1. Rajengro liil 7 - O Debleskro Lab 2024 (Sinte-Manouche)

O Salomeskre vavar khera

¹ Ap peskre khera boudras o Salomo 13 (deesh-te-triin) bersha, bis te halauter kerdo his.

² Yek leskre kherendar his kharedo Libanoneskro veesh. Kava kheer his 50 (paash-sheel) metarya lengsto, oun 25 (biish-te-panč) metarya bourhlo oun 15 (deesh-te-panč) metarya baro, oun his tardo ap cedertikre rouka, kolengre pralstoune kotya tele činlo his. Kolla his tardo an star reihe. Oun pesse cedertikre kashta his čiddo ap lende.

³ Ap lende his 45 iseme, hoy his čakedo o cedertikro kashteha, deesh-te-panč an yek reiha.

⁴ An kava kheer his vorhya an triin reihe, yek reiha pral i vavar. I vorhya his yaake kerdo, te his yek vorhni vergel koy vavar.

⁵ Oun i tsele voudya oun vorhya his star rigya. Oun kol vorhya ap yek rig his yaake kerdo, te his yek vorhni vergel koy vorhni ap i vavar rig, – kova his yaake ap hake triin reihe.

⁶ Ninna moukas o Salomo i baro kheer te krell, koleskri dacha his tardo ap turme. Kava kheer his 25 (biish-te-panč) metarya lengsto, oun 15 (deesh-te-panč) metarya bourhlo. Glan kava kheer his i glanstouni halla, kolat his ninna turme, oun i treppa koy glan.

⁷ Yob moukas pes ninna i kheer te krell, kay leskri beshepaskri tardo his, oun kay yob o čačepen vin rakras pral i menshende. Kava kheer vas kharedo “Čačepaskro Kheer.” Kava kheer moukas lo foun tel bis pral cedertikro kashteha vin te čivell.

⁸ Oun leskro kheer, kay yob djivas, his čiddo pal ko kheer, kay leskri beshepaskri his, ap i vavar platsa. Kava kheer his yaake kerdo, har kol vavar khera ninna. Oun yob moukas ninna savo kheer te krell peskri romyake. Koya his i čay o baro rayestar pral o them Egiptia.

⁹ Kol tsele khera moukas yob dran lače barra te krell, foun tel bis pral, oun foun vin bis dren ap i bari platsa. Kal barra his mishto činlo ap hake star rigya.

¹⁰ I telstoune barra his pharo oun baro, panč oun star metarya lengsto.

¹¹ Oun ap lende his lače barra, mishto dino ap hake star rigya, mank lende his pesse cedertikre kashta.

¹² Troul koy bari platsa his i massouri dran činle barra oun pesse kashta: triin kope činle barra yek ap i vavar, oun koy pral yek kopo cedertikro kasht. Yaake his ninna koy massouri troul i platsa glan o Debleskro kheer kerdo oun koy glanstouni halla glan ko kheer.

Douy bare turme dran lolo saster o Debleskro khereske

^13-14 Oun o baro ray Salomo moukas pash peste te vell i morshes, kay hayvas mishto o lolo sasteha te boudrell. Les his i lačo vast, oun nay kras shoukar koova dran lolo saster. Leskro lab his Houram. Yob his dran o foro Tirus. Leskri day his i menshendar Naftali. Leskro dad his dran Tirus oun djivas bouder gar. Oun o Houram vas pash o baro rayeste Salomo, oun kras leske ko tselo koova dran lolo saster.

¹⁵ Yob kras douy turme dran lolo saster, hakeno his enya metarya baro, oun yaake pesso, te djals i dori, hoy shob metarya lengsto hi, troul leste.

¹⁶ Oun yob kras douy sherya dran lolo saster oun čivas len pral pre ap i turme, hako shero his 2,5 (douy-te-paash) metarya baro.

¹⁷ Oun ap hako shero his i shoukar pandepen, hoy vin dikas har efta shelle.

^18-20 Oun yob kras douy sheel granatikre phabya. Kolla his pandlo pral oun tele troul ko pandepen, hoy ap o shero hi. Kova kras lo yaake hake douy turmentsa. Oun kol sherya pral pre ap kol turme dikan vin har bloume, hakeno his 1,8 metarya pesso.

²¹ Oun yob čivas kol douy turme pre glan koy glanstouni halla glan o Debleskro kheer. Ko turmo ap i čači rig moukas lo Yakin te kharell, oun ko turmo ap i servi rig moukas lo Boas te kharell.

²² Oun pral ap kol turme van kol sherya pre čiddo, hoy vin dikenn har bloume. Yaake vas kay tseli boudi ap kol turme kerdo.

O baro thopaskro čaro dran lolo saster

²³ Oun o Houram kras i baro thopaskro čaro. Kova his panč metarya lengsto foun yek rig ap i vavar, oun 2,5 (douy-te-paash) metarya foun tel bis pral. Oun i dori, hoy 15 (deesh-te-panč) metarya lengsto hi, djals troul leste trouyel.

²⁴ Oun pral troul ko thopaskro čaro his figure har melontikre brola, deesh figure ap i paash metari. Kolla djan douy kope troul o čaro, oun his khetne ko čareha dran lolo saster an yek kotar kerdo.

²⁵ Tardo his ko thopaskro čaro ap 12 (deesh-te-douy) groumya dran lolo saster. Kolendar dikan triin ap i servi rig, triin ap i palstouni rig, triin ap i čači rig oun triin ap i glanstouni rig. Lengre palstoune herya his mashkral tel o thopaskro čaro. Kova his tardo ap lengre dume.

²⁶ Ko lolo saster foun ko thopaskro čaro his yaake pesso har i vast. Oun leskro mouy his har o mouy i khorestar. Kova dikas vin har i lilya, te djal li pre. An ko thopaskro čaro djan 40.000 (star-deesh-zerya) litarya dren.

Panyeskre vourdya dran lolo saster

²⁷ Yob kras ninna deesh panyeskre vourdya dran lolo saster, hakeno his douy metarya lengsto oun bourhlo oun yek-te-paash metarya baro.

²⁸ Kal vourdya his yaake kerdo, te his len lengste sane kotya lolo saster pral oun tele ap lengre rigya. Oun ninna lengste sane kotya lolo saster djan foun tel bis pral.

²⁹ Oun ap i rigya mashkral kal lengste sane kotya lolo saster his leve, groumya oun bolepangre, kay kharenna Keroubim. Oun pral oun tele kal levendar oun groumyendar his shoukar shelle dran lolo saster pandlo.

³⁰ Oun hako vourdin his tardo ap star rade dran lolo saster. Kolen his douy akse dran lolo saster. Oun pral ap kol star ekke his hidjepangre pire, yek piro vergel ko vavar, te hidjrenn le i baro panyeskri piri.

³¹ Ap ko vourdin his čomone har i rundi meen, kay koy piri pre čiddo vas. Koy meen his i paash metari foun tel bis pral, oun 75 (efta-deesh-te-panč) centimetarya bourhlo. Oun ninna an koy meen his figure dren činlo. Koy meen his tardo ap i kotar lolo saster, koles his star rigya oun his gar rundo.

³² Kol star rade his tel ap i rigya, oun i akse foun kol rade his tel o vourdin pre kerdo. Haki rada his 75 (efta-deesh-te-panč) centimetarya baro.

³³ Kal rade his yaake kerdo har i rade ap kol kourepangre vourdya. Lengre tsele kotya van halauter kerdo dran lolo saster.

³⁴ Oun kol star hidjepangre ap kol star ekke his dran yek kotar o vourdineha kerdo.

³⁵ Oun pral ap hako vourdin his i sano kotar lolo saster troul o tselo vourdin. Kova his 25 (biish-te-panč) centimetarya bourhlo. Ap leste his tapepangre o vasteske.

³⁶ Oun o Houram moukas ap i tapepangre oun ap i sane kotya lolo saster, kote kay platsa his, figuren dren te činell: Keroubim, leve oun palmtikre rouka. Oun troul halauter his shoukar shelle dran lolo saster pandlo.

³⁷ Oun yob kras deesh save vourdya. Hakeno his dran yek kotar kerdo. Halauter his emligo baro oun dikan emliges vin.

³⁸ Oun yob kras deesh bare panyeskre pirya dran lolo saster, hako vourdineske yek piri. Yob kras len yaake baro, te djan 840 (orhta-sheel-te-star-deesh) litarya pani an haki piri dren. Haki piri his douy metarya bourhlo.

³⁹ Oun yob čivas panč vourdya ap i čači rig o kherestar. Oun kol vavar panč vourdya čivas lo ap i servi rig. O baro thopaskro čaro moukas lo ap i čači ekka glan o kheer te anell, ap koy rig, kay o kham pralstounes hi.

Vavar koova dran lolo saster

⁴⁰ Oun o Houram kras ninna pirya, bare roya, oun čare. Oun yaake kras lo halauter, hoy o ray Salomo lestar kamas, te krell lo o baro Debleskro khereske.

⁴¹ Kava koova his: kol douy turme oun lengre sherya; kol douy shoukar pandepen dran shelle, hoy ap i sherya his;

⁴² kol star sheel phabya, hoy van pandlo ap o pandepen, te čakrenn le i sherya ap i turme: ap yek pandepen his douy reihe phabya, yek sheel phabya an haki reiha;

⁴³ deesh panyeskre vourdya oun kol deesh bare pirya koy pre;

⁴⁴ o baro panyeskro čaro oun i deesh-te-douy groumya koy tel;

⁴⁵ i pirya, bare roya oun čare; Kol tsele kotya, hoy kras o Houram o baro Debleskro khereske, yaake har o baro ray Salomo leske penas, kolla his halauter dran shoukar kerdo lolo saster.

⁴⁶ O baro ray moukas ko lolo saster tato te krell, oun an phoubyengre forme te čorell an o telstouno them pash o pani Yordan mank kol forya Soukot oun Zaretan.

⁴⁷ Kol tsele kotya his yaake boud, te moukas o baro ray Salomo gar vin te hatsell, har pharo kova lauter his.

Sonakaskro koova

⁴⁸ Ninna moukas o Salomo ko tselo koova te krell, hoy hounte vell tardo an o baro Debleskro kheer: o sonakaskro bob; o sonakaskri rhapaskri, kay o Debleskre mare pre čiddo venn;

⁴⁹ panč momelengre, hoy tardo venn ap i čači rig oun panč momelengre, hoy tardo venn ap i servi rig glan o Debleskri kouč isema – kolla his dran djoudjo sonakay; i sonakangre bloume ap kol momelengre; i momlia; i činepangre, kolentsa i dorya an i momlia tele činlo venna;

⁵⁰ i čare, čourya, čare o rateske, roya oun pirya, – kolla lauter his dran djoudjo sonakay; i hidjepangre, hoy i voudya rikrenn: ko voudar glan o Debleskri kouč isema oun o khereskro voudar. Kalla his kerdo dran sonakay.

⁵¹ Har o tselo Debleskro kheer kerdo vas oun kova, hoy dren his, hoy moukas o ray Salomo te krell, moukas lo ko koova te anell, hoy peskro dad, o David, o baro Debleske das. Ko roup oun sonakay oun ko tselo koova čivas lo an o baro Debleskro kheer, an koy isema, kay o bravlepen his.