1. Tessalonikarja 4 - O Debleskro Lab 2024 (Sinte-Manouche)

Djivenn yaake, har o Devel kamella!

¹ Mire phrala, mer sikram t'mende, har te djivenn t'maro djipen yaake, te vell o Devel barhtelo pral t'mende. Oun kova krenn t'mer. Kanna mangah t'men yaake har maro ray, o Yezous, mangals t'mendar: Krenn kova gomme boudeder oun feteder!

² T'mer djinenna, hoy yob t'mendar kamella. Mer penam les t'menge.

³ O Devel kamell, te djivenn t'mer i djoudjo djipen, te sovell kek rom i djouvyah khetne, kay hi gar peskri romni, oun kek djouvel i morsheha, kay hi gar peskro rom.

⁴ Hako morsh hounte djivell peskri romyah yaake khetne, har glan o Debleste mishto hi. Yob hounte dikell gar ap late, har te vals li či moldo.

⁵ I rhanč hounte rhal les gar pre, har kova hi pash i menshende, kay prindjrenn o Debles gar.

⁶ Kek hounte rhorhell peskro phrales. Koon kova krella, koles dell o Devel i phagi. Yaake penam t'menge, oun dam t'men trad.

⁷ O Devel das men gole, te djivas i djoudjo djipen. Yob das men gar gole, te kras djoungelo koova.

⁸ Koon kamell kol laba gar te shounell, kova čivell o Debles ap i rig, oun gar i menshes. Oun o Devel hi kova, kay das peskro Dourho an t'mende.

⁹ Me hounte činap t'menge gar, te vell t'men i baro dji i patslenge. O Devel penas t'menge kova an o dji.

¹⁰ Oun t'mer krenn o lačepen ap i patslende an o tselo them Macedonia. Mire phrala, moukenn gar tele, te krenn kova boudeder oun feteder!

¹¹ Djivenn t'maro djipen yaake, te nay rakrenn i menshe gar djoungeles pral t'mende! Krenn t'mari boudi! Boudrenn yaake, te vell t'men doha djipaske, yaake har t'menge penam!

¹² Palle hounte lenn t'mer či kolendar, kay hi gar patslo. Oun yon rakrenn nay gar čilačes pral t'mende.

O Yezous vella pale

¹³ Mire phrala, mer kamah, te djinenn t'mer, hoy hi kol patslentsa, kay meran, te vell t'menge gar ropaske har kolenge, kay prindjrenn o Debles gar oun djinenn gar, hoy pal o merepen vella.

¹⁴ Mer patsah, te meras o Yezous oun stas i moulendar pale pre. Doleske djinah ninna, ap ko dives, kay vell o Yezous pale, anell o Devel ninna kolen khetne leha, kay an o patsepen meran.

¹⁵ Mer penah t'menge, hoy o ray Yezous menge penas. Mer, kay ham gomme djido ap ko dives, kay vell o Yezous pale, vah gar sikeder pash leste har kolla, kay meran.

¹⁶ Ap ko dives, kay vell maro ray Yezous tele dran o bolepen, shounah, har yek gole della. O Debleskro pralstouno bolepaskro dell bari gole, oun yek phourdell an o Debleskri bashepaskri. Palle stenn kol moule pre, kay patsan ap o Yezous Kristeste.

¹⁷ Palle vah mer, kay ham gomme djido, lentsa khetne pre hadedo oun ap i volke pash o rayeste, o Yezouseste, an o bolepen anlo. Oun pash leste ačah hako tsiro.

¹⁸ Te dell yek o vavareste zoor kal labentsa!