1. Samuel 11 - O Debleskro Lab 2024 (Sinte-Manouche)

O Saul kourell pes i Ammonentsa oun vell zorleder har yon

¹ Oun o ray pral i Ammonarya, o Nahash, las peskre tsele lourden, djas vin oun čivas pes lentsa troul o foro Yabesh an o them Gilead, yaake te nay vas kek dren oun kek vin. Oun i tsele morsha dran o foro Yabesh penan ap o Nahash: “Kre mentsa vin, te kress menge kek čilačepen. Palle nay veh tou o ray pral mende!”

² O Nahash penas ap lende: “Kava hi, hoy t'mentsa vin krau: Me dau hakeneske t'mendar o čačo yak vin. Yaake anau ladj ap o tselo Israel!”

³ Koy penan i phoureder an o foro Yabesh ap leste: “Mouk men efta divessa tsiro, te nay bičras morshen an o tselo them Israel! Oun te hi palle kek koy, kay lell men vin dran tiro vast, palle kamah pash toute vin te djal.”

⁴ Koy van kol morsha, kay dran Yabesh bičedo van an o foro Gibea, kay o Saul djivas, oun penan kol laba i tsele menshenge an o foro. Har kolla kova shounan, rovan le zoreles.

⁵ An ko tsiro vas o Saul peskre groumyentsa pale peskri boudyatar ap peskro kotar phoub, oun poučas: “Hoy hi i menshenge, te rovenn le yaake?” Oun yon penan leske i laba, hoy i morsha dran Yabesh lenge penan.

⁶ Oun har o Saul kol laba shounas, vas o Debleskro dourho pral leste, oun i rholi rhačras an leste pre.

⁷ Oun yob las douy groumya oun činas len an kotya, oun bičras kol bičepangre kol kotyentsa mass an o tselo them Israel trouyel oun moukas te penell: “Koon djal gar vin an o kourepen o Sauleha oun o Samueleha, kolengre groumyenge djal yaake har kalenge!” Koy peras o baro Debleskri daar ap i tsele menshenge, oun i tsele morsha djan vin har te vans le yek morsh.

⁸ Oun o Saul kharas len khetne pash o foro Besek. Kol morsha dran Israel his 300.000 (triin-sheel-zerya) morsha, oun kolla dran Youda 30.000 (triyanda-zerya).

⁹ Oun yob penas ap kol bičepangre: “Penenn t'mare menshenge an o foro Yabesh: Taysar mashkral o dives han bouder gar dren pandlo.” Oun kol bičepangre djan khere, oun penan lauter i morshenge an Yabesh, oun kolla van pale barhteles.

¹⁰ Oun yon bičran morshen pash i Ammonarya oun moukan lenge te penell: “Taysar vah pash t'mende, te nay krenn mentsa, hoy mishto hi an t'mare yaka.”

¹¹ Sik taysarlakro moukas o Saul peskre lourden yaake khetne tardo te vell, te his hako kopo i triinto kotar khetne tardo. Yaake djan le triin rigyendar ap i platsa, kay i Ammonarya hi. Kova his gomme glan o tsiro, kay o kham pre djas. Oun yon maran i Ammonarya bis mashkral o dives. Oun kolla, kay djides ačan, nashan penge, yaake te ačan gar douy lendar khetne.

¹² Koy penan i Israelitarya ap o Samuel: “Koon hi kolla, kay kaman gar, te vell o Saul o ray pral mende? Denn kol morshen vin, te nay das len moulo.”

¹³ O Saul penas: “Kava dives vell kek moulo dino. Kava dives las o baro Devel peskre menshen Israel vin dran i vasta kolendar, kay lenge čilačepen kaman.”

¹⁴ Oun o Samuel penas ap i Israelitarya: “Avenn, te djas mer khetne an Gilgal, te das gomme yek kopo vin gole, te hi o Saul maro baro ray!”

¹⁵ Oun yon lauter djan pre an Gilgal. Oun kote, pash o Debleskro kheer čivan le o Saules pral pende, te vell lo lengro baro ray. Oun kote maran le firhen o baro Debleske, oun kran i baro rhapen. Oun o Saul oun i tsele Israelitarya rhan oun piyan barhteles khetne.