1. Tessalonikarja 3 - O Debleskro Lab 2024 (Sinte-Manouche)

O Timoteo vella pash t'mende

¹ Mer rikram bouder gar vin, te shounam bouder či t'mendar. Doleske penam menge, hi mishto, te ačap me, o Paulo, kate an o foro Athen, khetne maro phraleha, o Silvano,

² oun te djal maro phraal, o Timoteo, pash t'mende. Kova hi o Debleskro boudepaskro, kay penell i menshenge o lačo lab o Yezous Kristestar. Mer bičram les pash t'mende, te krell lo t'men zoreles an o dji oun an t'maro patsepen,

³ te moukell kek t'mendar peskro patsepen, ninna te vell lo palla lino. Djinenn, kava pharo drom hi o Debleskro drom menge, oun mer vah palla lino.

⁴ Kova penam t'menge, har pash t'mende hams. Oun t'mer dikan, kova vas yaake.

⁵ Doleske rikrom kova bouder gar vin, oun bičrom o Timotes pash t'mende, te nay penell lo mange, har han tardo an t'maro patsepen. Man his traash, te anals t'men o beng o Debleskro dromestar tele. Palle vals mari boudi pash t'mende čičeske.

⁶ Kanna vas o Timoteo pale, oun penas lačo koova pral t'maro patsepen oun kamlepen. Lestar djinah, mer ham hako tsiro an t'maro dji. Oun t'mer kamenn men pale te dikell, yaake har kamah mer t'men pale te dikell.

^7-8 Mire phrala, kal lače laba kran mare djia barhtelo. T'maro patsepen das men nevi zoor an maro pharo djipen. An i daar lam pale i nevi zoor, har dikam, te rikrenn t'men ap o rayeste, o Yezouseste.

⁹ Mer nay parkrah men gar doha pash o Debleste, yaake barhtelo kran t'mer men.

^10-11 Ap o dives oun an i rati mangah o Debles o tselo djiyestar, te dikas t'men pale, te nay kras t'maro patsepen gomme zorleder. Me kamoms o tselo djiyestar, te anell man o Devel, maro dad, oun o Yezous, maro ray, pash t'mende.

¹² T'menge mangau me maro rayestar, o Yezousestar, te vell t'maro kamlepen baro oun bareder mashkral t'mende oun i vavar menshenge ninna. Yaake baro hi ninna maro kamlepen t'menge.

¹³ Palle venn t'mare djia zorelo oun djoudjo. Oun o Devel, maro dad, hatsell kek doosh ap t'mende ap ko dives, kay vell o Yezous, maro ray, pale lauterentsa, kay leskre hi.