1. Samuel 6 - O Debleskro Lab 2024 (Sinte-Manouche)

O morhton, kay o Debleskre laba dren hi, vell pale an o them Israel

¹ Oun o morhton o baro Deblestar his efta čonna an o them Filistia.

² Oun i Filistarya dan pengre rashayen oun dourkepangren gole, oun poučan lendar: “Hoy kras mer ko morhtoneha o baro Deblestar? Har bičras les pale kote kay lo vas?”

³ Oun yon penan ap lende: “Te bičrenn t'mer o morhton o Israeleskro Deblestar pale, palle bičrenn čomone peha. Denn les čomone, te vell lauter pale mishto mank t'mende oun leste! Palle venn t'mer sasto. Yaake djinenn t'mer ninna, hoske leskro vast t'mendar gar krik djas.”

^4-5 Oun yon poučan: “Hoy hi kova hoy mer hounte das leste, te vell lauter pale mishto?” Yon penan: “Panč raya hi an o them Filistia. Len oun t'men hi o emligo nasslepen. Doleske krenn panč sonakangre figure, hoy vin dikenn har o doukepen, hoy ap t'maro mass vas, ninna panč sonakangre figure, hoy vin dikenn har kol kermuse, kay rhan t'maro them pre. Denn kolen o Israeleskro Debleste. Yaake sikrenn t'mer leste, te djinenn, har baro yob hi. Nay vell, te lell lo peskro vast t'mendar pale, ninna t'mare deblendar oun t'maro themestar.

⁶ Ma pandenn t'mare djia, te venn le har bar, har kran kol Egiptarya oun lengro baro ray, o Farao! Hi kova gar yaake? Har sikras o baro Devel peskri zoor ap lende, hounte moukan le i Israelitaryen te djal.

⁷ Yaake krenn i nevo vourdin! Oun lenn douy groumya, kay daya hi, oun kolengre terne ap lende piyenn. Kol groumya hounte tserdan gomme či. Pandenn len glan ko vourdin! Lengre terne moukenn khere!

⁸ Lenn o baro Debleskro morhton oun hadenn les ap ko vourdin! Oun ko sonakaskro koova, hoy leste denn, te vell lauter pale mishto mank leste oun t'mende, kova čivenn an i tikno morhton, oun čivenn lat koy pashel ap o vourdin. Oun palle moukenn i groumyen te djal, kay kamenn le!

⁹ Palle sikrell pes, havi rigyatar koy bari bibarht pral mende vas: Te djan le pre an lengro them, ap o drom an Bet-Shemesh, palle his o baro Devel, kay savi bari bibarht ap mende anas. Te djan le ap i vavar rig, palle hayvah, te his gar leskro vast, hoy men das, oun kava tselo koova čičeske ap mende vas, oun kek bičras les.”

¹⁰ Oun kol morsha kran kova yaake. Yon lan douy groumya, kolen terne hi, kay gomme ap lende piyenn. Oun pandan len glan o vourdin. Oun i groumyengre ternen pandan le khere dren.

¹¹ Oun ko morhton, kay o Debleskre deesh laba dren hi, čivan le ap ko vourdin. Oun koy pashel čivan le ko tikno morhton, kay kol sonakangre kermuse dren hi oun kol figure, hoy vi-dikenn har o doukepen.

¹² Oun kol groumya djan ap ko drom an Bet-Shemesh, oun ačan ap ko drom, oun djan gar čačes vitar gar serves. Har djan le yaake, dan le gole, oun moukan gar tele te denn le gole. Oun kol raya pral i Filistarya djan pal lende, bis te van le an o them, kay Bet-Shemesh čiddo hi.

¹³ Oun i menshe dran Bet-Shemesh lan an ko tsiro o djob dren an o telstouno them. Oun har le pre dikan, oun o morhton dikan, kay o Debleskre deesh laba dren hi, van le barhteles.

^14-15 Oun o vourdin vas ap i kotar phoub, hoy his i morshes, kay kharas Yosua oun his dran Bet-Shemesh. Kote ačas o vourdin tardo. Kote his i baro bar čiddo. Oun i Levitarya lan ko morhton tele, kay o Debleskre deesh laba dren hi, ninna ko tikno morhton, hoy koy pashel tardo hi, an koya ko sonakaskro koova his. Oun čivan lauter ap ko baro bar. Oun i menshe dan ko vourdineskro kasht tiknes, oun maran kol groumyen oun rhačran len o baro Debleske. Ap ko dives maran kol morsha dran Bet-Shemesh kote gomme boudeder firhen o baro Debleske. His firhe pashel, kay van tseles rhačedo, oun vavar, kay rhan le khetne glan leste.

¹⁶ Oun har kol panč raya pral i Filistarya kova lauter dikan, djan le ko emligo dives pale an Ekron.

¹⁷ Kova hi, hoy i Filistarya o baro Debleste dan, te vell lauter pale mishto mank leste oun lende: panč sonakangre figure, hoy vin dikan har o doukepen ap lengro mass: Yek figura hako foreske: Ashdod, Gaza, Ashkelon, Gat oun Ekron.

¹⁸ Ninna dan le sonakangre kermuse, yek kermuso hako foreske, pral koleste i panč Filistarya i raya his: gar kokres i zorele foryenge, na-a ninna hako gab. Ko baro bar, kay čivan le o morhton pre, kay o Debleskre deesh laba dren hi, ko bar hi gomme kava dives čiddo ap ko kotar phoub, hoy hi ko morshes Yosua dran Bet-Shemesh.

¹⁹ An o foro Bet-Shemesh his menshe, kay dikan an o morhton, kay o Debleskre deesh laba dren hi. Oun o baro Devel maras lendar efta-deesh (70) morshen. Oun i tsele menshe rovan, te das len o baro Devel yaake phares.

²⁰ Oun i morsha an Bet-Shemesh penan: “Koon nay ačell djido glan o baro Debleste, kay yaake hi har kek vavar? Pash koneste nay bičrah ko morhton? Kate nay ačell lo gar.”

²¹ Oun yon bičran morshen pash kol menshende an o foro Kiryat-Yearim oun penan lenge: “I Filistarya anan o morhton pale, kay o baro Debleskre deesh laba dren hi. Avenn t'mer kay tele, oun lenn les pre pash t'mende!”