1. Samuel 31 - O Debleskro Lab 2024 (Sinte-Manouche)

O Saul merell

¹ I Filistarya maran pen i Israelentsa. Oun i Israelitarya nashan glan lende, oun boud lendar van ap i berga Gilboa moulo dino.

² Oun i Filistarya lan o Saules palla, oun dan leskre morsh čaven, o Yonatan, o Abinadab oun o Malkishoua moulo.

³ Oun o marepen troul o Saul vas zorleder oun zorleder. Oun i kourepangre, kay denn i faylentsa karye, hatsan les oun doukran les phares.

⁴ Oun yob penas ap koleste, kay leskro kourepaskro koova hidjrell: “Le tiro rharo oun de man moulo, yaake te venn gar kalla pash mande, kay gar činle hi ap pengro mass, oun denn man moulo, oun krenn mantsa, hoy yon kamenn!” Oun ko lourdo, kay leskro kourepaskro koova hidjrell, kamas gar. Les his bari daar. Kote las o Saul o rharo, oun moukas pes an leste perell.

⁵ Oun har ko hidjepaskro lourdo dikas, te hi o Saul moulo, moukas yob pes ninna an peskro rharo te perell oun meras o Sauleha.

⁶ Yaake meras o Saul oun leskre triin čave, oun leskro hidjepaskro lourdo, oun kol tsele morsha, kay pash leste his, ap ko yek dives.

⁷ Har shounan kol Israelitarya, kay djivan vergel i tala Yesreel oun vergel o pani Yordan, te nashan penge i Israelengre lourde, oun kay meras o Saul oun leskre čave, kote nashan yon dran pengre forya oun nashan penge ninna. Oun i Filistarya van koy oun djivan an kol forya.

⁸ Oun ap ko dives pal o kourepen van i Filistarya, te randenn le lauter kolendar, kay kote moulo čiddo hi. Oun koy pashel hatsan le o Saules oun leskre triin čaven moules ap koy berga Gilboa čiddo.

⁹ Oun yon dan leske o shero tele, oun lan leske leskro sasterno ripen, oun bičran morshen koleha lautereha an o tselo them Filistia trouyel, te sikrenn le i menshende oun lengre rhorhene deblen, hoy djas.

¹⁰ Oun yon čivan leskro rharo oun leskro vitsepaskro čouri an o kheer, kay lengri debletsa, i Astarte, his. Oun o moulo Saul dan le sasterentsa ap i massouri, hoy hi troul o foro Bet-Shean.

¹¹ Har shounan kolla, kay djivenn an o foro Yabesh an o them Gilead, hoy i Filistarya o Sauleha kran,

¹² kran pen i tsele čače morsha ap o drom, oun djan i tseli rat oun van an Bet-Shean, oun lan o moulo Saules oun leskre moule čaven koy massouri tele, oun anan len an o foro Yabesh pale. Oun kote rhačran le len.

¹³ Oun yon lan lengre kokale oun paskran len tel ko baro rouk an o foro Yabesh. Oun yon rhan efta divessa či.