1. Samuel 23 - O Debleskro Lab 2024 (Sinte-Manouche)

O David lell o fores Kehila vin dran i vasta i Filistarendar

¹ Oun o Davideske vas penlo: “Dik, i Filistarya djan pre ap o foro Kehila, oun čorenn lengro djob dran i djobengre platse.”

² Kote poučas o David o baro Deblestar: “Djap me pre ap kol Filistarya?” Oun o baro Devel penas: “Dja ap lende! Tou mareh len oun leh o foro Kehila dran lengre vasta vin.”

³ Kol morsha, kay pash o Davideste hi, penan ap leste: “Kate an Youda hi men doha daar. Har nay djah mer an Kehila te maras men i Filistarentsa?”

⁴ Kote poučas o David gomme i douyto kopo o baro Debles, oun o baro Devel penas: “Ste pre oun dja an Kehila! Me kamau t'men i Filistaryen an t'maro vast te dell!”

⁵ Oun o David djas peskre morshentsa an Kehila. Oun yon maran pen i Filistarentsa, dan boud lendar moulo oun tradan lengre firhen krik. Yaake las o David o foro Kehila dran lengre vasta vin.

⁶ Har nashas peske o Abyatar, koleskro dad o Ahimelek hi, oun vas pash o David an Kehila, las lo i rashayeskri damdira peha.

⁷ Oun o Sauleske vas penlo, te vas o David an o foro Kehila. Kote penas o Saul: “Kanna, kay vas o David an i foro, koleskre bare voudya pandlo hi, pandas pes lo dren, oun o Devel das les an miro vast.”

⁸ Oun o Saul moukas peskre tsele lourden khetne gole te dell, te djan le leha tele an Kehila, oun te čivenn le pen glan o foreskro baro voudar tardo, bis te o David palle vin hounte vell.

⁹ Har o David hayvas, te hi o Saules čilačepen an o dji oun kamas ap leste te djal, penas lo ap o rashayeste Abyatar: “An mange o rashayeskri damdira kay!”

¹⁰ Oun o David rakras ap o baro Debleste: “Baro Devel, tou o Israeleskro Devel, me shounom, te hi o Saul pashel, te vell lo an o foro Kehila, oun te kamell lo lauteren kate moulo te dell doleske, kay me, tiro boudepaskro kay hom.

¹¹ Baro Devel, tou o Israeleskro Devel, pen mange: Kal menshe, kay an kava foro Kehila djivenna, denn kolla man an o Sauleskro vast? Oun vell o Saul čačepah kay tele, yaake har me shounom?” Oun o baro Devel penas: “Ava, yob vella tele!”

¹² Oun o David poučas les pale: “Denn kalla, kay kate an Kehila djivenn, man oun kol morshen, kay pash mande hi, an o Sauleskre vasta?” Oun o baro Devel penas: “Ava, yon denn tout an leskre vasta!”

¹³ Kote kras pes o David ap o drom khetne peskre morshentsa. Kolla his yaake shob-sheel morsha. Oun yon djan penge dran o foro Kehila, oun djan trouyel an o tselo them dran yek khatepen an o vavar. Oun o Sauleske vas penlo, te nashas o David peske dran o foro Kehila. Oun har yob kova shounas, moukas lo tele te djal an Kehila.

O David an o moulo them Sif

¹⁴ Oun o David ačas an o moulo them, oun khatras pes an i berge pash o foro Sif. Oun o Saul rodas les o tselo tsiro. Oun o Devel das o Davides gar an leskro vast.

¹⁵ Oun o David dikas, te djas o Saul vin, te marell lo les. Doleske ačas lo kote an Horesha an o moulo them pash o foro Sif.

¹⁶ Kote kras pes o Sauleskro čavo, o Yonatan, ap o drom, oun djas pash o David pre an Horesha, oun kras leskro dji zorelo an o patsepen ap o Debleste.

¹⁷ Oun o Yonatan penas ap o David: “Ma dare, miro dadeskro vast nay hatsell tout gar. Tou veh o baro ray pral o Israel. Oun me vau o douyto pal toute. Oun ninna miro dad, o Saul, djinell kova mishto.”

¹⁸ Oun yon douy dan pen sovel glan o baro Debleste, te ačenn le mala. Oun o David ačas an Horesha, oun o Yonatan djas pale khere.

¹⁹ Oun morsha dran o foro Sif djan pash o Saul an o foro Gibea, oun penan ap leste: “O David hi pash mende khatedo ap i berga pash Horesha, ap koy tikni berga Hakila, hoy vergel Yeshimon hi.

²⁰ Te kameh tou tele te vell pash mende, palle ab! Oun mer dah les an tiro vast.”

²¹ Oun o Saul penas: “O baro Devel mou dell t'men barht, kay kran t'mare djia mange pre.

²² Djan koy, oun denn yak, hatsenn vin ap havi platsa yob hi, oun koon les dikas. Mange vas penlo, te hi les boud pal i kanda.

²³ Lenn hako khatepen an i yak, kay khatrell lo pes. Oun te djinenn kova lauter, palle avenn pale pash mande kay! Oun me djau t'mentsa. Oun te hi lo an o them, palle hatsau me les ninna. Oun te hounte rodoms ninna an o tselo them Youda pal leste!”

²⁴ Oun i morsha djan pale an Sif. Oun o Saul djas pal lende. O David oun leskre morsha his an o moulo them Maon an i tala, hoy vergel Yeshimon hi.

²⁵ Oun o Saul oun leskre morsha djan koy, te rodenn le les. Oun kova vas o Davideske penlo, oun yob djas tele pash i barreskri berga, hoy an o moulo them Maon hi, te ačell lo koy.

²⁶ O Saul djas ap kay yek rig i bergatar, oun o David oun leskre morsha ap i vavar rig. Oun yon djan yaake sik har djala, te nashenn le o Saulestar. O Saul oun leskre lourde his pashel, te pandenn le len dren. Har his le gar dour, te taprenn le len,

²⁷ vas i bičepaskro pash o Saul oun penas: “Ab sik! I Filistarya peran an o them dren!”

²⁸ Kote rissras o Saul trouyel oun las o Davides gar doureder palla, oun djas te kourell lo pes i Filistarentsa. Doleske kharan le koy platsa Sela-Malekot.