2. Korintarja 11 - O Debleskro Lab 2024 (Sinte-Manouche)

I rhorhene rakepangre

¹ Moukenn man yek kopo yaake te rakrap, har te voms dinelo! Shounenn, hoy kamau t'menge te penell!

² Yaake har o Devel kamell, kamau me ninna o tselo djiyestar, te djan t'mer gar o Yezous Kristestar krik. T'mer han mange har i čay, kay dom yek morsheste, te vell li leskri pirni. Ko yek morsh hi o Yezous Kristo. Kamau te anap leske i djoudji terni djouvel ap ko dives, kay romedinerell lo lat.

³ Me darau, te vas vavar koova an t'maro shero, oun t'mer djivenn bouder gar djoudjes oun kokres o Yezous Kristeske. Me darau, te djas t'menge har i Evake, har o gosevo sap rhorhras lat, oun yoy moukas o čačo drom.

⁴ Hi yaake: Te vell yek pash t'mende oun sikrell t'men i vavar drom, har ko drom, hoy mer t'mende sikram, palle nashenn t'mer leske palla. Te rakrell lo pral i vavar Yezous oun i vavar Debleskro Dourho, har kova, hoy an t'mende vas, palle shounenn t'mer mishto ap ko rhorheno morsheste.

⁵ Me djinau, me molau ninna yaake boud har kol bare rakepangre pash t'mende, kay penenn, te hi le bičedo o Yezous Kristestar.

⁶ Ninna te nay rakrau gar yaake mishto har kol vavar, djinau ninna yaake boud har yon. Kova nay dikan t'mer hako kopo, kay rakrom, oun an hako koova, hoy krom.

⁷ Krom me man baro, har lom kek love t'mendar, har penom t'menge o Debleskro lačo lab? Lom me doleske i doosh ap mande? Na-a, me krom t'men baro.

⁸ Kote, kay vavar patsle khetne venna, lom love lendar oun djivom dran lengri possita, te nay boudrom pash t'mende.

⁹ Har me pash t'mende homs, oun mange his gar doha djipaske, mangom kekestar t'mendar čomone. I patsle phrala, kay van dran o them Macedonia, anan mange yaake boud, te nay djivom pash t'mende. Yaake perom kekeske t'mendar ap i possita. Oun yaake kamau kova ninna te krell an ko tsiro, hoy vella.

¹⁰ An kava koova sharenn man i menshe. Oun pash o Yezous Kristeskro čačepen, hoy an mande hi, penau t'menge: Kek mensho an ko tselo them Akaya lell kava sharepen mandar krik!

¹¹ Hoske penau me kova yaake? Hi man kek kamlepen t'menge? O Devel djinella, kay kamau t'men o djiyestar.

¹² Te lau či t'mendar an ko tsiro hoy vella, palle doleske, te vap gar har kolla, kay lenn t'mendar love. Kamau gar, te nay sharenn le pen oun penenn, yon hi yaake har mer.

¹³ Čačepah, yon van gar o Yezous Kristestar bičedo. Yon hi rhorhene, oun krenn, har te bičrals len o Yezous Kristo.

¹⁴ Pral kolende hounte krenn t'mer kek bare yaka. Ninna o beng krell yaake, har te vals lo o Debleskro bolepaskro.

¹⁵ Doleske hounte kras mer kek bare yaka, te krenn ninna leskre boudepangre har te vans yon o Debleskre boudepangre. Yon len pengri phagi o Deblestar.

O Pauleskre douka oun leskro pharo djipen

¹⁶ Me penau pale: Kamau gar, te penell yek, me hom dinelo. Oun ninna te patsenn t'mer, te hom dinelo, palle mangau t'men: Lenn man pre har i dineles, te sharap man me nay ninna i tikno kotar!

¹⁷ Me te sharau man kanna, palle venn mire laba gar maro rayestar, o Yezousestar. Na-a, me rakrau kanna yaake, har te voms me dinelo.

¹⁸ Boud menshe hi koy, kay sharenn pen pral kova, hoy yon krenna. Doleske kamau me kova kanna ninna te krell.

¹⁹ T'mer patsenn, te han gosevo, oun nashenn hako dineleske palla!

²⁰ Te hadell pes yek pral t'mende, krenn t'mer, hoy yob penell. Te kamell yob t'mare love te lell, oun kamell t'men ap peste te pandell, oun ninna yob te doukrell t'men, oun dell t'men an o mouy, moukenn t'mer kova t'mentsa te krell.

²¹ Me ladjau man te penap: Kova nay anoms me gar pral o dji! Kanna rakrau čačepah har i dinelo: Te patsell yek, te nay krell lo pes baro, palle nay krau man me ninna baro.

²² Yon hi Hebrearya. Me hom ninna yek. Yon hi bibolde. Me hom ninna yek. Yon venna pal o Abraham. Me ninna.

²³ Yon penenn, te hi le o Yezous Kristeskre boudepangre. Kanna rakrau har i dinelo: Me hom boudeder har yon leskro boudepaskro. Me boudrom boudeder. Me vom boudeder stildo. Me lom boudeder dava. Man his boudeder o merepen glan i yaka har yon.

²⁴ I biboldendar lom me panč kope triyanda-te-enya (39) dava i čoupniyah.

²⁵ Triin kope lom dava i kashteha. Yek kopo vitsran le barrentsa ap mande, te denn le man moulo. Triin kope djas o shiffo tele, ap hoy me homs, oun yek dives oun yek rati homs ap i kasht čiddo an o baro pani.

²⁶ Ap miro drom an boud vavar forya oun themma his boud kope o merepen glan mire yaka. Me nay tassoms an i divye panya, oun kol čorepangre nay dans man moulo. Oun i bibolde, oun ninna kolla, kay kek bibolde hi, kolla lan man palla. An o moulo them oun an o baro pani, kay homs, his o merepen glan mire yaka, oun ninna, har homs mank kol phralende, kay hi kek čače phrala.

²⁷ Me marom man tele oun man his boud boudi. Boud kope sovom gar. Man his troush oun bok. Boud kope rhom či. Mange his shila oun man his či an-ripaske.

²⁸ Me nay penoms gomme boudeder: Hako dives vell nevo koova ap mande. Oun miro dji doukella, te djinau gar, har kova kote hi, kay i patsle khetne venna.

²⁹ Te hi yek gar zorelo, hom me vitar gar zorelo. Te perell yek o Debleskro dromestar tele, hi man bari douk an o dji.

³⁰ Me te sharap man, palle kamau te sharap man koleha, te hom gar zorelo.

³¹ O Devel, ko dad o Yezousestar, maro rayestar, djinella, kay penau o čačepen. Les sharas mer hako tsiro.

³² An ko tsiro, har me an o foro Damaskus homs, his kote i moskro, koles čivas o baro ray Aretas an peskri boudi. Ko moskro čivas klisten glan ko foro pash kol bare voudya, te taprenn le man.

³³ Troul o foro his i bari massouri. Oun i patsle čivan man an i korba oun moukan man dran i vorhni vin, hoy an koy massouri dren hi, tele ap i phoub. Yaake nay tapran yon man gar.