1. Samuel 12 - O Debleskro Lab 2024 (Sinte-Manouche)

O Samuel čivell peskri boudi tele

¹ Oun o Samuel penas ap i tsele Israelitarya: “Me shounom ap lauter, hoy t'mer mange penan, oun čivom i baro rayes pral t'mende.

² Kanna djal yob glan t'mende. Me vom phouro oun mire balla van parno. Oun mire morsh čave hi pash t'mende. Foun tiknes pre djom glan t'mende bis ap kava dives.

³ Doleske hom kanna glan t'mende tardo: Stenn pre oun rakrenn kate glan o baro Debleste oun glan o baro rayeste, kones yob vin rodas: Koneskri groumni lom me? Koneskri esla? Kones rhorhrom me? Konestar lom i zoryah, hoy leske his? Konestar moukom man te playsrell, te pandap mire yaka glan leskro čilačo koova. Me te krom kova, palle kamau les me pale te dell.”

⁴ Yon penan: “Tou rhorhral men gar, oun lal touke či i zoryah, oun lal kekestar čomone an, te pandess tire yaka glan leskro čilačo koova.”

⁵ Yob penas ap lende: “O baro Devel oun t'maro baro ray, koles yob vi-rodas, kolla douy dikenn oun shounenn kava dives, te hatsan t'mer či an miro vast.” “Ava, yaake hi kova”, penan le.

⁶ Oun o Samuel penas ap i Israelitarya: O baro Devel hi kova, kay o Moses oun o Arones pral t'mende čivas, oun t'mare phouren dran o them Egiptia vin anas!

⁷ Kanna stakrenn glan, te krap o čačepen vin mank o baro Debleste oun t'mende; oun penap o tselo lačepen, hoy o baro Devel t'menge oun t'mare phourenge kras.

⁸ Har o Yakob an o them Egiptia vas, oun i Egiptarya t'mare phourenge o djipen phares kran, dan yon gole ap o baro Debleste, te vell lo ap lengri rig. Oun o baro Devel bičras o Moses oun o Arones. Oun yon anan t'mare phouren dran o them Egiptia vin, oun moukan len kate an kava them te djivell.

⁹ Yon bistran pengro baro Debles. Oun yob das len an i vasta kolendar, kay kouran pen lentsa: o Sisera, ko pralstouno lourdo o forestar Hazor, i Filistarya, oun o ray pral o them Moab.

¹⁰ Koy dan le gole ap o baro Debleste, te vell lo ap lengri rig, oun penan: “Mer lam doosh ap mende, te djam krik toutar, baro Deblestar, oun mangam kol deblen an, kay kharenna Baal oun Astarte. Kanna le men vin dran i vasta kolendar, kay men tele rikrenn. Palle vess tou kokres maro Devel.”

¹¹ Kote bičras o baro Devel o Yeroub-Baal, o Bedan, o Yefta oun o Samuel, oun las t'men vin dran i vasta kolendar, kay t'men tele rikran, yaake te nay djivan kek daryah.

¹² Har t'mer dikan, te djal o ray pral i Ammonarya, o Nahash vin, te kourell lo pes t'mentsa, penan t'mer mange: “Mer kamah i baro rayes pral mende”, har te vals o baro Devel gar t'maro baro ray.

¹³ Kanna dikenn: “Kate hi t'maro baro ray, koles t'menge vin rodan oun mandar mangan. O baro Devel čivas les pral t'mende.

¹⁴ Har kamoms, te sharenn t'mer o baro Deblestar, kay t'maro Devel hi, oun mangenn les kokres an, oun shounenn ap leste oun krenn, hoy yob t'menge penella! Har kamoms, te djan t'mer oun t'maro baro ray, kay pral t'mende hi, o Debleskro drom!

¹⁵ T'mer te shounenn gar ap o baro Debleste oun krenn gar, hoy lo t'menge penell, palle krell o baro Devel, te djal t'menge djoungeles, yaake har ninna t'mare phourenge djas.

¹⁶ Kanna dikenn, havo baro koova o baro Devel glan t'mare yaka krella!

¹⁷ Kanna hi o tsiro, kay o djob dren anlo vell. T'mer djinenn, kova hi gar o tsiro, kay dell brishin. Oun me dau kanna ap o baro Debleste gole, te bičrell yob brishin oun moukell o bolepen gole te dell. Palle hayvenn t'mer, te his kova, hoy kran, i baro čilačepen glan o baro Debleste, har mangan mandar i baro rayes pral t'mende.”

¹⁸ Oun o Samuel das ap o baro Debleste gole, oun o baro Devel bičras brishin ko dives, oun moukas o bolepen gole te dell. Koy lan i tsele menshe bari daar glan o baro Debleste oun glan o Samuel.

¹⁹ Oun yon penan ap o Samuel: “Mer ham tire boudepangre. Mang menge o baro Debles, kay tiro Devel hi, yaake te hounte meras mer gar. Ap mende hi boud doosh čiddo. Oun kanna kram ninna ko čilačo koova, te mangam menge i baro rayes pral mende.”

²⁰ O Samuel penas ap lende: “Ma darenn! Hi čačo, te kran t'mer kava tselo čilačepen; kanna shounenn ap o baro Debleste oun djan leskro drom t'maro tselo djiyeha!

²¹ Ma nashenn kol rhorhene deblenge palla, hoy či molenna, oun hoy t'men gar vin nay lenna dran o merepen. Yon hi či.

²² O baro Debleske his shoukar, te van t'mer leskre menshe. Oun yob das peskro vast koy pre oun moukell t'men gar.

²³ Oun me ninna, kamau gar i doosh ap mande te anell glan o baro Debleste, te mangap les gar t'menge. Me kamau te sikrap t'mende o lačo oun čačo drom.

²⁴ T'mer hounte darenn o baro Debles oun mangenn les kokres an t'maro tselo djiyeha! Ma bistrenn, havo baro koova yob t'menge kras.

²⁵ T'mer te ačenn ap t'maro čilačo drom, palle djan t'mer oun t'maro ray nashedo.”