1. Tessalonikarja 2 - O Debleskro Lab 2024 (Sinte-Manouche)

Ma bistrenn miri boudi mashkral t'mende!

¹ Mire phrala, t'mer djinenna, har vam pash t'mende, oun penam t'menge o Debleskro lab. Kova his gar čičeske.

² Glan ko tsiro, kay vam pash t'mende, hams an o foro Filipi. Ninna te vam kote palla lino oun dino, har t'mer djinenn, djam pal kova pash t'mende an o foro Tessalonika. O Devel das men i zoor, te penas t'menge o Debleskro lačo lab, ninna te his pash t'mende boud menshe, kay kran menge o djipen phares.

³ Yaake nay dikenn t'mer, kova, hoy t'menge penam, vas gar dran i čilačo dji, oun hi kek rhorhepen. Vitar gar kamam t'men goseve labentsa te taprell.

⁴ Na-a, o Debleske ham moldo, te das lo men koy boudi, te sikras mer i menshende o Yezouseskro drom. Doleske rakrah mer lestar. Kova krah gar, te dikenn i menshe lačes ap mende, na-a, mer kamah, te dikell o Devel lačes ap mende. Yob djinella, hoy an maro dji hi.

⁵ T'mer djinenna, mer rakram t'menge gar pal o mouy. Vitar gar penam o Debleskro lab, te las love i menshendar. O Devel djinella, me penau o čačepen.

⁶ Mer rodam gar o sharepen i menshendar, gar t'mendar, vitar gar i vavarendar.

⁷ Mer ham o Yezous Kristeskre bičepangre oun nay penams t'menge zoreles, hoy te krenn. Kova kram gar. Na-a, mer hams kamlo ap t'mende, har i day ap peskre čavende.

⁸ T'mer hans an mare djia, oun doleske sikram t'mende gar kokres o Debleskro drom, na-a, mer djivam ninna t'mentsa khetne; yaake baro his maro kamlepen t'menge.

⁹ Mire phrala, t'mer djinenna, har phari mari boudi his, har hams pash t'mende, oun sikram t'mende o Debleskro drom. Ap o dives oun an i rat boudram, te djivas gar dran t'mari possita.

¹⁰ O Devel dikas, har djivam mashkral t'mende. Oun t'mer, kay ap leste patsenna, dikan ninna, te djivam yaake pash t'mende har o Devel kamella, oun djam pal o čačepen, te hatsas kek i doosh ap mende.

^11-12 T'mer djinenna, mer rakram t'mentsa har i dad peskre čaventsa. Hakenes t'mendar rakram an o dji lače oun zorele labentsa, te djivenn t'mer yaake, te vell o Devel sharedo. Yob das t'men gole, te djivenn pash leste an o bolepen oun lenn leskro raylepen.

I bibolde kamenn men gar

¹³ Doleske moukah gar tele, te parkras men pash o Debleste, te patsan t'mer o Debleskro lab, hoy t'menge penam. Oun t'mer hayvan, ko lab vell čačepah o Deblestar oun gar i menshendar. Oun t'maro djipen sikrella, te patsenn t'mer ap ko lab.

¹⁴ Mire phrala, t'mare menshe lan t'men palla. Yaake djas t'menge har kol patsle biboldenge an o them Youdea. Lengre menshe, i bibolde, lan len ninna palla.

¹⁵ I bibolde maran o Yezous Kristes. Glan leste maran le o Debleskre rakepangren. Men lan le ninna palla. Yon rhoyrenn o Debles. Oun ap i tsele menshende hi yon čilačo.

¹⁶ Yon moukenn men gar, te penas mer o lačo lab i vavarenge, kay kek bibolde hi, te nay venn kolla ninna ap o Debleskro drom. Yaake vas i biboldengri doosh yaake baro, bareder djal gar. Oun o Debleskri rholi vas zoreles pral lende.

¹⁷ Mire phrala, ninna te dikam men nay i tsiro gar, hams hako tsiro pash t'mende maro djiyeha. Maro dji nashell pal t'mende, oun mer kram lauter, te dikas t'men.

¹⁸ Me, o Paulo, kamom boudeder kope pash t'mende te vell. Oun o beng vas hako kopo koy mashkral.

¹⁹ Mer ham barhtelo pral t'mende. Oun mer dikah ap ko dives, kay vell maro ray Yezous pale. Palle nay sharah men t'mentsa.

²⁰ T'mer han maro raylepen oun mari barht.