1. Samuel 21 - O Debleskro Lab 2024 (Sinte-Manouche)

O David pash o rashayeste an o foro Nob

¹ Oun o David kras pes ap o drom oun djas peske. Oun o Yonatan djas pale an o foro.

² Oun o David vas an o foro Nob. Oun kote djas lo pash o rashayeste Ahimelek. Oun kova trissas i daryatar glan leste oun poučas lestar: “Hoske veh tou kokres, oun kek hi pash toute?”

³ Oun o David penas ap o rashayeste Ahimelek: “O baro ray bičras man an yek koova, hoy kek djinell oun penas ap mande: Kek hounte djinell kolestar, oun tou hounte rikress tiro mouy, koon tout ninna poučella. Kek hounte djinell, hoske me tout bičrom. Doleske krom mire lourdentsa vin, kay mer men taprah.

⁴ De man panč mare, te hi le tout, oder kova, hoy tout pash o vast hi, hoy man ap o sikepen nay deh.”

⁵ Oun o rashay penas ap o David: “Man hi kek maro, kokres ko maro, hoy o Debleske hi. Kova nay dau t'mende, te tapran kol morsha, kay pash toute hi, kek djouvyat an!”

⁶ O David penas ap o rashayeste: “Men his kek djouvel taysar oun ko dives glan, har mer vin djam. Ninna te djam gar an o kourepen o Debleske, his i terne morsha yaake, te nay dikas o Devel lačes ap lende. Doleske hi le kova čačepah kava dives boudeder har glan kova.”

⁷ Koy das les o rashay kol Debleskre mare. Kek vavar maro his koy. Kol Debleskre mare his o baro Debleste dino, pale krik lino, har vas nevo maro koy čiddo.

⁸ Ap ko dives his ninna i pralstouno boudepaskro o Saulestar an o baro Debleskro kheer. Kova his i Edomari, oun leskro lab his Doeg. Yob his o pralstouno pral kolende, kay yak dan ap o Sauleskre bakre.

⁹ Oun o David poučas o Ahimelek: “Hi tout kek vitsepaskro čouri, vitar kek rharo kay pash toute? Me lom miro rharo oun vavar kourepaskro koova gar mantsa. Man his kek tsiro koleske. O rayeskro koova hounte djas sik.”

¹⁰ Oun ko rashay penas: “Men hi ko rharo o Filistarestar Goliat kate, koles tou maral an o telstouno them Elah. Leskro rharo hi an i baya dren pandlo oun hi pal o rashayeskri damdira čiddo. Te kameh les touke te lell, palle le les touke. Kek vavar rharo hi kay.” Oun o David penas: “Savo rharo dell kek douyto kopo. De les mande!”

¹¹ Oun ap ko dives djas o David doureder, oun nashas peske o Saulestar. Oun djas pash o Akish, ko ray pral o foro Gat.

¹² Oun koleskre boudepangre penan ap pengro rayeste: “Hi kava gar o David, o ray pral leskro them? Khelan le gar oun givan pral leste: O Saul das yek zero moulo, oun o David das deesh-zerya moulo?”

¹³ Kol laba djan an o Davideskro dji, oun yob tapras bari daar glan o Akish, ko rayeste pral o foro Gat.

¹⁴ Oun yob kras glan lengre yaka yaake, har te vals lo dinelo. Har kaman le les an-taprell, vas lo divyo, oun činas sikepen ap i bare voudya oun moukas peskri čounger an peskri čora te nashell.

¹⁵ Koy penas o Akish ap peskre boudepangre: “T'mer dikenn, te hi ko morsh narvelo. Hoske anenn t'mer les glan mande?

¹⁶ Hi man gar dinele doha, te anan kales ninna gomme kay? Kamau gar te vell lo pash mande oun krell peskro narvelo koova an miro kheer.”