Doleske kamah lauter te krell, te vell yob barhtelo pral mende kate ap kay phoub, oun ninna kote pash leste.

¹⁰ Ap ko dives, kay rakrell o Yezous Kristo o čačepen pral mende vin, hounte vas mer halauter glan leste tardo. Oun hakeno lell pal kova, hoy yob kras, har djivas lo ap i phoub: lačo koova har čilačo koova.

O Debleskro kamlepen vas an maro djipen

¹¹ Mer djinah, har trashas maro rayestar. Doleske rakrah i menshenge an o dji, te patsenn le ap leste. O Devel djinell, te djah mer o čačo drom. Kamoms, te djinenn an t'mare djia kova ninna.

¹² Kova penah gar, te sharas mer men pash t'mende. Na-a, kova penah, te nay sharenn t'men mentsa. Yaake djinenn t'mer, hoy te penenn nay kol menshenge, kay dikenn ap kova, hoy pash i menshende boud moldo hi. I djoudjo dji hi lenge či moldo.

¹³ Te penell yek, mer ham narvelo, – mishto! Te ham narvelo, ham kova o Debleske. Te ham gar narvelo oun rakrah yaake, te hayvenn le men, palle hi kova mishto t'menge.

¹⁴ O baro kamlepen, hoy o Yezous Kristo men das, bičrell men pash i menshende. Oun mer djinah, te meras yek menge, hi kova yaake, har te merans le lauter.

¹⁵ O Yezous meras halauterenge. Oun kanna hounte djivenn kolla, kay lan leskro djipen, bouder gar penge kokres. Na-a, yon hounte djivenn koleske, kay meras lenge, oun vas o Deblestar djido kerdo.

¹⁶ Doleske dikah kanna bouder gar yaake ap i mensheste har an o tsiro, har hams gomme gar patslo. Ninna prindjrah mer o Yezous Kristes kanna vavarčandes har an ko tsiro, har djivas lo ap i phoub.

¹⁷ Kanna djinah: Koon o Yezous Kristeha djivella, kova hi i nevo mensho, oun djivell bouder gar peskro phouro djipen. I nevo koova vas an leskro djipen.

¹⁸ Kova lauter vell o Deblestar. Yob bičras o Yezous Kristes menge an o merepen, te lell lo kova krik, hoy his tardo mank mende oun o Debleste, te nay vas mer kanna pash leste. Oun mende das lo koy boudi, te penas i menshenge, te nay venn le pash leste.

¹⁹ O Devel his an peskro čaveste, o Yezous Kristeste, oun kras, te nay venn i menshe leha khetne. Lengri doosh las lo lendar krik. Yaake vas kova krik lino, hoy his mank lende oun o Debleste tardo. Mende das lo kay boudi, te penas kal lače laba i menshenge.

²⁰ Yaake ham mer o Debleskre bičepangre. Men hi o Yezous Kristeskro čačo vast. Doleske mangah i menshendar, te venn le pash leste. Oun kova hi yaake, har te dell len o Yezous Kristo gole: “Avenn pash o Debleste! Avenn leskre mala!”

²¹ O Devel čivas mari tseli doosh ap maro rayeste, o Yezous Kristeste, kay yob kek čilačepen kras, te vas mer čačo oun erligo glan o Debleskre yaka.