1. Rajengro liil 6 - O Debleskro Lab 2024 (Sinte-Manouche)

O Salomo krell i kheer o baro Debleske

¹ An o starto bersh, har o Salomo o baro ray pral Israel his, an o čon Siv, kova hi o douyto čon an o bersh, kran pen i boudepangre o Salomestar ap i boudi, te krenn le o baro Debleskro kheer. Kova his 480 (star-sheel-te-orhta-deesh) bersha pal kova, kay i Israelitarya dran o them Egiptia djan.

² Oun o kheer, hoy kras o baro ray Salomo o baro Debleske, his triyanda metarya lengsto, oun deesh metarya bourhlo oun deesh-te-panč metarya baro.

³ Oun yob moukas i glanstouni halla glan o kheer te krell: Koya his yaake bourhlo har ko kheer, deesh metarya, oun panč metarya lengsto.

⁴ Oun yob kras vorhya an o kheer oun kras sasterne kashta glan koy.

⁵ Vin troul o kheer ap kol douy rigya oun ap i palstouni massouri moukas lo rigyengre iseme te krell. Kolla djan ap triin dromma yek pral o vavar troul o kheer.

⁶ Telstounes his koy isema 2,5 metarya bourhlo. Koy pral his koy isema 3 metarya bourhlo. Oun koy pral his koy isema 3,5 metarya bourhlo. Yaake nay čivan le i kashta ap kol kashta koy tel, oun hounte čivan i kashta gar an i barra o kherestar dren.

⁷ I barra ko khereske van dino, glan te vas o kheer kerdo. Yaake vas kek sasterno depaskro shounlo, kek tover, vitar kek vavar sasterne koola, an ko tselo tsiro, har o Debleskro kheer kerdo vas.

⁸ Ap i čači rig o kherestar his i voudar an i rigyakri isema. Kote djas i treppa pre an i isema koy pral, oun kotar doureder an koy pralstouni isema.

⁹ Yaake kran o Salomeskre boudepangre ko tselo kheer. Oun ap o kheer moukas lo cedertikre kashta te čivell, yek langs o vavar.

¹⁰ Koy rigyakri isema djas troul o tselo kheer. Foun tel bis pash o mashkralstunepen his li douy-te-paash metarya baro. Oun foun o mashkralstunepen bis pral his li ninna douy-te-paash metarya baro. Oun cedertikre kashtentsa his li pandlo ap o kheer.

¹¹ Oun o baro Devel penas ap o Salomo:

¹² “Tou te kreh, hoy toutar kamau oun djiveh pal miro čačepen oun rikreh mire tsele laba, palle vell miro lab čačo an tiro djipen, ko lab, hoy me rakrom tiro dadeha, o Davideha,

¹³ oun me kamau te djivap an kava kheer, hoy tou mange kreh, mank i Israelitarya, oun kamau mire menshen Israel gar kokres te moukell.”

¹⁴ Oun o Salomo kras ko tselo kheer yaake. Har i massurya kerdo his,

¹⁵ čakras lo i massurya foun dren i cedertikre kashtentsa, hoy djan foun tel bis pral. Oun i phoub čakras lo kashtentsa kol roukendar, hoy kharenn cipresse.

¹⁶ Oun deesh metarya glan i palstouni massouri kras yob i vavar massouri dran cedertikre kashta. Kay massouri djas foun tel bis pral. Yaake kras lo an o kheer i kouč isema o baro Debleske, hoy leske kokres his.

¹⁷ Oun biish metarya his koy isema glan koy kouč isema.

¹⁸ Foun dren his ko tselo kheer cedertikro kashteha vin čiddo. Kek bar nay vas diklo. Oun an o kasht his melontikre brola oun shoukar bloume dren činlo.

¹⁹ Oun mashkral an o kheer kras lo koy isema, kay te vell koy morhton čiddo, kay o baro Debleskre deesh laba dren his.

²⁰ Koy isema his deesh metarya lengsto, deesh metarya bourhlo, oun deesh metarya bis pral. Oun pral i massurya his lačo sonakay maklo. O Salomo kras ninna i bob dran cedertikro kasht, te vell kote soungepaskro koova rhačedo o Debleske, oun čivas ko bob glan o kouč isema,

^21-22 oun makas sonakay koy pral. Oun dren an o kheer makas lo lačo sonakay pral i massurya, oun kras sonakangre shelle, hoy glan koy kouč isema pandle van. Yaake his ko tselo kheer dren mit lačo sonakay pral-maklo.

²³ Oun yob moukas douy bolepangre te krell, te venn le an kay kouč isema tardo. Kolla his panč metarya baro oun his kerdo dran olivtikro kasht.

²⁴ Len his moussya har čirkle. Haki moussi his douy-te-paash metarya bares. Douy moussya bourhles kerdo his khetne panč metarya bourhles yek rigyatar ap i vavar.

²⁵ Oun ko douyto bolepaskro his yaake baro har ko vavar oun dikas vin har ko vavar.

²⁶ Hake douy his panč metarya baro.

²⁷ Oun o Salomo čivas len mashkral an i kouč isema, yek langs i vavar. Oun lengre moussya his yaake bourhles, te djas koy moussi yekestar bis ap koy yek massouri oun koy moussi o vavarestar bis pash koy vavar massouri. Mashkralstounes van i moussya khetne.

²⁸ Oun yob tserdas lačo sonakay pral i bolepangre.

²⁹ Oun an i tsele massurya an o Debleskro kheer moukas lo dren oun vin shoukar koova dren te činell, hoy vin dikas har bolepangre, palmtikre rouka oun bloume.

³⁰ Oun pral o kasht ap i phoub an o Debleskro kheer moukas lo sonakay te tserdell.

³¹ Oun o voudar an o kouč isema his dran douy kotya dran olivtikro kasht. I pesse kashta, hoy čačes oun serves pash o voudar his, kolen his panč rigya.

³² Ninna an kol douy kotya an o voudar moukas lo shoukar koova dren te činell: bolepangre oun palmtikre rouka oun bloume; oun moukas sonakay koy pral te tserdell.

³³ Oun yaake kras lo ninna o voudar glan o Debleskro kheer: I pesse kashta, hoy serves oun čačes lestar hi, his dran olivtikro kasht, oun len his star rigya.

³⁴ Oun mank lende his douy voudya dran cipresstikro kasht, hakeno dran douy kotya, hoy nay rissrenn pen.

³⁵ Oun an kol voudya moukas lo pale shoukar koova dren te činell: bolepangre, palmtikre rouka oun bloume, oun tserdas pral halauter sonakay.

³⁶ Yob moukas ninna i glanstouni platsa troul o Debleskro kheer te krell. Troul i platsa kras lo i massouri, kay triin kope barra ap barra čiddo van, oun ap i triinte barra van cedertikre kashta čiddo.

³⁷ An o starto bersh, har o Salomo baro ray his, van i telstoune barra o khereske o baro Deblestar čiddo. Kova his an o čon Siv.

³⁸ Oun an o deesh-te-yekto bersh an o čon Bul, – kova hi o orhtato čon – his o kheer kerdo. Oun lauter his yaake har hounte vals kova. Oun yon boudran efta bersha ap leste.