1. Samuel 24 - O Debleskro Lab 2024 (Sinte-Manouche)

O David hatsell o Saules an i grotta oun marell les gar

¹ Oun o David djas kotar pre oun khatras pes an i berge pash En-Gedi.

² Oun o Saul las i Filistaryen palla. Har vas lo pale khere, penan le ap leste: “Dik o David hi an o moulo them pash En-Gedi.”

³ Oun o Saul las peske 3.000 (triin-zerya) vin rodede morshen dran o tselo them Israel, oun djas lentsa koy, te rodell lo les. Oun o David oun leskre morsha his vergel kol bare barra, hoy kharenn bouzyengre barra.

⁴ Har vas o Saul pash kol bakrengre platse, kay ap o drom his, dikas lo i grotta, djas koy dren ap i rig. Oun o David oun leskre morsha his doureder palla an koy grotta.

⁵ Kote penan o Davideskre morsha ap leste: “Kava hi o dives, kolestar o baro Devel ap toute penas: Me dau koles, kay touke čilačepen kamell, an tiro vast, te nay kress tou leha har tou kameh.” Oun o David stas pre oun činas čorrhanes i kotar dran o Sauleskri baya tele.

⁶ Pal kova, har lo kova kras, djas leskro dji zoreles.

⁷ Oun yob penas ap kol morshende, kay pash leste his: “O baro Devel mou rikrell man pale, te taprap miro rayes an, koles o baro Devel vin rodas, te vell lo baro ray. Kova hi lo oun ačell lo.”

⁸ Oun kal phare labentsa penas lo lenge, hoy čačes hi. Oun kekes moukas lo ap o Sauleste pre te djal. Oun o Saul stas pre oun djas vin dran koy grotta, te djal lo peskro drom doureder.

⁹ Kote stas o David ninna pre, oun djas ninna vin, oun das pal o Sauleste palla gole: “Miro baro ray!” Oun o Saul rissras pes trouyel. Oun o David vitsras pes glan leste tele o mouyeha ap i phoub,

¹⁰ oun penas ap o Saul: “Hoske shouneh tou ap i laba kol menshendar, kay touke penenna: O David rodella tiri bibarht?

¹¹ Kava dives nay dikeh tire yakentsa, te das tout o baro Devel an mire vasta, har hals tou an koy grotta. Oun mange penan le, te dap tout moulo. Oun me krom tout či. Me penom mange: Me kamau gar miro vast ap miro rayeste te čivell, koles o baro Devel vin rodas, te vell lo baro ray.

¹² Miro dad, dik kava kotar dran tiri baya an miro vast! Me činom les dran tiri baya tele, oun dom tout gar moulo. Ap kova nay dikeh oun hayveh, te hom kek phoukepaskro oun kamau tout kek čilačepen te krell. Tou leh man palla te dess man moulo, ninna te krom touke či.

¹³ O baro Devel mou vell o čačepaskro ray mank mende douyende! Yob dell tout pale, hoy tou ap mande kral! Miro vast taprell tout gar an!

¹⁴ Tou prindjreh, har mare phoure penan: Dran i čilačende vell o čilačepen. Me taprau tout gar an.

¹⁵ Kones leh tou, o baro ray pral o Israel, palla? Koneske tradeh tou palla? Man, kay hom har i moulo djouklo, či vavar har yek poushoum!

¹⁶ O baro Devel mou vell o čačepaskro ray mank mende douyende oun rakrell o čačepen pral mende! Yob te lell kava koova an o yak, oun miro čingepen touha an o vast, te dell lo man miro čačepen!”

¹⁷ Har o David kol laba ap o Sauleste rakras, penas o Saul: “Shounau me gar tout, miro čaves David, kate?” Oun o Saul rovas zoreles.

¹⁸ Oun palle penas lo ap o David: “Tou hal feteder an o čačepen tardo har me. Tou hals ap mande lačes, me homs čilačes ap toute.

¹⁹ Kava dives sikral tou man oun lauteren, te hal tou lačes ap mande, har čivas man o baro Devel an tiro vast, oun tou dal man gar moulo.

²⁰ Kay hi yek, kay hatsell koles, kay kamell les te marell, oun moukell les an o kamlepen peskro drom te djal? O baro Devel moukell touke lauter mishto te djal koleske, hoy kava dives ap mande kral!

²¹ Me djinau, te veh tou baro ray, oun te vell o them Israel an tiro vast zoreles!

²² Yaake de tout sovel ap o baro Debleste, te mareh gar mire čaven, kay pal mande venna, te vell miro lab gar bistedo an miro dadeskro kheer.”

²³ Oun o David das pes koy sovel. Oun o Saul djas khere. O David oun kol morsha, kay pash leste his, djan pre an ko khatepen, hoy len an i berga his.