1. Tessalonikarja 5 - O Debleskro Lab 2024 (Sinte-Manouche)O tsiro, kay o Yezous pale vella 1 Mire phrala, mer hounte činas t'menge či pral ko tsiro, kay kova lauter vella. 2 T'mer djinenna, o ray Yezous vella har i čorepaskro an i rati. 3 Te penenn i menshe: “Lauter hi mishto, kek kourepen hi kay, oun men hounte vell kek daar”, palle vell i bibarht pral lende, oun yon nay nashenn gar krik. Koy bibarht vell pral lende yaake sik, har i douka venn pral i djouvyate, kay lell i ternepen. 4 T'mer, kamle phrala, ma djivenn yaake har an i kali rat har kolla, kay prindjrenn o Debles gar! Palle vell ko dives gar pral t'mende har i čorepaskro an i rat. 5 T'mer lauter djan ap o čačo drom, oun djivenn gar an o čilačepen. Kova hi har te djivenn ap o dives, oun gar an i rat. 6 Doleske, te sovas mer gar har i vavar, te rikras mare yaka pre, oun te das yak har djivah! 7 Koon sovella, sovell an i rat. Oun koon kamell pes mato te piyell, krell kova ninna an i rati. O kourepaskro 8 Mer djivah ap o dives. Doleske das yak, har te djivas! Yaake har i kourepaskro rivell i sasterno gad ap peste, te nay doukrell les kek, yaake rivas mer o patsepen oun o kamlepen ap mende har i ripen. I kourepaskro čivell ninna i sasterni stadi ap peskro shero, te doukrell les kek ap leskro shero. Yaake nay doukrell men kek, te dikah mer ap o Yezous Kristeste, oun djinah zoreles, te lell men o Yezous Kristo dran o čilačepen oun o merepen vin. 9 O Devel kamell gar, te vell leskri rholi pral mende. Na-a, yob kamell, te dell men maro ray, o Yezous Kristo, o Debleskro djipen. 10 Kova meras menge, te djivas leha khetne, mer, kay gomme djido ham, oun ninna kolla, kay meran. 11 Dran kova, rakrenn kal laba yek ap o vavareste, te dell yek o vavares zoor, yaake har t'mer kova ninna krenna! Krenn kek čingepen! 12 Mire phrala, mer mangah t'men: Shounenn ap t'mare pralstunende, kay boudrenn mashkral t'mende! O Devel čivas len an pengri boudi, te sikrenn le t'men, hoy yob kamella! 13 Yon krenn o Debleskri boudi. Avenn lačes oun kamles ap lende! Oun moukenn kek čingepen mashkral t'mende te vell! 14 Mire phrala, kanna penah t'menge, hoy te krenn: Denn kolen trad, kay kamenn gar te boudrell! Rakrenn kolentsa mishto, kay hi dareno! Krenn kolen zoreles, kay hi gar zorelo an o patsepen! Denn kekes sik pre! 15 Ma avenn čilačo ap kolende, kay čilačo ap t'mende van! Moukenn gar tele, te venn lačes ap hakeneste mashkral t'mende, ninna ap i tsele vavar menshende! 16 Avenn barhtelo hako tsiro! 17 Mangenn o Debles hako tsiro! 18 Parkrenn t'men pash leste pral halauter! Kova kamell o Devel lauterendar, kay djan ap o Yezouseskro drom. 19 Moukenn o Debleskro Dourho mashkral t'mende te boudrell! 20 Shounenn ap kol laba, hoy o Devel i patsleske an o dji čivas! 21 Denn yak, te vell ko lab, hoy yob penas, čačepah o Deblestar! Oun rikrenn kova, hoy mishto hi! 22 Rikrenn t'men pale dran hako čilačo koova! Mangenn o Debles menge! 23 O Devel kras i drom, te vas pash leste. Lestar mangau, te krell lo t'maro tselo djipen djoudjo glan leste, te rikrell lo t'men an peskre vasta, yaake te hatsell lo kek doosh ap t'mende ap ko dives, kay vell maro ray, o Yezous Kristo, pale. 24 O Devel das t'men pash peste gole, yob moukell t'men gar, oun krell kova, hoy yob penas. 25 Mire phrala, mangenn lestar ninna menge! 26 Penenn i tsele patslenge mendar: “Ačenn o Debleha!” Oun denn len i čoum! 27 Me penau t'menge zoreles an o lab maro rayestar, o Yezousestar: Draverenn kava liil glan i tsele patslende! 28 O lačepen maro rayestar, o Yezous Kristestar, djal t'mentsa! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.