1. Samuel 1 - O Debleskro Lab 2024 (Sinte-Manouche)

I Hanna mangell o baro Deblestar i čaves

¹ His i morsh i menshendar Efrayim. Kova djivas an o foro Ramatayim-Zofim an o pralstouno them Efrayim. Leskro lab his Elkana. Koleskro dad his o Yeroham, koleskro dad his o Elihou, koleskro dad his o Tohou, oun koleskro dad his o Souf.

² O Elkana, les his douy romya; koy yek kharas Hanna oun koy vavar Peninna. Oun kolat his čave. I Hannat his kek čave.

³ Oun ko morsh djas hako bersh vin dran peskro foro, te mangell lo an o foro Shilo o baro Debles an, ko rayes pral o bolepen oun i phoub, oun te anell lo leske i firhes, hoy vell leske maredo. Kote his douy phrala o baro Debleskre rashaya: o Hofni oun o Pinhas. Kolengro dad his o Eli.

⁴ Te vas ko dives, kay anas o Elkana i firhes o Debleske, das yob peskri romyat Peninna oun lakre morsh čaven oun čen, hakeneste yek kotar mass.

⁵ I Hannat das yob douy kotya. Yob kamas lat o djiyestar, ninna te kras o baro Devel lah yaake, te nay las li kek čave.

⁶ Oun i Peninna, koy vavar romni, rodas, har te doukrell li lat, oun kras lat i labentsa tele, doleske, kay nashte lell li kek čave.

⁷ Oun yaake djas kova hako bersh: Te djan le pre pash o baro Debleskro kheer, doukras i Peninna lat yaake. Palle rovas i Hanna oun rhas či.

⁸ O Elkana, lakro rom, penas ap late: “Hanna, hoske roveh tou? Oun hoske rhah tou či? Oun hoske hi tiro dji yaake phares? Hom me touke gar boudeder moldo har deesh morsh čave?”

⁹ Har yon an Shilo his, stas i Hanna pre pal o rhapen oun o pipen, oun djas an o baro Debleskro kheer. Kote his o rashay Eli beshdo glan o voudar.

¹⁰ Oun lakro dji rovas, oun yoy mangas o baro Debles oun rovas zoreles ap leste,

¹¹ oun das pes sovel oun penas: “Tou, baro Devel oun ray pral o bolepen oun i phoub, tou te dikeh kanna tiri čorveli boudepaskretsa an, oun bistreh lat gar, oun deh tiri boudepaskretsat i morsh čaves, palle dau me les toute o tselo tsiro, hoy yob djivella. Oun kek čouri vell ap leskre balla, hoy činals len tele.”

¹² Oun har yoy i rah tsiro o baro Debleha rakras, das o Eli yak ap lakro mouy.

¹³ I Hanna rakras peske kokres an peskro dji. Ninna te djas lakro mouy, har te rakrals li, nay shounas kek lakre laba. Kote patsas o Eli, te hi li mati.

¹⁴ Oun o Eli penas ap late: “Har rah kameh tou gomme mati kate te ačell? Dja khere oun sob tiro matepen vin, te vess pale pash toute!”

¹⁵ I Hanna penas: “Ma rikrenn man mateske, miro ray! Mool piyom me gar oun či vavar, hoy yekes mato krell. Me hom či vavar har i djouvel, kay lat i pharo dji hi. Oun kova čorom vin glan o baro Debleste.

¹⁶ Rike tiri boudepaskretsat gar i djouvyake, kay či moldo hi. Miro dji hi phagedo oun phares, doleske rakrom me kate yaake rah.”

¹⁷ Kote penas o Eli ap late: “Dja o Debleha! O Israeleskro Devel dell tout kova, hoy tou lestar mangal.”

¹⁸ Oun yoy penas: “Mou dikenn tire yaka kamles ap mande!” Oun koy djouvel djas peskro drom, oun rhas, oun dikas bouder gar yaake phagedo vin har glan kova.

¹⁹ Oun sik o vavar dives stan le pre. Oun har sharan le o baro Debles, djan le khere an Rama. Oun o Elkana djas rati pash i Hannate dren. Oun o baro Devel bistras i Hannat gar oun kras,

²⁰ te vas li vavarčandes. Oun har lakro tsiro vas, las li i morsh čaves, oun das les o lab Samuel. Yoy penas: “O baro Deblestar mangom les mange.”

I Hanna dell peskro čaves o Debleste

²¹ O vavar bersh, har djas o Elkana pale pre peskri tseli familyah har hako bersh, te anell lo o baro Debleske i firhes, hoy vell leske rhačedo, ninna yekes, te rikrell lo peskri sovel, hoy yob das,

²² koy djas i Hanna gar lentsa. Yoy penas ap peskro romeste: “Te piyell o čavo bouder gar ap o beč, kamau me les pre te anell glan o baro Debleste. Oun yob ačell palle koy, yaake rah yob djivella.”

²³ Oun lakro rom Elkana penas ap late: “Kre yaake har tou kameh, ač kay, bis te yob phouro doha hi. Mou rikrell o baro Devel lauter, hoy yob pral kava čaveste penas!” Yaake ačas koy romni khere oun das o čaves o beč, yaake rah bis te yob phouro doha his.

²⁴ Oun har yob phouro doha his, las li les peha, oun djas leha pre an o foro Shilo. Oun las koy pashel yek triin-bershengro gouroum oun deesh kilogramme yarro oun yek ledertikro gono pherdi mool, oun anas kova pash o baro Debleskro kheer. O čavo his gomme terno.

²⁵ Oun yon maran o gouroum, oun anan o čaves pash o Eli.

²⁶ Oun yoy penas ap o Eli: “Ah, miro ray, yaake har čačo hi, kay tou djiveh: Me hom koy djouvel, kay kate tardo his oun o baro Deblestar mangas.

²⁷ Kava čaves mangom mange o baro Deblestar. Oun yob shounas man oun das les mande.

²⁸ Doleske dau les me kanna ninna o baro Debleste pale, te vell lo leskro, yaake rah har yob djivella.” Oun yon mangan kote o baro Debles an.