1. Samuel 27 - O Debleskro Lab 2024 (Sinte-Manouche)

O David pash i Filistarya

¹ O David penas peske an peskro dji: “Vell ko dives, kay perau o Sauleske an i vasta, oun yob dell man moulo! O feteder mange hi, te djap yaake sik har djala an o them Filistia. Palle moukell o Saul mandar tele, oun rodell man bouder gar an o tselo them Israel. Oun yob nay krell man či bouder!”

² Yaake kras pes o David ap o drom peskre 600 (shob-sheel) morshentsa. Oun yon djan pash o baro rayeste pral o foro Gat. Leskro lab his Akish, koleskro dad his o Maok.

³ Oun o David peskre morshentsa ačas pash o Akish an o foro Gat. Hakenes his peskri familya pash peste. O Davides his peskre douy romyen pash peste, i Ahinoam dran Yesreel, oun i Abigayil dran Karmel, kolakro rom o Nabal his.

⁴ Oun har le o Sauleske penan, te nashas o David an o foro Gat, rodas yob les bouder gar.

⁵ O David penas ap o Akish: “Te kameh tou mange lačes te vell, palle mouk man an i foro ap o them te djal, te nay djivap kote. Kova hi mange doha. Hoske djivap me, tiro boudepaskro, pash toute an o rayeskro foro?”

⁶ Oun o Akish das les ko dives o foro Siklag. Doleske hi o foro Siklag gomme kava dives kol bare rayenge dran o them Youda.

⁷ Ko tselo tsiro, kay o David an o them Filistia his, his yek bersh oun star čon.

⁸ An ko tsiro peras o David peskre morshentsa an ko them dren, kay djivenn i Geshourarya oun i Girsarya oun i Amalekarya. Kolla his i rah tsiro kote an o them, oun djivan bis pash o moulo them Shour oun bis tele pash o them Egiptia.

⁹ Oun kay o David an kava them dren peras, kote moukas lo kek morshes oun kek djouvyat djides, oun las i tsele bakre oun groumya, bourike oun khamele, oun kol tsele ripya peha, oun djas pale pale pash o Akish.

¹⁰ Oun te poučas o Akish: “Kay peran t'mer kava dives dren oun randan?” palle penas o David: “An o them Negev an Youda.” Oder: “An o them Negev, kay i Yerameelarya djivenn.” Oder: “An o them Negev, kay i Kenarya djivenn.”

¹¹ Oun o David moukas kek morshes oun kek djouvyat djides. Yob kamas gar, te nay vell yek an foro Gat oun penell kote, hoy yob peskre morshentsa čačepah kras. Oun yaake kras kova o David o tselo tsiro yaake rah, har yob an o them Filistia djivas.

¹² Oun o Akish patsas o Davides, oun penas peske: “Yob kras pes pash peskre menshende Israel yaake khandles, te ačell lo hako tsireske miro boudepaskro.”