2. Korintarja 2 - O Debleskro Lab 2024 (Sinte-Manouche)

¹ Kamom gar, te vell t'menge ropaske. Doleske vom bouder gar pash t'mende.

² Me te krau, te vell t'menge ropaske, palle hi mange kek koy, kay krell man pale barhtelo.

³ Doleske činom t'menge ko liil. Kamom gar, te rovap pral kolende, kay man barhteles hounte krans. Oun me patsau zoreles, te han t'mer barhtele pral kova, te nay krenna t'mer man barhtelo.

⁴ Doleske činom t'menge ko liil boud ropah oun traash an miro dji. Kamom gar, te doukrap t'men. Na-a, me kamom, te dikenn t'mer, kay kamau t'men o tselo djiyestar.

Avenn pale lačes kolenge, kolen t'mer i phagi dan!

⁵ T'mer djinenn, pash t'mende hi yek, kay doukras t'men an o dji. Yob doukras gar man. Na-a, yob doukras boud t'mendar. Me nay penau gar, te doukras yob t'men halauteren.

⁶ T'mer dan les i phagi. Oun kova hi doha.

⁷ Kanna hounte bistrenn ko koova, hoy yob kras. Rakrenn lačes leha, te vell leske gar bouder ropaske.

⁸ Me mangau t'men: Sikrenn leste, te kamenn les!

⁹ Ko liil činom t'menge ninna, te dikap, har shounenn ap mande an hako koova.

¹⁰ Te bistrenn t'mer o čilačepen, hoy o vavar ap t'mende kras, palle bistrau me kova ninna. Ava, te dals čomone, hoy hounte bistroms me, palle bistrom me kova t'menge. Kova djinell o Yezous Kristo.

¹¹ Me kamau gar te taprell men o beng. Mer djinah mishto, hoy koles hi an leskro shero.

¹² Har vom me an o foro Troas, te penap kote o lačo lab o Yezous Kristestar, kras o Devel i menshengre djia pre.

¹³ Miro phraal, o Tito, kamas ninna an kava foro te vell. Har vas lo gar, vas man i daar, oun me penom lenge: “Ačenn mo Debleha!” oun djom mange an o them Macedonia.

O lačo lab o Yezousestar hi yaake har i shoukar soungepen

¹⁴ Me parkrau man pash o Debleste, te dell lo men i zoor, te djas ap o Yezouseskro drom. Khetne o Yezouseha ham hako tsiro zorleder har o čilačepen. Oun kote, kay penah i menshenge o lačo lab o Yezousestar, hi kova yaake, har te vell i lačo soungepen pash boud menshende.

¹⁵ Te rakrah o lačo lab o Yezous Kristestar, hi o Devel barhtelo pral kova. Kova hi leske har i shoukar soungepen, hoy djal pash kolende, kay lenn o Debleskro djipen oun ninna pash kolende, kay djan nashedo.

¹⁶ Kolenge, kay djan nashedo, hi kova har i djoungeli khand, hoy anell len an o merepen. Kolenge, kay lenn o Debleskro djipen, hi kova i lačo soungepen, hoy anell len an o djipen. Kaya hi i bari boudi. Koon nay krell kova lauter mishto? Kek.

¹⁷ Boud rakepangre penenn o Debleskro lab, te lenn le i menshenge love lendar tele. Yaake ham mer gar. Mer penah o Debleskro lab čičeske. Kova krah o Yezous Kristeske. Mare laba venna o Deblestar. Oun yob shounell, hoy rakrah.