2. Korintarja 13 - O Debleskro Lab 2024 (Sinte-Manouche)

Dikenn ap t'mende, har t'mer an o patsepen tardo han!

¹ Kova hi o triinto kopo, kay vau pash t'mende. Ma bistrenn, hoy činlo hi: Te kamell yek i doosh ap i vavareste pre te čivell, hounte venn douy, triin koy pashel, kay penenn vin, hoy yon djinenna.

² Te vau kava kopo, rikrau man gar pale, te dap kolen i phagi, kay kran čilačo koova. Kova penom, har homs o douyto kopo pash t'mende, oun kanna, kay hom dour t'mendar krik, penau les pale t'menge.

³ Palle dikenn t'mer mishto, te vas miro rakepen o Yezous Kristestar. Yob hi zorelo pash t'mende, oun sikrell t'men peskri bari zoor.

⁴ Har yob ap o troushel dino vas, his yob gar zorelo. Kanna djivell yob dran o Debleskri zoor. Yaake har o Yezous Kristo ap o troushel gar zorelo his, ham mer vitar gar zorelo. Oun yaake har yob djido vas, ham mer leha ninna djido oun zorelo dran o Debleskri zoor. Kova nay dikenn, te hom pash t'mende!

⁵ Dikenn ap t'mende, har t'mer an o patsepen tardo han! Hi t'maro patsepen čačo? Djivell o Yezous Kristo mank t'mende? Te hayvenn t'mer gar, te hi lo mank t'mende, palle hi t'maro patsepen či moldo.

⁶ Me kamoms, te dikenn t'mer, kay mari boudi o Debleske mishto hi.

⁷ Mer mangah o Deblestar, te krenn t'mer kek čilačo koova. Kova mangah lestar gar, te sikras, har mishto mari boudi kram. Na-a, mer kamah, te krenn t'mer o lačepen, ninna te vell mendar penlo, kay mari boudi či moldo hi.

⁸ Mer nay krah kokres savo koova, hoy krell, te shounenn le o Debleskro čačepen oun dikenn les. Oun mer nay krah či, hoy rikrell o čačepen pale.

⁹ Ninna te ham mer gar zorelo, ham barhtelo, te han t'mer zorelo. Mer kamah, te venn t'mer an o čačepen glan o Debleste tardo, oun kova mangah lestar.

¹⁰ Kava činau me t'menge kanna, kay hom dour krik t'mendar. Te vau pash t'mende, kamau gar te čingrell t'mentsa i zoryah, hoy das man maro ray Yezous. Kay zoor das lo man, te krap t'men zoreles, gar te krap t'men paash.

¹¹ Kanna, mire phrala, avenn barhteles, oun avenn pale pale ap o čačo drom! Shounenn ap kol laba, hoy me t'menge penom. Rikrenn khetne oun čingrenn t'men gar! Oun o Devel, kay dell kamlepen oun barht an o dji, vell t'mentsa!

¹² Taprenn t'men trouyel, oun denn t'men i čoum! Kova sikrella hakeneste, t'mer han phrala oun phenya an o patsepen. I tsele patsle penenn t'menge. “Ačenn maro Debleha!”

¹³ O lačepen maro rayestar, o Yezous Kristestar, djal t'mentsa! Oun o Debleskro kamlepen vell an t'mende! Oun o Debleskro Dourho ačell pash t'mende!