1. Samuel 8 - O Debleskro Lab 2024 (Sinte-Manouche)

O Israel kamell i baro rayes pral peste

¹ Oun har o Samuel phouro vas, čivas yob peskre morsh čaven an pengri boudi dren, te venn le čačepangre raya pral o Israel.

² Leskro phoureder čavo his o Yoel, oun o douyto o Abiya. Oun yon djivan an Beersheba, oun kote rakran le o čačepen vin.

³ Yon djan gar o drom har lengro dad, oun rodan kova, hoy lenge o feteder his, oun lan čorrhanes love, oun phagan o čačepen.

⁴ Kote van i tsele phoureder dran o them Israel khetne oun djan pash o Samuel an Rama.

⁵ Oun yon penan ap leste: “Dik, tou val phouro, oun tire čave djan gar o drom yaake har tou les djal. Rode tou i baro rayes vin, koles tou pral mende čiveh! Oun kova vell maro čačepaskro ray, yaake har an i vavar themma ninna hi.”

⁶ Kolla his djoungele laba glan o Samueleste, te penan le: De men i baro ray, kay o čačepen pral mende vin rakrella. Oun o Samuel rakras o baro Debleha koy pral.

⁷ Oun o baro Devel penas ap o Samuel: “Shoun ap i Israelitarya, an lauter, hoy yon ap toute penan. Yon čivan gar tout ap i rig, na-a man čivan le ap i rig, te vap me bouder gar o baro ray pral lende.

⁸ Kanna krenn le touha yaake har yon les mantsa kran. Yaake rah har anom len vin dran o them Egiptia, bis kava dives, moukan le man pale te pale, oun mangan vavar deblen an.

⁹ Oun kanna kre, hoy le toutar kamenn. Pen lenge ninna zoreles, hoy nay krenn lengre bare raya lentsa, te hi len penepaske pral lende.”

¹⁰ Oun o Samuel penas kal tsele laba o baro Deblestar kol menshenge, kay lestar i baro ray kaman!

¹¹ “Kova hi, hoy t'maro baro ray t'mentsa krella”, penas o Samuel: “T'mare morsh čaven lell lo t'mendar, te venn le leskre lourde, kay beshenn ap leskro vourdin oun ap leskre graya, oun te nashenn le glan leskro vourdin.

¹² Hi save mank lende, kolendar krell lo pralstoune pral peskre lourdende: pral yek zero (1.000) oun ninna pral paash-sheel (50). T'mare morsh čave hounte boudrenn ap leskro kotar phoub oun anenn leskro djob dren, hoy bares vas. Ninna hounte krenn le leskre rhare, oun kol kotya, kay leskre vourdya dran kerdo venna.

¹³ Oun t'mare čen lell lo peske, te krenn le soungepaskro koova, kerenn rhapen, oun pekenn maro oun merklia.

¹⁴ T'mare feteder kotya phoub lell lo t'mendar, ninna ko feteder them, kay t'mare drakengre rouka oun djeteskre rouka tardo hi. Kova lauter lell lo oun dell les peskre pralstoune boudepangrende.

¹⁵ Ninna lell lo o deshto kotar t'maro djobestar oun t'mare drakendar oun playsrell kolentsa kolen, kay boudrenn an leskro kheer, ninna vavar pralstoune boudepangren.

¹⁶ Oun t'mare boudepangre, morsha oun djouvya, lell lo t'mendar, ninna t'mare feteder groumya oun esle, te boudrenn le leske.

¹⁷ T'mare bakrendar lell lo hako deshto, oun t'mer hounte venn leskre boudepangre.

¹⁸ Palle te vell ko dives, kay denn t'mer gole pral t'maro baro rayeste, koles t'menge vin rodan, palle shounell t'men o baro Devel gar an kol divessa.”

¹⁹ I menshe kaman gar ap o Samueleste te shounell, oun penan: “Na-a, mer kamah, te vell i baro ray pral mende,

²⁰ te vas mer yaake har i menshe an vavar themma ninna. Oun maro baro ray te rakrell o čačepen pral mende vin oun djal menge glan vin an o kourepen.”

²¹ Oun o Samuel shounas lengre tsele laba, oun penas len o baro Debleske.

²² Oun o baro Devel penas ap o Samuel: “Shoun ap lende oun čip i baro rayes pral lende!” Pal kova penas o Samuel ap i Israeleskre morshen: “Djan khere, hakeno an peskro foro!”