1. Samuel 19 - O Debleskro Lab 2024 (Sinte-Manouche)

O Yonatan rakrell lačes o Davideske

¹ Oun o Saul rakras peskro čaveha oun peskre boudepangrentsa, te kamell lo o Davides te marell. O Yonatan, kay kamas o Davides o djiyestar,

² penas kova o Davideske oun penas: “Miro dad kamell tout te marell. Yaake khate tout taysarlakro oun rike tout khatemen.

³ Me kamau miro dadeha vin te djal kote ap kay platsa, kay tou hal, oun rakrau leha pral toute. Oun hoy shounau, kova penau touke pale.”

⁴ Oun o Yonatan rakras peskro dadeha oun rakras lačes pral o Davideste oun penas: “Miro baro ray, an kek doosh ap toute oun kre o Davideske či! Yob hi tiro boudepaskro oun kras touke kek čilačepen. Oun lauter, hoy yob kras, his touke mishto.

⁵ Yob dikas gar ap peskro djipen, har djas lo koy oun kouras pes o Filistareha oun das les moulo. Yaake te las o baro Devel o tselo Israel dran i vasta i Filistarendar. Oun tou dikal kova oun hals barhtelo. Hoske kameh tou doosh ap toute te anell oun i rat yekestar, koles kek doosh ap peste hi? Hoske kameh tou o Davides moulo te dell čičeske?”

⁶ Oun o Saul shounas ap o Yonatan oun das pes sovel oun penas: “Me dau man sovel pash o djido Debleste, o David hounte merell gar!”

⁷ Kote das o Yonatan o Davides gole, oun penas leske lauter, oun anas les pash o Saul. Oun yob boudras leske pale, har glan ko tsiro.

⁸ Oun pale vas i baro kourepen, oun o David djas vin te marell lo pes i Filistarentsa. Oun yob das len yaake zoreles, te hounte nashan le.

⁹ Oun ko čilačo dourho, bičedo o baro Deblestar, vas pral o Saul, har yob khere beshdo his oun peskro vitsepaskro čouri an o vast rikras. Ninna o David his koy oun bashras ap peskri doryengri bashepaskri.

¹⁰ Oun o Saul vitsras peskro čouri, te dell lo o Davides ap i vanta. Oun o David stas ap i rig, yaake te djas ko čouri an i vanta. Oun yob nashas peske.

¹¹ An koy rat bičras o Saul lourden pash o Davideskro kheer, te denn le yak, te nashell lo gar peske, oun te denn le les moulo taysarlakro. Oun leskri romni, i Mikal, penas leske kova oun penas: “Te nasheh tou gar kay rat, palle denn le tout taysarlakro moulo.”

¹² Oun i Mikal moukas o Davides dran i vorhni tele, oun yob nashas peske.

¹³ Palle las i Mikal o khereskro devel, o Terafim, oun čivas les ap o čiben, oun čivas bouzyengre balla kote, kay o shero čiddo vals, oun čakras kova lauter i ripyeha.

¹⁴ Har van o Sauleskre bičepangre, te lenn le o Davides, penas i Mikal: “Yob hi nasselo.”

¹⁵ Kote bičras len o Saul i douyto kopo, te dikenn le pal leste, oun penas: “Anenn les an peskro čiben kay pash mande, te dap les moulo.”

¹⁶ Oun kol lourde djan koy oun hatsan či har ko khereskro devel Terafim an o čiben čiddo, oun kol bouzyengre balla pash leskro shero.

¹⁷ Kote poučas o Saul i Mikalatar: “Hoske rhorhral tou man, oun moukal koles te nashell, kay mange čilačepen kamell?” Oun i Mikal penas ap o Saul: “Yob penas ap mande: Mouk man te djal, te dap tout gar moulo!”

O David nashell pash o Samuel

¹⁸ O David nashte nashas peske, oun djas pash o Samuel an o foro Rama oun penas leske halauter, hoy o Saul leha kras. Oun o David djas khetne o Samueleha pash i khera, kay o Debleskre rakepangre djivan, oun yon ačan koy.

¹⁹ Oun o Sauleske vas penlo: “Dik, o David hi pash o Debleskre rakepangre an Rama.”

²⁰ Kote bičras o Saul lourden, te anenn le o Davides. Har dikan kolla kol tsele Debleskre rakepangren oun lengro pralstounes, o Samueles, oun shounan, har kolla o Debleskro rakepen vin rakran, koy vas o Debleskro dourho pral kol bičepangren. Oun yon rakran ninna o Debleskro rakepen vin.

²¹ Oun kova vas o Sauleske penlo. Oun yob bičras vavar bičepangren koy. Oun ninna kolla rakran o Debleskro rakepen vin. Oun o Saul bičras o triinto kopo vavaren koy. Oun ninna kolla rakran o Debleskro rakepen vin.

²² Kote kras yob pes ap o drom an o foro Rama. Har vas lo pash koy bari brounna, hoy pash i djobeskri platsa Sekou hi, poučas lo: “Kay hi o Samuel oun o David?” Oun yon penan leske: “Pash kol khera, kay o Debleskre rakepangre djivenn an o foro Rama.”

²³ Oun yob djas koy. Ap peskro drom vas ninna pral leste o Debleskro dourho. Oun yob djas oun rakras o Debleskro rakepen vin, bis te vas yob pash kol khera, kay o Debleskre rakepangre djivenn an o foro Rama.

²⁴ Kote rivas yob ninna peskre koola vin, oun rakras glan o Samuel o Debleskro rakepen vin, oun peras ap i phoub oun his nanges koy čiddo o tselo dives oun i tseli rat. Doleske vell penlo: “Hi o Saul ninna mank o Debleskre rakepangre?”