1. Samuel 30 - O Debleskro Lab 2024 (Sinte-Manouche)

O David dell i Amalekaryen

¹ Oun har o David oun kol morsha, kay pash leste hi, pal triin divessa an o foro Siklag van, his o foro paash oun rhačedo. I Amalekarya peran dren an o them Negev oun ninna an o foro Siklag.

² Oun yon pandan i djouvyen oun kolen, kay koy his, i ternen oun i phouren, oun lan len pentsa. Kekes dan le moulo, yon lan len pentsa oun djan penge.

³ Oun o David vas peskre morshentsa pash o foro, oun dikas, te his o foro rhačedo oun lengre djouvya oun lengre čave his pandles krik lino.

⁴ Kote rovas o David oun kol morsha, kay pash leste his, yaake zoreles bis te yon gar bouder nay rovan.

⁵ Ninna kol douy romya o Davidestar van pandlo krik lino, i Ahinoam dran Yesreel oun i Abigayil, kay his i romni o Nabalestar dran Karmel.

⁶ Oun i morshengre djia rovan pral lengre čavende oun čen, oun yon van yaake rhoyedo ap o Davideste, te kaman le les moulo te dell i barrentsa. Oun o David vas an i pharo tsiro. Oun yob las peskri zoor o baro Deblestar, kay leskro Devel hi.

⁷ Oun yob penas ap o rashayeste, o Abyatar, koleskro dad o Ahimelek his: “An mange o rashayeskri damdira!” Oun o Abyatar anas leske o rashayeskri damdira.

⁸ Oun o David poučas o baro Deblestar oun penas: “Lap me kol marepangren palla? Oun taprau len me palle?” Oun o baro Devel penas ap leste: “Le len palla! Oun tou tapreh len oun leh i pandlen dran lengre vasta vin!”

^9-10 Kote djas o David lenge palla khetne kol shob-sheel morshentsa, kay pash leste his. Oun har van le pash ko lengsto pani, hoy kharell Besor, ačan lendar douy-sheel morsha pale. Kolla his yaake khino, te nay djan le gar pral ko pani vergel. Kol vavar star-shelentsa nashas o David doureder oun las i Amalekaryen palla.

^11-12 Oun o Davideskre morsha hatsan i morshes dran o them Egiptia ap i kotar phoub. Kova rhas oun piyas či triin divessa oun triin ratsya. Oun yon anan les pash o Davideste, oun dan les maro te rhal oun pani te piyell. Ninna dan le les i kotar faygetikri merkli oun douy tikne gone drake, hoy trouk kerdo his. Oun har rhas lo, vas leskri zoor pale.

¹³ Oun o David poučas lestar: “Koneskro boudepaskro hal tou? Oun kay veh tou?” Yob penas: “Me hom i egiptikro boudepaskro. Miro ray hi i Amalekari. Glan triin divessa vom nasselo, oun miro ray moukas man pale.

¹⁴ Mer peram dren an o them Negev, kay i Kretarya djivenn, oun an o them Youda, oun an o them Negev, kay kolla djivenn, kay venn pal o Kaleb. Oun o foro Siklag rhačram pre.”

¹⁵ Oun o David poučas lestar: “Kameh tou man pash kol marepangre anell?” Oun yob penas: “De tout ap o Debleste sovel, te deh man gar moulo, oun te deh man gar an o vast miro rayestar, palle anau tout tele pash kal marepangre.”

¹⁶ Oun yob anas len tele, oun yon dikan, te his i Amalekarya bouder gar khetne. Yon his beshdo an o tselo them, rhan oun piyan oun khelan. Yaake barhtelo his le pral ko tselo koova, hoy lan le pentsa dran kol themma Filistia oun Youda.

¹⁷ Oun o David peras pral lende o vavar dives taysarlakro oun maras len o tselo dives bis ap i rat. Oun kek lendar nay nashas peske, kokres 400 (star-sheel) terne morsha beshan ap khamele, oun nashan.

¹⁸ Oun lauter, hoy i Amalekarya randan, las o David dran lengre vasta pale, ninna peskre douy romyen.

¹⁹ Oun či vas krik, kek ternepen oun kek phouro, kek čavo, oun kek čay. Oun kova, hoy yon randan his lauter gomme koy. Oun o David anas lauter pale pale.

²⁰ Oun o David las i bakre oun i groumya. Oun leskre morsha moukan len glan i vavar firhe te djal, oun penan: “Kava hi o Davideske!”

²¹ Oun o David vas pash kol douy-sheel morshende, kay yaake khino his, te nay djan le gar leha, oun ačan doleske pale pash ko tikno lengsto pani, hoy kharella Besor. Oun kolla van kanna vin pash o Davideste oun kol lourdende, kay pash leste his. Oun har o David pash lende vas, poučas lo lendar an o lačepen, har lenge djala.

²² Mank kol morshende, kay o Davideha djan, his čilače morsha, kay či-moldo his, oun kolla penan: “Yon van gar mentsa. Doleske dah mer len či kolestar, hoy randam! Kokres peskri romyat oun peskre čaven lell hakeno! Oun palle djal lo peske!”

²³ O David penas ap lende: “Mire phrala, ma krenn yaake o koveha, hoy o baro Devel men das! Yob das ap mende yak, oun das men kal marepangre an maro vast, kay pral mende peran!

²⁴ Koon te shounell an kava koova ap t'mende? Kava te vell yaake: Ko yek djal an o marepen, oun ko vavar dell yak ap i platsa. Oun dran lauter hoy randedo vas, lell hakeno, kova kay maras, oun kova kay yak das, oun hakeno yaake boud har o vavar!”

²⁵ Kava lab, hoy o David ap ko dives penas, ačas tardo oun vas i čačepaskro lab. Oun o Israel hounte rikras pes ap leste bis kava dives.

²⁶ Oun har o David pale an o foro Siklag vas, bičras lo čomone dran ko randedo koova ap i phourende an o them Youda, kay leskre mala his. Oun moukas lenge te penell: “Dikenn, kava hi t'menge dran ko koova, hoy mer kolendar randam, kay o baro Debles gar kamenna.”

²⁷ Leskre mala, kolenge yob čomone bičras, his an Betel, an Ramot-Negev, an Yattir,

²⁸ an Aroer, an i Sifmot, an i Eshtemoa,

²⁹ an Rakal, oun an i forya, kay djivan i Yerameelarya oun i Kenarya,

³⁰ oun an Horma, Bor-Ashan, Atak

³¹ oun Hebron, oun an kol tsele gaba, kay o David peskre morshentsa dren oun vin djas.