2. Korintarja 4 - O Debleskro Lab 2024 (Sinte-Manouche)

O lačo lab o Yezous Kristestar hi maro baro bravlepen

¹ O Debles hi i baro dji menge, oun das men kay boudi, te sikras i menshende leskro drom. Doleske vah gar khino, te kras kova.

² Djungelo koova, hoy krenn i menshe čorrhanes, kova krah mer gar. Mer rhorhah kek menshen oun penah o Debleskro lab yaake har činlo hi, oun gar vavarčandes. Yaake djivah glan o Debleste oun rakrah o čačepen, te hayvell nay hakeno, kova, hoy penah, hi čačo.

³ Hi menshe koy, kay hayvenn gar, har lačo ko lab o Yezous Kristestar hi, hoy mer penah. Yon hi kolla, kay djan nashedo.

⁴ Yon patsenn gar ap leste. O beng, kay o ray hi pral kay phoub, kras len korelo, te dikenn le gar, havo lačepen vell dran o lačo lab o Yezous Kristestar. Ko lab sikrell men o Yezouseskro raylepen. Oun yob hi yaake har o Devel.

⁵ Lestar rakrah mer, oun gar mendar. Mer penah i menshenge, o Yezous Kristo hi o ray. Oun mer ham leskre boudepangre oun boudrah t'menge.

⁶ An o phouro tsiro, kay his halauter kali rat, penas o Devel, te vell dives. Oun koy vas dives. Yaake kras lo ninna mare djia pre, te ačas gar tamlo an mare djia, te hayvas mer o Debleskro raylepen. Kova dikah, te dikah ap o Yezous Kristeste.

⁷ O lačo lab o Yezous Kristestar hi i baro bravlepen, hoy mer hidjrah an mende. Mer kokres ham har čare, hoy či moldo hi, yaake te dikell hakeno, koy bari zoor vell o Deblestar, oun gar mendar.

⁸ Ninna te vell haki rigyatar pharo koova ap mende, krell men kova gar paash. Ninna te djinah boud kope gar, hoy te kras, dah mer gar pre.

⁹ Ninna te lenn le men palla, hi o Devel pash mende. Ninna te vitsrenn le men tele, stah pale pre.

¹⁰ Yaake har o Yezous hounte meras, merella ninna hako tsiro i kotar mendar. Kova hi yaake, te vell ninna leskro djipen ap mende diklo.

¹¹ Hako tsiro ham mer glan o merepen tardo. Te merah, merah o Yezouseske, te vell ninna o djipen diklo, hoy o Yezous men della, ninna te meras.

¹² Yaake hi o merepen an mende, oun o djipen an t'mende.

¹³ Mer patsah ap o Yezous Kristeste. Doleske rakrah lestar. Yaake krah mer har ko morsh, kay činas an o Debleskre gilya: Me patsom o Debles. Doleske rakrom lestar.

¹⁴ Mer djinah, kova, kay kras o Yezouses, maro rayes, i moulendar djido, kova krell men ninna i moulendar djido. Oun yob anell men khetne t'mentsa glan peste.

¹⁵ Kova lauter, hoy lah ap mende, krah t'menge. Mer kamah, te vell o Debleskro kamlepen pash boud menshende prindjedo, te parkrenn pen boud oun boudeder pash leste, oun sharenn les.

¹⁶ Doleske vah mer gar khino, ninna te moukell men mari zoor. Ko djipen, hoy o Devel an mende das, vell hako dives pale neves.

¹⁷ Ko pharo koova, hoy mer kanna hidjrah, hi tikno oun djal peske. Pal kova vell i baro raylepen. Kova hi shoukeder har halauter, hoy kanna djinah, oun djal peske gar.

¹⁸ Kava raylepen hi menge. Mer dikah gar ap kova, hoy i menshe nay dikenna. Na-a, mer dikah ap kova, hoy kanna kek nay dikella. Kova, hoy yon kanna dikenna, hi yek kopo bouder gar koy. Kova, hoy yon gar dikenna, kova ačella hako tsireske.