1. Samuel 7 - O Debleskro Lab 2024 (Sinte-Manouche)

¹ Oun kol morsha dran Kiryat-Yearim van oun lan o morhton o baro Deblestar. Oun yon anan les an o kheer i morshestar, kay kharas Abinadab. Kova djivas ap i tikni berga. Oun leskro čaves, o Elazar, rodan le vin, te dell lo yak ap o morhton.

O Samuel vell čačepaskro ray pral o Israel

² Ko morhton, kay o baro Debleskre deesh laba dren hi, ačas i rah tsiro an Kiryat-Yearim, yaake biish bersha. An ko tsiro poučan i Israelitarya pale pal o baro Debleste.

³ Kote penas o Samuel ap lende: “Te kamenn t'mer t'maro tselo djiyeha pale ap o baro Debleskro drom te djal, palle čivenn i rhorhene deblen t'mendar krik, ninna i debletsa Astarte! Patsenn ap o baro Debleste, oun mangenn les kokres an oun kek vavares! Palle lell yob t'men vin dran i vasta i Filistarendar.”

⁴ Oun i Israelitarya čivan i rhorhene deblen krik, kay kharenn Baal oun Astarte, oun mangan kokres o baro Debles an.

⁵ Oun o Samuel das i tsele morshen an Israel khetne gole an Mispa, te mangas lo lenge o baro Deblestar.

⁶ Oun yon van khetne an Mispa. Kote lan le pani, oun čoran les glan o baro Debleste vin. Oun ap ko dives rhan le či, te dikell o baro Devel ap lende. Oun yon penan: “Mer anam doosh ap mende glan o baro Debleste.” Oun kote an Mispa vas o Samuel lengro čačepaskro ray.

⁷ Har i Filistarya shounan, te van i Israelitarya khetne an Mispa, djan lengre raya pengre lourdentsa vin, te kourenn le pen i Israelentsa. Har i Israelitarya kova shounan, tapras len i bari daar.

⁸ Oun yon penan ap o Samuel: “Mouk gar tele, te mangess menge maro baro Deblestar, te lell lo men vin dran i vasta kol Filistarendar.”

⁹ Oun o Samuel las i terno bakro, hoy gomme thoud piyas, oun maras les oun rhačras les tseles o baro Debleske. Oun yob das ap o baro Debleste gole, oun mangas les o Israeleske. Oun o baro Devel shounas ap leste.

¹⁰ Oun har yob gomme o bakres rhačras, van i Filistarya te kourenn le pen i Israelentsa. Oun o baro Devel moukas o bolepen bari gole te dell pral lende ap ko dives, yaake te tapras kol Filistaryen i bari daar, oun yon nashan penge glan i Israelitarya.

¹¹ Oun i Israelitarya djan vin dran Mispa, oun lan len palla yaake dour har Bet-Kar, oun dan len moulo ap o drom.

¹² Oun o Samuel las i bar oun čivas les pre mashkral Mispa oun Shen, oun das les o lab Eben-Eser, oun penas: O tselo drom his o baro Devel ap mari rig.

¹³ Yaake peras i ladj ap i Filistarya. Oun yon van bouder gar an o Israeleskro them. Oun o vast o baro Deblestar his phares čiddo ap lende, yaake rah har o Samuel djivas.

¹⁴ Oun o Israel las peske kol forya pale, kolen i Filistarya lendar krik lan an o them mank Ekron oun Gat. Kal forya las o Israel vin dran i vasta i Filistarendar. Oun ninna mank i Israelitarya oun i Amorarya his bouder kek kourepen.

¹⁵ Oun yaake rah har o Samuel djivas, his yob o čačepaskro ray pral o Israel.

¹⁶ Oun hako bersh djas lo an Betel oun Gilgal oun Mispa oun rakras kote o čačepen vin pral i menshende.

¹⁷ Palle djas lo pale an Rama, kay lo khere hi, oun rakras kote o čačepen vin pral i Israelitarya. Ninna kote kras lo i rhačepaskri, kay čomone rhačedo vell o baro Debleske.