1. Samuel 4 - O Debleskro Lab 2024 (Sinte-Manouche)

I Filistarya lenn o morhton krik, kay o Debleskre deesh laba dren hi

¹ An ko tsiro van i Filistarya khetne te kourenn le pen i Israelentsa. Oun o Israel djas vin an o kourepen lentsa. Oun i Israelitarya his tardo pash Eben-Eser, oun i Filistarya pash o foro Afek.

² Oun i Filistarya djan ap i Israelitaryen pre. Oun o kourepen vas pharo. Oun i Filistarya dan i Israelitaryen yaake phares, te meran lendar star-zerya (4.000) morsha an kava marepen.

³ Oun har i lourde pale ap pengri platsa van, poučan i phoureder dran Israel: “Hoske kras o baro Devel, te dan men i Filistarya kava dives? Mer te las o morhton dran Shilo pash mende, kay o Debleskre deesh laba dren hi. Palle hi o baro Devel mashkral mende, oun lell men vin dran i vasta kolendar, kay kourenn pen mentsa.”

⁴ Oun yon bičran morshen an Shilo, oun moukan ko morhton pash pende te anell, an koleste i deesh laba hi o baro Deblestar, kay hi o ray pral o bolepen oun i phoub, oun hi beshdo pral i bolepangre. Oun kol douy čave o Elyestar, o Hofni oun o Pinhas djan o morhtoneha.

⁵ Oun har ko morhton ap i platsa vas, stan i tsele Israelitarya, oun dan yaake bari gole i barhtyatar, te djas i phoub tel lengre herya.

⁶ Oun i Filistarya shounan koy bari gole, oun poučan pen: “Hoy hi savi bari gole kote ap koy platsa, kay kol Hebrearya tardo hi?” Har shounan le, te vas ko morhton ap i platsa

⁷ tapras len i daar, oun yon penan: “Lengro devel vas ap lengri platsa. Mer ham nashedo. Savo koova his gomme gar koy.

⁸ Havi bibarht! Koon nay lell men vin dran i vasta save zorele deblendar? Kolla hi kol debla, kay maran i Egiptarya an o moulo tato them.

⁹ Avenn zorele t'mer Filistarya! Kourenn t'men har čače morsha, te perenn gar an i Israelengre vasta! Te venn yon i zorleder pral t'mende, hounte boudrenn t'mer lenge yaake, har yon hounte boudran menge. Avenn kanna morsha oun kourenn t'men!”

¹⁰ Oun i Filistarya maran pen i Israelentsa oun dan len. Oun i Israelitarya nashan penge, hakeno an peskro plarhteno kheer. Oun yon van phares dino, yaake phares, te meran lendar triyanda-zerya (30.000) morsha.

¹¹ Oun o morhton, kay o Debleskre deesh laba dren hi, vas lendar lino. Oun o Elyeskre douy čave, o Hofni oun o Pinhas, meran.

O Eli merell

¹² Oun i morsh dran o kheer Benyamin nashas o tselo drom foun kotar, kay o marepen his, bis pash o Shilo ap yek dives. Yob kras peskre koola paash oun čivas čik ap peskro shero, te sikrell lo, har leskro dji rovas.

¹³ Oun har yob an o foro vas, his o Eli vin ap i beshepaskri beshdo, oun dikas ap o drom. Leskro dji daras troul ko morhton, kay o Debleskre deesh laba dren hi. Oun har ko morsh an o foro dren vas, penas lo i menshenge koy, hoy vas. Oun ko tselo foro das gole.

¹⁴ Oun har shounas o Eli koy gole, poučas lo: “Hoy hi savi bari gole?” Koy vas ko morsh sik pash o Eli, oun penas leske lauter.

¹⁵ O Eli his enya-deesh-te-orhta (98) bersh phouro, oun leskre yaka van korelo, yaake te nay dikas lo či bouder.

¹⁶ Oun ko morsh penas ap o Eli: “Me vom dran o marepaskri platsa oun nashom mange dran o marepen.” Oun o Eli poučas lestar: “Har djas, miro čavo?”

¹⁷ Koy penas ko bičepaskro: “O Israel nashas glan i Filistarya. Kolla dan men phares, oun tire douy čave, o Hofni oun o Pinhas hi moule, oun ko morhton, kay o Debleskre deesh laba dren hi, lan le mendar.”

¹⁸ Oun har yob pral ko morhton rakras, peras o Eli palstounes peskri beshepaskri tele, hoy pash o voudar tardo hi. O Eli his yaake phouro oun pharo, te phagas lo peskri meen, oun meras. Yob his o čačepaskro morsh pral o Israel star-deesh bersha.

O Pinhaseskri romni merell

¹⁹ Oun i romni o Elyeskro čavestar o Pinhas, his an vavar koova, yaake dour te hounte vas o ternepen boldo. Oun har yoy shounas te lan le o morhton lendar, kay o Debleskre deesh laba dren hi, oun te meras lakro romeskro dad, oun ninna lakro rom, tapran lat i douka, oun o ternepen vas boldo.

²⁰ Oun har yoy ap o merepen čiddo his, penan i djouvya, kay pashel tardo hi: “Ma dare, tout hi i morsh čavo.” Yoy penas či koy pre, oun moukas kova gar an peskro dji te djal.

²¹ Oun yoy das ko čaves o lab Ikabod. Ko lab kharell: O raylepen djas peske dran o Israel. Kova penas yoy doleske, kay lan le o morhton lendar, kay o Debleskre deesh laba dren hi, oun doleske, kay lakro romeskro dad oun lakro rom meran.

²² Doleske penas li: “O raylepen djas peske dran o Israel. O morhton, kay o Debleskre laba dren hi, hi krik lino.”