1. Timoteo 2 - O Debleskro Lab 2024 (Sinte-Manouche)

Har te mangas o Debles an

¹ Me penau t'menge kanna, hoy hounte krenn oun gar moukenn: Mangenn o Debles i tsele menshenge! Penenn leske lauter, hoy ap t'maro dji hi! Parkrenn t'men pash o Debleste lautereske, hoy yob das!

² Mangenn lestar, te dell lo i rayen oun i pralstunen o gosvepen, te krenn le pengri boudi mishto, yaake te djivas nay an o lačepen, te djas mer o Debleskro drom, te nay rakrenn i menshe gar djoungeles pral mende!

³ Kova kamell maro Devel, kay das men o nevo djipen.

⁴ Yob kamella, te venn i tsele menshe ap leskro drom, oun te hayvenn le leskro čačepen.

⁵ Hi yek Devel i tsele menshenge. Oun hi yek rakepaskro, kay anell o Debles oun i menshen khetne. Kova hi ko mensho Yezous Kristo.

⁶ Yob das peskro djipen i tsele menshenge. Yaake sikras o Devel an o čačo tsiro, kay kamell lo, te vell hako mensho vin lino dran o čilačepen oun o merepen.

⁷ Doleske bičras man o Devel pash kolende, kay kek bibolde hi, te penap lenge o lačo lab o Yezous Kristestar, oun te sikrap lende o čačo patsepen. Man hi o Yezouseskro vast. Kova hi o čačepen. Me rhorhau gar.

Morsha oun djouvya

⁸ Yaake kamau me, te mangenn i morsha o Debles an, kote, kay i patsle khetne venna. Kal morsha hounte djivenn pengro djipen yaake, har o Devel kamella. Te hadenn le pengre vasta pre, te mangenn le o Debles an, palle hounte denn le yak, te vell kek rholi oun kek čingepen an lengre djia.

⁹ Ninna kamau, te rivell i djouvel kek vi-ladjede ripya. Te rivell li pes gar yaake, te dikell hakeno ap late. Lakro shoukapen te vell gar diklo an kova, har yoy peskre balla hidjrella, vitar gar an o sonakay oun vavar kouč koova, vitar gar an kouč ripya.

¹⁰ Lakro shoukapen sikrell pes an ko lačo koova, hoy yoy krella. Yaake hi kova pash kol djouvyende, kay ap o Debleste patsenna.

¹¹ Te vell o Debleskro lab i patslenge penlo, hounte shounenn i djouvya ap kova, hoy penlo vella. Yon hounte rakrenn gar peha.

¹² Me kamau gar, te penell i djouvel o Debleskro lab glan i morshende, vitar gar, te vell lat penepaske pral o morsheste. I djouvya rikrenn pen pale.

¹³ Hoske penau kova? Doleske: O Adam vas glan i Eva kerdo.

¹⁴ O sap rhorhras gar o Adames. O sap rhorhras i Evat. Oun i Eva shounas gar ap kova, hoy o Devel penas.

¹⁵ I djouvel vell sharedo, te lell li čaven, oun te patsell li ap o Yezouseste, oun te hi lat o Debleskro kamlepen an lakro dji, oun te djivell li i djoudjo djipen glan o Debleste oun glan i menshende.