1. Rajengro liil 20 - O Debleskro Lab 2024 (Sinte-Manouche)

O kourepen mank o Ahab oun o Ben-Hadad

¹ Oun o Ben-Hadad, ko baro ray pral o them Syria, čivas peskre tsele lourden khetne. Oun 32 (triyanda-te-douy) vavar bare raya pengre lourdentsa his leha. Ninna his graya oun kourepangre vourdya pash lende. Oun lentsa halauterentsa djas yob glan o foro Samaria. Oun yon čivan pen troul o foro, oun pandan o foro dren, te kourenn le pen o foreha.

² Oun o Ben-Hadad bičras bičepangre an o foro pash o Ahab, ko baro rayeste pral Israel.

³ Oun moukas leske te penell: “Kava penell o Ben-Hadad: Tiro roup oun tiro sonakay hi miro, oun tire djouvya oun tire zorleder čave hi mire.”

⁴ Kote penas o baro ray pral Israel pale pale: “Miro baro ray oun pralstouno, yaake har tou peneh, yaake hi. Me hom tiro, oun halauter, hoy man hi, hi ninna tiro.”

⁵ Oun i bičepangre van i douyto kopo pash o Ahab oun penan: “Kava penell o Ben-Hadad: Me moukom pash toute te bičrell oun moukom touke te penell: Tiro roup oun tiro sonakay oun tire djouvya oun tire čave hounte dess tou man an miro vast.

⁶ Kanna djin, taysar an kava tsiro bičrau me mire boudepangren pash toute, te rodenn le an tiro kheer oun an i khera kay tire boudepangre djivenn. Oun halauter, hoy glan tire yaka shoukar hi, lenn yon pentsa krik toutar.”

⁷ Kote das o baro ray pral Israel i tsele phoureden dran Israel pash peste gole, oun penas: “T'mer nay dikenn t'mare yakentsa, har rodell kava morsh o čingepen. Yob moukas mange te penell, te hounte dap les mire djouvyen, mire čaven, miro roup oun miro sonakay, oun me penom: Mishto, halauter hi tiro.”

⁸ Kote penan leske i tsele phoureder oun i tsele vavar menshe an o foro: “Shoun gar ap leste! Ma kre, hoy kamell lo!”

⁹ Kote penas yob ap i bičepangre, kolen o Ben-Hadad pash leste bičras: Penenn miro rayeske, ko baro rayeske Ben-Hadad: “Halauter, hoy tou mandar kamal o ersto kopo, dau me toute. Kava koova, hoy tou kanna kameh, nay krau me gar.” Oun i bičepangre djan pash o Ben-Hadad oun penan leske kova pale.

¹⁰ Kote bičras len o Ben-Hadad pale pash o Ahab, oun moukas leske te penell: “I debla nay denn man moulo, te dau me gar o foro Samaria paash. Kava forestar ačell gar yaake boud pral, te nay lell hakeno mire lourdendar yek vast pherdo čik peha.”

¹¹ Kote penas o baro ray Ahab: “Penenn leske: Kova, kay pandell o rharo troul peste, te djal lo an o kourepen, hounte krell kek baro rakepen. Kova, kay vell pale dran o kourepen nay krell pes bares.”

¹² Har kova o Ben-Hadad shounas, – yob oun kol vavar raya his beshdo pash o pipen an pengre plarhtene khera – koy penas yob ap peskre lourdende: “Djan ap lende pre!” Oun yon čivan pen pre tardo, te kourenn le pen o foreha.

¹³ Koy vas i Debleskro rakepaskro pash o Ahab, ko baro rayeste pral Israel, oun penas ap leste: “Kava penell o baro Devel: Dikeh tou kol boud boud lourden? Čačepah, me kamau len kava dives an tiro vast te dell, te hayvess tou, me hom o baro Devel!”

¹⁴ O Ahab poučas: “Koon mendar hounte kourell pes lentsa?” O Debleskro rakepaskro penas: “O baro Devel penell: I terne morsha, kolengre pralstoune pral o them tardo hi.” Oun yob poučas doureder: “Koon djal glanstounes an o kourepen?” Oun yob penas: “Tou!”

¹⁵ Kote moukas o Ahab kol terne morshen glan te stakrell, kolengre pralstoune pral o them tardo hi. Oun yon his 232 (douy-sheel-triyanda-te-douy) morsha. Oun pal lende moukas lo i tsele lourden an Israel glan te stakrell. Kolla his 7.000 (efta-zerya).

^16-17 Oun yon djan vin dran o foro, har mashkral dives his. Oun kol terne morsha djan glan vin. Oun o Ben-Hadad piyas pes mates an i plarhtene khera, yob oun kol vavar 32 (triyanda-te-douy) bare raya, kay ap leskri rig his. Koy vas leske penlo kol morshendar, kolen yob bičras, te denn le yak: “Morsha venna dran Samaria vin.”

¹⁸ Oun yob penas: “Te venn le an o lačepen, taprenn len djides! Te venn le, te kourenn le pen mentsa, taprenn len ninna djides!”

¹⁹ Har his kol terne morsha vin glan o foro, oun kol vavar lourde dran Israel pal lende,

²⁰ koy maran le hakenes, kay čivas pes lenge an o drom. Oun i Syrarya nashan penge, oun i Israelitarya nashan lenge palla. Oun o Ben-Hadad, ko baro ray pral Syria, nashas peske ap i gray, oun leskre kourepangre vourdya khetne leha.

²¹ Oun o Ahab, ko baro ray dran Israel, djas vin oun kouras pes i kourepangre vourdyentsa, oun das i Syrarya an i baro marepen.

²² Kote vas ko Debleskro rakepaskro pash o baro rayeste dran Israel, oun penas ap leste: “De yak, kre tout zorelo, te djiness oun hayvess, hoy te kress. Ko baro ray dran Syria vell palpale, te hi kava bersh trouyel, te kourell lo pes touha.”

²³ Oun i bare morsha o baro rayestar dran Syria penan ap pengro rayeste: “O Israeleskro Devel hi i devel, kay djivell ap i berge. Doleske his yon zorleder har mer. Te kourah men mer lentsa ap i telstouni phoub, čačepah, palle ham mer zorleder har yon!

²⁴ Kava kre: Mouk kol 32 (triyanda-te-douy) bare rayen bouder gar o penepaske pral i lourdende te vell. Čip kol themeskre rayen pral i lourdende!

²⁵ Oun le touke yaake boud lourden khetne har kolla, kolen tou nashral, oun ninna yaake boud graya oun vourdya, har tout his. Oun mouk men, te kouras men lentsa an o telstouno them! Palle dikeh, mer ham zorleder har yon!” Kote shounas lo ap lende, oun kras yaake.

²⁶ Oun yaake vas, har o nevo bersh vas, koy djas o Ben-Hadad khetne peskre lourdentsa pral pash o foro Afek, te kourell lo pes kote i Israelentsa.

²⁷ Oun i Israelengre lourde van khetne kharedo, oun lenge vas peha dino, hoy len hounte vell o kourepaske. Oun yon djan vin oun moukan pen tele ap douy platse vergel kol Syrarya. I Israelitarya his gar boud. Yon dikan vin har douy tikne bouzyengre herde. I Syrarya his yaake boud, te his o them lendar pherdo.

²⁸ Kote vas o Debleskro morsh pash o baro rayeste pral Israel, oun penas leske: Kava penell o baro Devel: “I Syrarya penan, me o baro Devel, voms i devel, kay ap i berge djivell, oun gar i devel, kay ap o telstouno them djivell. Doleske dau me kal tsele boud lourden an tiro vast, te hayvenn t'mer, kay me o baro Devel hom.”

²⁹ Oun i Israelitarya his kol vavarenge efta divessa yak an yak tardo. Ap o eftato dives, vas o kourepen. Oun i Israelitarya his zorleder har i Syrarya, oun maran lendar 100.000 (sheel-zerya) morsha an yek dives.

³⁰ Oun kol vavar, kay djido ačan, nashan sik an o foro Afek. Kote peras o foreskri massouri ap lende, kay pral ačan. Kolla his 27.000 (biish-te-efta-zerya) morsha. Oun ninna o Ben-Hadad nashas peske an o foro, oun khatras pes an i kheer an i palstouni isema.

³¹ Kote rakran leskre bare morsha leha oun penan: “Dik, mer shounam, kay i bare raya dran o kheer Israel lače raya hi. Mouk men vin te djal pash o rayeste pral Israel, i goneha troul mende pandlo, oun i dori troul mari meen, te sikras mer leste, te hi lo maro ray. Yaake kamah lestar tiro djipaske te mangell.”

³² Yaake pandan le gone troul pende oun čivan dorya troul lengre menya, djan pash o baro rayeste pral Israel, oun penan: “Tiro boudepaskro, o Ben-Hadad, penell: Mouk mange miro djipen!” Kote poučas yob: “Hi lo gomme djido? Miro phraal hi yob.”

³³ I morsha patsan, kova, hoy yob penas, hi i lačo sikepen, oun penan: “Kova hi har tou penal: O Ben-Hadad hi tiro phraal.” Kote penas yob: “Djan oun anenn les kay!” Kote vas o Ben-Hadad pash leste vin. Oun o Ahab moukas les an peskro vourdin.

³⁴ Oun o Ben-Hadad penas ap leste: “Kol forya, kay miro dad tiro dadestar krik las, dau me touke pale pale. Oun tou nay kreh touke parepaskre khera an o foro Damaskus, yaake har kras miro dad an o foro Samaria.” “Mishto” penas o Ahab, “de man tiro dadeskro vast koy pre, palle moukau tout khere te djal.” Kote dan yon pen o vast pre. Oun palle moukas yob les te djal.

³⁵ Koy his Debleskre rakepangre, kay ap yek platsa khetne djivan. Oun yek lendar penas ap i vavareste: “O baro Devel penas mange, te dess tou man.” Ko vavar kamas kova gar te krell.

³⁶ Kote penas o ersto ap leste: “Tou kral gar, hoy o baro Devel penas, doleske djin, yaake sik har djah mandar, vell i levo oun marell tout.” Oun yob djas lestar krik, oun i levo vas oun maras les.

³⁷ Oun yob hatsas i vavar morshes oun penas: “De man!” Kote das les o morsh yaake, te his les i baro doukepen.

³⁸ Palle djas ko Debleskro rakepaskro kote pash o drom, kay o baro ray djas, oun čivas i diklo glan peskro mouy oun pral peskre yaka, te vell lo gar prindjedo.

³⁹ Oun yaake vas, har o baro ray koy djas, das o Debleskro rakepaskro bari gole ap leste oun penas: “Miro baro ray, me djom vin an o kourepen. Oun yek mare lourdendar vas pash mande oun anas mange i pandles, oun penas ap mande: De mishto yak ap leste! Te nashell lo peske, vell tiro djipen toutar lino leskro djipaske. Oder tou hounte playsress yek centnari roup.

⁴⁰ Oun man his kate te kote čomone te krell. Ap yek kopo his lo bouder gar koy!” O baro ray pral Israel penas ap leste: “Tou rakral i phagi pral toute vin. Kova vell pral toute, har tou les penal.”

⁴¹ Kote las ko Debleskro rakepaskro sik ko diklo tele, hoy glan leskre yaka his. Oun o baro ray pral Israel dikas, te his yob i Debleskro rakepaskro.

⁴² Oun yob penas ap leste: “Kava penell o baro Devel: Tou moukal i morshes te djal, kay me kamom, te hounte merals lo. Doleske lau me tiro djipen leskro djipaske, oun tire menshen leskre menshenge.”

⁴³ Kova rhoyras o baro rayes pral Israel. Oun yob djas rhoyedo khere an o foro Samaria.