1. Samuel 5 - O Debleskro Lab 2024 (Sinte-Manouche)

O morhton, kay o Debleskre laba dren hi, anell bibarht pral i Filistarya

¹ Oun o morhton, kay o Debleskre deesh laba dren hi, his kanna an i vasta kol Filistarendar. Oun yon lan les dran Eben-Eser oun anan les an o foro Ashdod.

² Oun kote čivan les i Filistarya an o kheer pengro deblestar, o Dagon, ap leskri rig.

³ Oun har i menshe an o foro Ashdod o vavar dives taysarlakro pre stan, kote hatsan le o Dagon ap peskro mouy čiddo ap i phoub glan o morhton, kay o baro Debleskre deesh laba dren hi. Oun yon lan o Dagon oun čivan les pale kote tardo, kay his lo.

⁴ Oun har yon o vavar dives taysarlakro pre stan, hatsan le o Dagon pale ap i phoub čiddo glan o morhton. Kokres leskro doumo his kote čiddo. Leskro shero oun leskre vasta his tele dino oun čiddo kote, kay yek an o voudar dren vell.

⁵ Doleske stakrenn o Dagoneskre rashaya gar ap ko kotar phoub – an o voudar, kote kay yek dren vell. Oun kek vavar, kay djal an o Dagoneskro kheer, stakrell kote pre. Yaake hi kova an Ashdod gomme kava dives.

⁶ Oun o baro Debleskro vast čivas pes phares ap i menshende an Ashdod oun anas bibarht ap lende. I djoungelo nasslepen vas ap kolende, kay djivan an Ashdod oun an i gaba trouyel.

⁷ Har dikan oun hayvan le, hoske kova yaake hi, penan le: “Kova hi o Israeleskro Devel, kay čivas koy phagi ap mende oun ap maro debleste Dagon. Ma moukenn o morhton, kay leskre laba dren hi, pash mende te ačell.”

⁸ Oun yon bičran morshen an o tselo them Filistia oun dan i tsele rayen khetne gole, oun poučan lendar: “Hoy kras mer ko morhtoneha o Israeleskro Deblestar, kay leskre laba dren hi?” Kolla penan: “Anenn les an Gat.” Oun yon hidjran les an o foro Gat.

⁹ Oun har yon ko morhton kote anan, vas o baro Debleskro vast phares ap o foro, oun lauter, tikne oun bare lan ko djoungelo nasslepen. Oun i bari daar tapras len.

¹⁰ Koy bičran le o morhton, kay o Debleskre laba dren hi, an o foro Ekron. Oun har ko morhton an o foro Ekron dren vas, dan i menshe kote gole i daryatar oun penan: “Yon anan o morhton o Israeleskro Deblestar pash mende, te marell lo men lauteren.”

¹¹ Koy dan le pale i tsele rayen pral i Filistarya khetne gole oun penan: “Bičrenn o morhton o Israeleskro Deblestar pale, kay lo vas, te marell lo men oun mare menshen gar.” I bari daar his an o tselo foro, fothe phares his o Debleskro vast ap lende čiddo.

¹² Ninna kol menshe, kay gar meran, lan i djoungelo nasslepen. Oun koy gole an ko foro djas pre an o bolepen.